Comhionannas agus cuimsiú

Foinse: Eorabharaiméadar 2023 maidir le hidirdhealú san Aontas

Na príomhnithe a baineadh amach

• Leis an Treoir maidir le Pá Comhionann, tugtar aghaidh ar an mbearna phá idir na hinscní trína chinntiú go n-íoctar mná agus fir go cothrom as obair chomhionann. Bíonn tionchar aige sin ar shaoránaigh gach lá, go háirithe mná sa lucht saothair, trí phá cothrom a chur chun cinn agus neamhionannas ioncaim a laghdú.
• Chun tacú le cothromaíocht oibre is saoil níos fearr, thug an tAontas rialacha nua isteach maidir le saoire tuismitheora, uaireanta oibre solúbtha, agus an ceart athruithe ar phatrúin oibre a iarraidh. Déanann sé difear suntasach do thuismitheoirí agus do chúramóirí, cuireann sé comhionannas inscne chun cinn sa bhaile agus ag an obair, agus déanann sé níos éasca é do theaghlaigh cothromaíocht a bhaint amach idir obair agus freagrachtaí cúraim.
• Leis an gcéad Straitéis riamh de chuid an Aontais um Chomhionannas LGBTIQ 2020-2025, cuireadh dlús le gníomhaíocht an Aontais chun daoine LGBTIQ a chosaint, trí thacaíocht d’eagraíochtaí sochaí sibhialta LGBTIQ a neartú, agus tríd an gcomhar idir na Ballstáit a fheabhsú.
• Tháinig an tAontas chun bheith ina pháirtí i gCoinbhinsiún Iostanbúl, an tagarmharc do chaighdeáin idirnáisiúnta chun foréigean in aghaidh na mban agus foréigean teaghlaigh a chosc agus a chomhrac.
• Chun an taisteal a dhéanamh níos éasca, thug an tAontas isteach an Cárta Míchumais Eorpach agus an Cárta Páirceála Eorpach do dhaoine faoi mhíchumas. Cuirfidh na cártaí feabhas ar an rochtain ar sheirbhísí do dhaoine faoi mhíchumas agus iad ag taisteal thar theorainneacha na hEorpa, áiseanna páirceála san áireamh.
• Tá an Ionstraim Eorpach um Inrochtaineacht á cur i bhfeidhm anois ar fud Bhallstáit den Aontas. Faoin Ionstraim, ceanglaítear go mbeidh táirgí agus seirbhísí ríthábhachtacha, cuir i gcás teileafóin, ríomhairí, ríomhleabhair, seirbhísí baincéireachta agus cumarsáid leictreonach, inrochtana do dhaoine faoi mhíchumas. Cuideoidh sé sin lena rannpháirtíocht ghníomhach sa tsochaí, an t-oideachas agus an fhostaíocht a mhéadú, chomh maith le níos mó neamhspleáchais agus deiseanna soghluaisteachta do dhaoine faoi mhíchumas. Mura n-urramaíonn gnólachtaí na rialacha nua, is féidir le tomhaltóirí caingean a thabhairt os comhair na n-údarás náisiúnta.
• Trí na Cairteacha um an Éagsúlacht, oibríonn an tAontas le cuideachtaí, le hinstitiúidí poiblí, le heagraíochtaí neamhbhrabúis agus le húdaráis áitiúla chun an t-idirdhealú a chomhrac agus chun áiteanna oibre atá níos cothroime, níos éagsúla agus níos cuimsithí a chur chun cinn.
• Gach Bealtaine, déanann an tAontas ceiliúradh ar Mhí na hÉagsúlachta, rud a mhúsclaíonn feasacht agus a chuireann iarrachtaí i láthair a chabhraíonn chun timpeallachtaí comhionanna cuimsitheacha a thógáil.
• Leis an nGradam do Phríomhchathracha Ionchuimsithe agus Éagsúlachta na hEorpa, tugtar aitheantas do bhailte, do chathracha agus do réigiúin atá ar thús cadhnaíochta maidir le pobail níos cuimsithí a chruthú atá saor ó idirdhealú.
• Ó 2010 i leith, leis an nGradam don Chathair is Inrochtana, tugtar aitheantas do chathracha an Aontais atá ag déanamh sáriarrachtaí chun bheith inrochtana do dhaoine faoi mhíchumas.