Cuir go gníomhach lenár gcuid oibre
Tá go leor bealaí éagsúla ann chun páirt a ghlacadh i bhforbairt leanúnach bheartais agus dhlíthe an Aontais, agus chun bualadh le príomhoifigigh de chuid an Aontais le do smaointe agus do tuairimí a chur in iúl.
Coinnigh ort ag léamh chun tuilleadh eolais a fháil faoin gcaoi le páirt a ghlacadh agus do thuairim a nochtadh faoi thodhchaí na hEorpa.
Idir tairseach ar ar féidir leat do thuairim a chur in iúl, eolas faoi phoist, conas cuairt a thabhairt orainn, agus conas iarratas a dhéanamh ar dheiseanna maoiniúcháin.
Teagmháil a dhéanamh leis an gCoimisiún maidir le beartas an Aontais
Páirt ghníomhach a ghlacadh i mbeartais Eorpacha a mhúnlú trí thuairimí a roinnt linn maidir le beartas agus dlí an Aontais.
Is féidir leat do thuairim a nochtadh ar thionscnaimh an Choimisiúin agus, ar an gcaoi sin, cabhrú linn an obair ullmhúcháin ar reachtaíocht an Aontais a mhionchoigeartú ag céimeanna éagsúla den phróiseas. Is iondúil go mbíonn tréimhse 4 seachtaine ann inar féidir aiseolas a thabhairt ar threochláir, ar dhréacht-achtanna, ar thograí agus ar achtanna atá glactha.
Bealach eile chun páirt a ghlacadh is ea ardán rannpháirtíochta na Saoránach. Is spás tiomnaithe é chun páirt a ghlacadh sa díospóireacht maidir le beartais an Aontais a bhfuil tionchar acu orainn ar fad. Is féidir le daoine páirt a ghlacadh trí aighneachtaí a phostáil nó trí bharúil a thabhairt faoi aighneachtaí ó dhaoine eile, sin nó iad a fhormhuiniú. Cuirtear na aighneachtaí sin san áireamh mar chuid de na Painéil Saoránach Eorpach agus áirítear an toradh sa phróiseas ceaptha beartas Eorpach.
Is féidir leat cabhrú chun tograí nua a thosú. Más mian leat go ndéanfadh an tAontas beart i leith saincheist áirithe, is féidir leat tionscnamh ó na saoránaigh a sheoladh chun iarraidh ar an gCoimisiún Eorpach reachtaíocht nua de chuid an Aontais a mholadh maidir leis an tsaincheist sin. Is féidir leat achainí a chur isteach freisin chun iarraidh ar Pharlaimint na hEorpa ceist a fhiosrú a dhéanann difear duit, nó gearán a dhéanamh faoin gcaoi a bhfuil dlí de chuid an Aontais á chur i bhfeidhm.
Iarratas a dhéanamh ar chonarthaí maoiniúcháin agus tairisceana
Tá réimse leathan deiseanna maoiniúcháin de chuid an Aontais ar féidir leat cur isteach orthu mar shaoránach nó mar ghnólacht. Faigh eolas faoi conas iarratas a dhéanamh trína fháil amach cad ba cheart a bheith ar eolas agat sula dtosaíonn tú ag déanamh iarratais, chomh maith le heolas faoi cé atá in ann maoiniú a fháil, faoin bpróiseas iarratais agus faoin nós imeachta dámhachtana.
Bain úsáid as Tairseach ‘Cistiú agus Tairiscintí’ an Aontais chun teacht ar na deiseanna atá ar fáil faoi láthair, chun comhpháirtithe a aimsiú nó chun togra a chur isteach.
Iarratas a dhéanamh ar phoist
An bhfuil suim agam a bheith ag obair don Aontas Eorpach? Tairgeann an tAontas poist i gcatagóirí éagsúla ball foirne: oifigigh bhuana, baill foirne ar conradh agus baill foirne shealadacha, saineolaithe náisiúnta ar iasacht, oiliúnaithe agus baill foirne eile. Is í an Oifig Eorpach um Roghnú Foirne (EPSO) a bhainistíonn iarratais ar phoist.
Tabhair cuairt orainn agus freastal ar ár n-imeachtaí
Tá oifigí ag an gCoimisiún i ngach tír den Aontas, cé go bhfuil formhór na n-Ard-Stiúrthóireachtaí lonnaithe sa Bhruiséil nó i Lucsamburg. Faigh amach conas is féidir leat cuairt a thabhairt ar an gCoimisiún, ar ghníomhaireachtaí feidhmiúcháin agus ar institiúidí, comhlachtaí agus gníomhaireachtaí eile de chuid an Aontais.
Is féidir le grúpaí ar cuairt eolas a chur ar ról an Choimisiúin agus eolas a fháil faoina phríomhbheartais ó bhaill foirne an Choimisiúin trí chuairt a thabhairt ar Ionad na gCuairteoirí sa Bhruiséil. Eagraítear cláir le haghaidh ionadaithe gnó, rialtas áitiúil, iriseoirí, polaiteoirí agus mic léinn.
Tugtar cuireadh do chuairteoirí aonair cuairt a thabhairt ar Ionad Taispeántais Experience Europe. Is taispeántas buan é sin sa Bhruiséil inar féidir leat a fháil amach faoi phríomhobair, tosaíochtaí agus beartais an Choimisiúin agus faoi luachanna an Aontais Eorpaigh i dtimpeallacht spraíúil idirghníomhach.
Eagraímid imeachtaí éagsúla i rith na bliana chomh maith. Féach ar ár liosta imeachtaí atá le teacht chun a fháil amach conas is féidir leat páirt a ghlacadh.
Déan teagmháil linn ar na meáin shóisialta
Bainimid úsáid as go leor cainéal ar na meáin shóisialta chun ár gcuid oibre a chur i láthair. Ar na cainéil sin, is féidir leat páirt a ghlacadh i gcomhráite agus cur leo, sin agus ár n-ábhar a chomhroinnt.