Seirbhísí airgeadais

Tá bearta á gcur i bhfeidhm againn chun aontas coigiltis agus infheistíochta a fhorbairt, tionscadal ríthábhachtach le haghaidh iomaíochas agus fhás an Aontais. Is é is aidhm dó margadh caipitil níos comhtháite agus níos dinimiciúla a chothú agus leas a bhaint as caipiteal príobháideach in infheistíochtaí táirgiúla ar mhaithe le saoránaigh agus gnólachtaí.  

Déanaimid monatóireacht leanúnach ar rioscaí nua don chobhsaíocht airgeadais, do chosaint tomhaltóirí nó do shláine an mhargaidh, ionas gur féidir linn freagairt go tapa nuair is gá. Tacaímid freisin le haistriú digiteach na seirbhísí airgeadais, agus muid ag maolú rioscaí a d’fhéadfadh a bheith ann ag an am céanna.  Oibrímid i ndlúthchomhar le húdaráis mhaoirseachta eile de chuid an Aontais agus le comhlachtaí idirnáisiúnta, toisc go bhfuil an tAontas nasctha leis an gcóras airgeadais domhanda.

Is iad seo a leanas na príomhchuspóirí atá againn:

• an t-aontas coigiltis agus infheistíochta a chur chun cinn chun coigiltis agus gnólachtaí táirgiúla a nascadh ar bhealach níos fearr
• é a chur ar chumas mhuintir na hEorpa cinntí eolasacha airgeadais a dhéanamh
• margadh aonair caipitil de chuid an Aontais a chur ar bun ina mbeidh rialáil iomchuí agus tuairisciú airgeadais ardchaighdeáin, agus an t-ualach riaracháin ar chuideachtaí a íoslaghdú ag an am céanna
• creat láidir rialála agus maoirseachta a chruthú do bhainc, d’árachóirí agus do chistí pinsin
• uirlisí agus beartais a chruthú don earnáil airgeadais a chuidíonn leis an Aontas a spriocanna aeráide agus comhshaoil a bhaint amach
• é a chur ar a cumas don earnáil airgeadais leas a bhaint as an digitiú agus na rioscaí a bhaineann leis a bhainistiú ag an am céanna
• sciúradh airgid agus maoiniú na sceimhlitheoireachta a chomhrac, agus smachtbhannaí a fhorchur nuair is gá
• comhar rialála idirnáisiúnta a chur chun cinn maidir le gach ábhar airgeadais

Na príomhéachtaí

• Tar éis na géarchéime airgeadais, chuir an tAontas feabhas ar a chóras maoirseachta airgeadais chun gur tapúla agus éifeachtaí a bheidh an próiseas rialála i seirbhísí airgeadais.
• Leis an nGníomh um Liostú, beidh margaí caipitil poiblí an Aontais níos tarraingtí agus beidh sé níos éasca do chuideachtaí de gach méid, FBManna san áireamh, liostú ar na stocmhalartáin Eorpacha.
• Tá rialacha stuamachta nua ann mar chuid den phacáiste baincéireachta ag cuidiú leis na bainc a bheith athléimneach le linn éiginnteacht eacnamaíoch, i gcomhréir le caighdeáin idirnáisiúnta.
• Tá rialacha tugtha cothrom le dáta ag an Aontas chun an creat rialála árachais a neartú, agus cead a thabhairt d’árachóirí níos mó infheistíochta a dhéanamh san fhíorgheilleagar ag an am céanna.
• Tá an tAontas anois ina cheannaire domhanda san airgeadas digiteach leis an Rialachán maidir le Margaí Cripteashócmhainní, an chéad tacar cuimsitheach rialacha maidir le criptea-airgeadraí.
• Leis an bpacáiste maidir le frithsciúradh airgid, bunaíodh sraith aonair rialacha agus Údarás nua de chuid an Aontais um Chomhrac an Sciúrtha Airgid, chun sláine an mhargaidh a neartú agus chun coireacht airgeadais a chosc agus a bhrath ar bhealach níos éifeachtaí.
• Mar fhreagairt ar fhogha na Rúise faoin Úcráin, tá smachtbhannaí glactha ag an Aontas chun bonn eacnamaíoch na Rúise a lagú, chun srian a chur lena rochtain ar theicneolaíochtaí criticiúla agus ar mhargaí criticiúla, agus chun laghdú suntasach a dhéanamh ar a cumas cogadh a fhearadh.