Cumarsáid straitéiseach agus ionramháil agus cur isteach eachtrach ar fhaisnéis a chomhrac

Forbhreathnú

An daonlathas, an smacht reachta agus urraim do chearta bunúsacha, tá siad sin go léir i measc luachanna bunaidh an Aontais Eorpaigh. Is comhluachanna ag na Ballstáit iad na luachanna sin, iad mar bhonn taca le sochaí arb iad is sainairíonna inti an chuimsitheacht, an t-iolrachas, an neamh-idirdhealú, an chaoinfhulaingt, an ceartas, an dlúthpháirtíocht agus an comhionannas.

Is féidir le saoránaigh a dtuairimí a chur in iúl faoi shaoirse agus teacht ar a dtuairimí féin. Is féidir leo páirt a ghlacadh sa saol daonlathach, a n-ionadaithe polaitiúla a roghnú, agus cead cainte a bheith acu maidir lena dtodhchaí féin, i spás poiblí inar féidir tuairimí éagsúla a chur in iúl agus ina nglactar leis an éagsúlacht

Is bagairt thromchúiseach ar an méid sin iad ionramháil agus cur isteach eachtrach ar fhaisnéis. Is féidir leo an bonn a bhaint d’institiúidí daonlathacha agus de phróisis dhaonlathacha trí dhaoine a bhacadh ar chinntí eolasacha a dhéanamh nó iad a chur ó dhoras ó thaobh vótála de. Is féidir leo an tsochaí a dheighilt trí phobail a chur i gcoinne a chéile.

A bhuí le teicneolaíochtaí nua, is féidir le gníomhaithe naimhdeacha feidhmiú agus bréagaisnéis a scaipeadh ar scála agus ar luas nach bhfacthas a leithéid riamh roimhe seo.

Dá bhrí sin, saincheisteanna práinneacha don Aontas Eorpach agus dá Bhallstáit is ea ionramháil agus cur isteach eachtrach ar fhaisnéis a chomhrac, sin agus athléimneacht shochaíoch a fheabhsú i gcoinne na mbagairtí sin. 

^{Foinse: Eorabharaiméadar Speisialta 568 ‘An daonlathas a chosaint agus a chur chun cinn’ - Samhain 2025}

Cén chaoi a bhfuil an Coimisiún Eorpach ag freagairt ar an bhfadhb?

Tá an Coimisiún ag neartú a chumarsáide straitéisí mar fhreagairt ar ionramháil agus cur isteach eachtrach ar fhaisnéis a dhíríonn ar bheartais an Aontais.  

Mar chuid de fhreagairt chuimsitheach, tá sé tábhachtach saoirse agus iolrachas na meán a ráthú chomh maith, agus a chinntiú go mbeidh rochtain ag saoránaigh ar nuacht agus ar eolas ar ardchaighdeán ar féidir leo iontaoibh a bheith acu as.

Is ar an méid seo a leanas a dhíríonn freagairt an Choimisiúin ar an dúshlán sin:

• Beartais a fhorbairt chun daonlathais Eorpacha a neartú, agus é a dhéanamh níos deacra do ghníomhaithe bagartha mí-úsáid a bhaint as ardáin ar líne nó cur isteach ar thoghcháin, agus iriseoirí agus iolrachas na meán a chosaint
• Feasacht staide a fhorbairt trí mhonatóireacht, brath agus anailís a dhéanamh ar fhaisnéis foinse oscailte
• Cur i gcoinne ionramháil agus cur isteach eachtrach ar fhaisnéis trí thionscadail múscailte feasachta, réitigh theicneolaíocha ardfhorbartha, agus comhordú feabhsaithe
• borradh a chur faoi athléimneacht na sochaí agus rannpháirtíocht na saoránach trí litearthacht dhigiteach agus litearthacht sna meáin agus trí bhearta eile
• Comhoibriú le hinstitiúidí, údaráis náisiúnta, seiceálaithe fíricí, eagraíochtaí na sochaí sibhialta, na meáin, an saol acadúil agus eagraíochtaí eile