Naġixxu fil-qasam tad-difiża biex nipproteġu lill-Ewropej

L-indirizzar tal-isfidi tas-sigurtà u tad-difiża

Fl-ewwel nofs tal-2025, il-Kummissjoni pproponiet diversi inizjattivi ewlenin biex tingħata spinta lill-prontezza u l-investiment tad-difiża Ewropea:

• il-white paper għall-Prontezza tad-difiża Ewropea 2030
• il-Pjan ReArm Europe
• l-omnibus tas-simplifikazzjoni tal-prontezza tad-difiża

Dawn il-proposti huma strumentali biex jiġu indirizzati l-isfidi u l-lakuni li qed tiffaċċja l-UE fis-sigurtà u d-difiża. 

F’Ottubru 2025, il-Kummissjoni ppreżentat pjan direzzjonali 2030 għall-prontezza tad-difiża biex jitkejjel il-progress u jiġu diskussi l-passi li jmiss.

Ix-xahar ta’ wara, u kif deskritt fil-white paper, ressqet pakkett ġdid ta’ miżuri biex tissaħħaħ il-mobbiltà militari fl-Ewropa. Fl-istess ħin, stabbiliet ukoll pjan direzzjonali għat-trasformazzjoni tal-industrija tad-difiża tal-Ewropa billi tiġi sfruttata l-innovazzjoni fixkiela. 

Il-pjan ReArm Europe / Prontezza 2030 se jagħti spinta lill-finanzjament għad-difiża billi jagħti aktar flessibbiltà finanzjarja lill-pajjiżi tal-UE.

Dan se jinkiseb permezz ta’: 

• l-attivazzjoni tal-klawżola liberatorja nazzjonali tal-Patt ta’ Stabbiltà u Tkabbir, li tippermetti lill-Istati Membri jżidu l-infiq fuq id-difiża. Żieda ta’ 1.5 % fil-PDG fil-baġits tad-difiża tista’ toħloq kważi €650 biljun fi spazju fiskali mifrux fuq erba’ snin.
• il-varar ta’ strument ta’ self ta’ €150 biljun — Azzjoni tas-Sigurtà għall-Ewropa (SAFE) — biex jgħin lill-pajjiżi jinvestu f’oqsma ewlenin tad-difiża bħad-difiża mill-missili u mid-droni, u ċ-ċibersigurtà. Il-fondi se jinġabru fis-swieq kapitali u se jiġu żborżati lill-Istati Membri interessati fuq talba, abbażi tal-pjanijiet nazzjonali. Adottata mill-Kunsill tal-UE f’Mejju 2025, SAFE se tħeġġeġ lill-Istati Membri biex jonfqu aħjar, flimkien u fil-livell Ewropew.
• l-appoġġ lill-Grupp tal-Bank Ewropew tal-Investiment fit-twessigħ tas-self tiegħu għall-proġetti tad-difiża u s-sigurtà u l-aċċellerazzjoni tal-unjoni tat-tfaddil u l-investiment biex jiġi mobilizzat il-kapital privat ħalli l-industrija tad-difiża Ewropea ma tkunx tiddependi fuq l-investiment pubbliku biss 

L-impenjar sħiħ ta’ dawn l-għodod finanzjarji se jkollu effetti pożittivi għall-ekonomija u l-kompetittività tal-UE. Dan jinkludi l-bini ta’ fabbriki u linji ta’ produzzjoni ġodda essenzjali għall-ġenerazzjoni ta’ impjiegi tajbin fl-Ewropa.

Inseddqu l-paċi - il-pjan direzzjonali għall-prontezza tad-difiża 2030

Il-pjan direzzjonali għall-prontezza tad-difiża huwa pjan komprensiv biex jissaħħu l-kapaċitajiet tad-difiża Ewropej. Dan jiddeskrivi objettivi ċari u stadji importanti konkreti biex

• jingħalqu l-lakuni fil-kapaċitajiet
• jitħaffu l-investimenti fid-difiża madwar l-Istati Membri
• tinkiseb prontezza sħiħa tad-difiża sal-2030 

Inizjattivi Ewlenin Ewropej għal Prontezza

Il-pjan direzzjonali jipproponi erba’ inizjattivi ewlenin

• l-inizjattiva Ewropea għad-Difiża tad-Droni
• l-Għassa tan-Naħa tal-Lvant
• it-Tarka tal-Ajru Ewropea
• it-Tarka Spazjali Ewropea

Dawn se jsaħħu l-kapaċità tal-Ewropa li tnaffar u tiddefendi fuq l-art, fl-ajru, fil-baħar, fiċ-ċibernetika u fl-ispazju, filwaqt li jikkontribwixxu direttament għall-miri tal-kapaċità tan-NATO.

Prontezza b’Koalizzjonijiet tal-Kapaċitajiet

Il-prontezza sħiħa tad-difiża tfisser li niżguraw li l-forzi armati nazzjonali jkunu jistgħu jantiċipaw, iħejju u jirrispondu għal kwalunkwe kriżi, inkluż għal kunflitt mill-aktar intensiv. 

Il-pjan direzzjonali jistieden lill-Istati Membri jlestu l-Koalizzjonijiet tal-Kapaċitajiet f’disa’ oqsma ewlenin u jxejnu n-nuqqasijiet fil-kapaċitajiet bi żvilupp u akkwist konġunti. Dawn huma d-difiża mill-ajru u mill-missili; il-faċilitaturi strateġiċi; il-mobbiltà militari; is-sistemi tal-artillerija; il-gwerer ċibernetiċi, bl-Intelliġenza Artifiċjali u dawk elettroniċi; il-missili u l-munizzjon; id-droni u s-sistemi kontra d-droni; il-kumbattiment fuq l-art; u l-qasam marittimu.

It-tisħiħ tal-bażi industrijali tad-difiża tal-UE 

Biex jixxejnu n-nuqqasijiet fil-kapaċità hemm bżonn industrija tad-difiża tal-UE b’saħħitha li tkun tista’ tipprovdi dak li jeħtieġu l-Istati Membri, bl-iskala u l-ħeffa meħtieġa. 

L-innovazzjoni fid-difiża għandha tiġi sfruttata bis-sħiħ, inkluż b’soluzzjonijiet li ġejjin mill-Ukrajna. Ir-reżiljenza tal-ktajjen tal-provvista tad-difiża jeħtiġilhom ukoll jissaħħu billi jitnaqqsu d-dipendenzi kritiċi fil-materja prima u f’sorsi kritiċi oħra.

Nixprunaw l-investiment fid-difiża 

Sal-2030, l-għan huwa li jinħoloq suq tad-difiża tal-UE simplifikat b’regoli komuni li jippermettu lill-industrija tipproduċi aktar malajr u fuq skala akbar, u li jixprunaw kemm il-produzzjoni kif ukoll l-innovazzjoni. Il-Kummissjoni se ssegwi l-kapaċità industrijali mid-difiża tal-ajru u mill-missili, id-droni, u s-sistemi spazjali biex tiżgura li l-Ewropa tkun tista’ tissodisfa ħtiġijiet urġenti.

Il-pjan direzzjonali għall-prontezza tad-difiża jsegwi l-Pjan ReArm Europe/Prontezza 2030, li jagħti lill-Istati Membri flessibbiltà finanzjarja akbar biex isaħħu l-produzzjoni u l-prontezza. Jippjana wkoll li sal-2027 jistabbilixxi żona ta’ mobbiltà militari fl-UE kollha, b’regoli armonizzati u network ta’ rotot fuq l-art, fl-ajru u fil-baħar biex it-truppi u t-tagħmir ikunu jistgħu jiċċaqalqu malajr madwar l-Ewropa. Din l-inizjattiva, li ġiet żviluppata b’koordinazzjoni mill-qrib man-NATO, se ttekkeb il-kapaċità tal-Ewropa li tirrispondi malajr għall-kriżijiet.