X’qed tagħmel l-UE
L-Unjoni Ewropea qed tiffaċċja xenarju kumpless ta’ sigurtà. Is-soċjetajiet miftuħa u l-avvanzi teknoloġiċi għamluha aktar faċli għat-terroristi, l-estremisti vjolenti u l-atturi tat-theddid li joperaw minn naħa għall-oħra tal-fruntieri, jisfruttaw id-disparitajiet soċjali u ekonomiċi, u jinnavigaw bejn id-dinja fiżika u dik diġitali.
Ħafna tipi ta’ kriminalità, inkluż it-traffikar tal-bnedmin, l-abbuż sesswali tat-tfal u t-traffikar tad-drogi, telgħu online jew huma ffaċilitati permezz ta’ mezzi diġitali. B’konsegwenza ta’ dan, il-biċċa l-kbira tal-investigazzjonijiet kriminali għandhom komponent diġitali.
Biex twieġeb għal dawn l-isfidi u trawwem soċjetajiet siguri, l-UE għamlet enfasi fuq il-ġlieda biex jingħelbu ċ-ċiberkriminalità, it-terroriżmu u r-radikalizzazzjoni, il-kriminalità organizzata, u l-kriminalità finanzjarja.
F’April 2025, il-Kummissjoni ppreżentat ProtectEU — l-Istrateġija Ewropea ta’ Sigurtà Interna, li tistabbilixxi l-objettivi u l-azzjonijiet għas-snin li ġejjin biex tiġi żgurata Ewropa aktar sikura u b'anqas perikli.
L-oqsma ta’ prijorità u l-azzjonijiet tal-Istrateġija ProtectEU jinkludu:
- Żieda fis-sensibilizzazzjoni dwar it-theddid biex jiġu antiċipati aħjar ir-riskji għas-sigurtà
- It-tisħiħ tal-kapaċitajiet tal-infurzar tal-liġi
- It-tiswir tar-reżiljenza kontra t-theddid ibridu
- Il-ġlieda kontra l-kriminalità serja u organizzata
- Il-ġlieda kontra t-terroriżmu
- Kontribut għas-sigurtà globali
Il-Kummissjoni tikkollabora mal-Istati Membri u l-aġenziji tal-UE biex tindirizza n-natura kumplessa u transfruntiera tal-kriminalità organizzata. Dan l-approċċ jiżgura li l-UE tibqa’ viġilanti, reżiljenti u mgħammra biex tipproteġi liċ-ċittadini tagħha f’dinja li qed tinbidel malajr.
Fatti dwar is-sigurtà interna
Oqsma ta’ azzjoni
Skopri kif l-UE qed tieħu azzjoni biex tiġġieled it-traffikar u tipproteġi l-ħajjiet
Il-ġlieda kontra t-traffikar tal-armi tan-nar u t-theddid il-ġdid tiegħu
Tgħallem kif l-UE qed tikkoordina l-ġlieda kontra t-traffikar tad-droga
Tgħallem kif l-UE twieġeb għal theddid kriminali inkluż il-finanzjament tat-terroriżmu
Skopri l-qafas legali tal-UE għall-protezzjoni tat-tfal u għall-prevenzjoni tal-abbuż sesswali tat-tfal
Inizjattiva li għandha l-għan li ssaħħaħ l-isforzi tal-UE kontra r-radikalizzazzjoni
Tgħallem kif l-UE qed tagħmel il-kooperazzjoni fl-infurzar tal-liġi aktar rapida, aktar sikura, u aktar effettiva
Skopri kif l-UE qed tindirizza ċ-ċiberkriminalità permezz tal-liġijiet, il-kooperazzjoni transfruntiera u l-finanzjament
Kif ir-riċerka dwar is-sigurtà tal-UE tgħin biex jinbnew l-għarfien u l-għodod meħtieġa ħalli jiġi indirizzat it-theddid emerġenti
Kisbiet ewlenin
- Fl-2024, il-kooperazzjoni transfruntiera fl-infurzar tal-liġi appoġġata mill-UE wasslet għall-identifikazzjoni ta’ 4,985 vittma tat-traffikar, 846 arrest ta’ traffikanti suspettati, it-tnedija ta’ 869 investigazzjoni u sekwestru ta’ EUR 4.6 miljun profitt kriminali.
- L-Alleanza Ewropea tal-Portijiet u s-sħubija pubblika-privata tagħha mnedija fl-2024, intensifikaw il-ġlieda kontra t-traffikar tad-droga, waħda mill-aktar theddidiet serji għas-sigurtà li qed tiffaċċja l-Ewropa llum.
- Minn Ġunju 2022, ir-Regolament dwar il-Kontenut Terroristiku Online jirrikjedi li l-pjattaformi online kollha li joffru s-servizzi tagħhom fl-UE jneħħu kontenut terroristiku fi żmien siegħa minn meta jiġu nnotifikati. Dan ir-rispons rapidu jgħin biex iċ-ċittadini jinżammu sikuri minn materjal illegali u tiġi evitata r-radikalizzazzjoni online, filwaqt li salvagwardji robusti jiżguraw li l-libertà tal-espressjoni u l-aċċess għall-informazzjoni jkunu protetti bis-sħiħ.
Taħt il-lenti
L-użu ħażin tat-teknoloġiji ġodda, li qiegħed dejjem jiżdied, qed jibdel il-mod kif isseħħ l-attività terroristika, bil-minorenni qed ikunu dejjem aktar fil-mira u qed jiġu radikalizzati online, filwaqt li l-iżviluppi ġeopolitiċi qed ikomplu jgħawru x-xenarju heddenti. Biex twieġeb għal dawn l-iżviluppi, il-Kummissjoni pproponiet sett ġdid ta’ miżuri għall-prevenzjoni u l-ġlieda kontra t-terroriżmu, bħala parti mill-istrateġija ta’ sigurtà interna ProtectEU. Il-mira ta’ dawn l-azzjonijiet hija li jissaħħaħ ir-rispons tal-Ewropa għat-theddid estremist vjolenti u terroristiku evolventi, inkluż l-antiċipazzjoni tat-theddid, il-prevenzjoni tar-radikalizzazzjoni, il-protezzjoni tan-nies fuq l-internet u fl-ambjenti fiżiċi, u t-titjib tar-risponsi għat-theddied u l-attakki.
Din il-paġna ġiet aġġornata l-aħħar: 28 Mejju 2026