Komunikazzjoni strateġika u l-ġlieda kontra l-manipulazzjoni tal-informazzjoni u l-indħil minn barranin

Ħarsa ġenerali

Id-demokrazija, l-istat tad-dritt u l-ħarsien tad-drittijiet fundamentali huma valuri fundaturi tal-Unjoni Ewropea. Dawn il-valuri huma komuni fost l-Istati Membri u huma l-pedamenti għal soċjetà li fiha jsaltnu l-pluraliżmu, in-nondiskriminazzjoni, it-tolleranza, il-ġustizzja, is-solidarjetà u l-ugwaljanza.

Iċ-ċittadini jistgħu jesprimu fehmiethom liberament u jiffurmaw l-opinjonijiet tagħhom. Jistgħu jipparteċipaw fil-ħajja demokratika, jagħżlu r-rappreżentanti politiċi tagħhom, u jsemmgħu leħinhom dwar il-ġejjieni tagħhom fi spazju pubbliku fejn jistgħu jesprimu fehmiet differenti u fejn id-diversità hi aċċettata

Il-manipulazzjoni tal-informazzjoni u l-indħil minn barranin huma theddida serja għal dan. Jistgħu jdgħajfu l-istituzzjonijiet u l-proċessi demokratiċi billi ma jħallux lin-nies jieħdu deċiżjonijiet infurmati jew jaqtgħulhom qalbhom biex jivvutaw. Jistgħu wkoll jifirdu lis-soċjetà billi jsaħħnu lill-komunitajiet kontra xulxin.

Bit-teknoloġiji l-ġodda, l-atturi ostili jistgħu joperaw u jxerrdu d-diżinformazzjoni b’mod estensiv u b’ħeffa li qatt ma rajna bħalhom qabel.

Għalhekk, l-indirizzar tal-manipulazzjoni tal-informazzjoni u l-indħil minn barranin, kif ukoll it-tisħiħ tar-reżiljenza tas-soċjetà kontra dan it-theddid, huma kwistjonijiet urġenti għall-Unjoni Ewropea u l-Istati Membri tagħha. 

^{Sors: L-Ewrobarometru Speċjali 568 “Il-protezzjoni u l-promozzjoni tad-demokrazija” - Novembru 2025}

Kif qed twieġeb il-Kummissjoni Ewropea?

Il-Kummissjoni qed issaħħaħ il-komunikazzjoni strateġika tagħha b’reazzjoni għall-manipulazzjoni tal-informazzjoni u l-indħil minn barranin li jkunu mmirati lejn il-politiki tal-UE.  

Bħala parti minn reazzjoni komprensiva, hu wkoll importanti li jiġu garantiti l-libertà u l-pluraliżmu tal-media, u jiġi żgurat li ċ-ċittadini jkollhom aċċess għal aħbarijiet u informazzjoni ta’ kwalità u affidabbli.

Ir-reazzjoni tal-Kummissjoni għall-manipulazzjoni tal-informazzjoni hi msejsa fuq:

• L-iżvilupp ta’ politiki li jsaħħu d-demokraziji Ewropej, li jipproteġu l-ġurnalisti u l-pluraliżmu tal-media, u li bihom l-awturi tat-theddid isibuha aktar diffiċli biex jużaw il-pjattaformi online ħażin jew jindaħlu fl-elezzjonijiet
• Iż-żieda fl-għarfien tas-sitwazzjoni permezz tal-monitoraġġ, l-identifikazzjoni u l-analiżi tal-informazzjoni minn sorsi miftuħa
• Il-ġlieda kontra l-manipulazzjoni tal-informazzjoni u l-indħil minn barranin permezz ta’ proġetti ta’ sensibilizzazzjoni, soluzzjonijiet teknoloġiċi avvanzati, u koordinazzjoni aħjar
• It-tisħiħ tar-reżiljenza soċjetali u tal-involviment taċ-ċittadini permezz tal-litteriżmu diġitali u medjatiku, u miżuri oħra
• Il-kooperazzjoni mal-istituzzjonijiet, l-awtoritajiet nazzjonali, il-verifikaturi tal-fatti, l-organizzazzjonijiet tas-soċjetà ċivili, id-dinja akkademika u organizzazzjonijiet oħra