Is-Suq Uniku

X’tagħmel l-UE

Is-suq uniku Ewropew hu wieħed mill-akbar kisbiet tal-UE. Bil-garanzija tal-moviment liberu tal-merkanzija, tal-kapital, tas-servizzi, u tax-xogħol u n-nies, dan iġġenera tkabbir ekonomiku u għamel il-ħajja ta’ kuljum tan-negozji u tal-konsumaturi Ewropej aktar faċli.

Dan hu maħsub biex joħloq żona ekonomika mingħajr fruntieri ħalli n-nies u n-negozji jkunu jistgħu joperaw liberament, trawwem it-tkabbir ekonomiku u tkun vantaġġuża għall-konsumaturi b’għażla akbar u bi prezzijiet orħos.

Is-suq uniku jinkludi s-27 Stat Membru tal-UE u lin-Norveġja, l-Iżlanda u l-Liechtenstein (permezz taż-Żona Ekonomika Ewropea).

Fatti dwar is-suq uniku

450 miljun

persuna (u konsumatur) fis-suq “domestiku” tal-Ewropa

26 miljun

negozju fis-suq uniku tal-Ewropa

€18-il triljun

Il-PDG tas-suq uniku tal-Ewropa, it-tieni l-akbar ekonomija fid-dinja

Oqsma ta’ azzjoni

Strateġija għas-suq uniku

Pjan biex is-suq uniku jsir aktar sempliċi, bla xkiel u b’saħħtu – naħtfu l-potenzjal kollu tiegħu għall-benefiċċju tan-nies u n-negozji

Suq uniku għall-oġġetti

Skopri kif l-UE qed tiffaċilita l-moviment liberu tal-merkanzija, filwaqt li tiżgura livell għoli tas-sikurezza u l-ħarsien tal-ambjent

Suq uniku għas-servizzi

Sir af kif l-UE qed tneħħi l-ostakli biex tgħin lin-negozji jipprovdu servizzi lil hinn mill-fruntieri

Simplifikazzjoni għas-suq uniku

Pjan ġdid biex jiġu ssimplifikati r-regoli tas-suq uniku u titnaqqas il-burokrazija

Unjoni tas-Swieq Kapitali

Insawru unjoni tas-swieq kapitali biex tgħin lin-negozji ż-żgħar u tagħmel l-Ewropa aktar attraenti għall-investituri

Is-suq uniku diġitali

Nibnu s-suq uniku diġitali, b’regoli komuni għat-telekomunikazzjoni, id-drittijiet tal-awtur, il-protezzjoni tad-data, u l-bqija

Kisbiet ewlenin

Għal aktar minn 30 sena, is-suq uniku għen biex jagħmel il-ħajja ta’ kuljum taċ-ċittadini u n-negozji aktar faċli, u fetaħ il-bibien biex l-oġġetti, is-servizzi, in-nies u l-flus jiċċaqalqu liberament madwar l-UE.
Bis-saħħa tas-suq uniku, iċ-ċittadini tal-UE jistgħu jistudjaw, jgħixu, jixtru, jaħdmu u jirtiraw fi kwalunkwe Stat Membru tal-UE u jgawdu prodotti mill-Ewropa kollha.
Il-kumpaniji jistgħu jwessgħ l-operazzjonijiet tagħhom, filwaqt li l-kompetizzjoni tgħin biex jorħsu l-prezzijiet u tiżdied l-għażla għall-konsumaturi.
Permezz tas-suq uniku, in-nies fl-UE jistgħu jgawdu prezzijiet orħos, aktar innovazzjoni u żvilupp teknoloġiku malajr, u standards ogħla tas-sikurezza u l-ħarsien ambjentali.
Is-suq uniku jixpruna l-PDG, jappoġġa miljuni ta’ impjiegi, u jgħin lill-UE tikkompeti fid-dinja billi tattira l-investiment u ssaħħaħ il-ktajjen tal-provvista.
Is-suq uniku żied il-PDG tal-UE bi 3-4% u ħoloq 3.6 miljun impjieg ġdid minn mindu ġie stabbilit fl-1993.

Taħt il-lenti

It-Tabella ta’ Valutazzjoni tas-Suq Uniku u l-Kompetittività

It-tabella ta’ valutazzjoni tkejjel il-prestazzjoni u l-eżiti tas-suq uniku f’oqsma ta’ politika u għodod differenti. Issegwi wkoll il-prestazzjoni tal-pajjiżi u tipprovdi data dettaljata dwar il-pajjiżi, informazzjoni dwar ċerti aspetti fosthom l-għodod tal-infurzar, il-kundizzjonijiet tan-negozju, u l-kompetittività.

Skopri aktar dwarha hawnhekk