Beart a dhéanamh ar son na cosanta chun muintir na hEorpa a chosaint

Aghaidh a thabhairt ar dhúshláin slándála agus cosanta

Sa chéad leath de 2025, mhol an Coimisiún roinnt príomhthionscnamh chun borradh a chur faoi ullmhacht agus infheistíocht cosanta na hEorpa:

• an páipéar bán maidir le cosaint na hEorpa – Ullmhacht 2030
• an plean ReArm Europe
• simpliú omnibus na hullmhachta cosanta

Tá na tograí sin ríthábhachtach chun aghaidh a thabhairt ar na dúshláin agus ar na bearnaí atá os comhair an Aontais ó thaobh na slándála agus na cosanta de. 

I mí Dheireadh Fómhair 2025, chuir an Coimisiún treochlár ullmhachta cosanta 2030 i láthair chun dul chun cinn a thomhas agus chun na chéad chéimeanna eile a phlé.

An mhí dár gcionn, agus mar a leagtar amach sa pháipéar bán, chuir sé pacáiste nua beart chun cinn chun feabhas a chur ar an tsoghluaisteacht mhíleata ar fud na hEorpa. Ag an am céanna, leag sé amach treochlár chun tionscal cosanta na hEorpa a athrú ó bhonn trí nuálaíocht shuaiteach a scaoileadh. 

Leis an bplean ReArm Europe / Ullmhacht 2030, cuirfear borradh faoin maoiniú cosanta trí níos mó solúbthachta airgeadais a chur ar fáil do thíortha an Aontais.

Bainfear é sin amach tríd an méid seo a leanas a dhéanamh: 

• clásal éalaithe náisiúnta an Chomhshocraithe Cobhsaíochta agus Fáis a ghníomhachtú, rud a chuirfidh ar chumas na mBallstát caiteachas cosanta a mhéadú. Le méadú 1.5% de OTI i mbuiséid chosanta, d’fhéadfaí beagnach €650 billiún a chruthú i spás fioscach thar thréimhse ceithre bliana.
• ionstraim iasachta €150 billiún a sheoladh – Ionstraim um Ghníomhaíocht Slándála don Eoraip (SAFE) – chun cuidiú le tíortha infheistíocht a dhéanamh i bpríomhréimsí cosanta amhail cosaint diúracán, ladrainn agus cibearshlándáil. Tiomsófar cistí ar mhargaí caipitil agus eisíocfar iad leis na Ballstáit leasmhara ar éileamh, bunaithe ar phleananna náisiúnta. Ghlac Comhairle an Aontais Eorpaigh SAFE i mí na Bealtaine 2025, agus spreagfaidh sé na Ballstáit caitheamh ar bhealach níos fearr, i dteannta a chéile agus san Eoraip.
• tacú le Grúpa an Bhainc Eorpaigh Infheistíochta a iasachtú a leathnú chuig tionscadail chosanta agus slándála agus dlús a chur leis an aontas coigiltis agus infheistíochta chun caipiteal príobháideach a shlógadh ionas nach mbeidh tionscal cosanta na hEorpa ag brath ar infheistíocht phoiblí amháin 

Beidh éifeachtaí dearfacha ar gheilleagar agus iomaíochas an Aontais ag baint le leas iomlán a bhaint as na huirlisí airgeadais sin. Cuimsítear leis sin monarchana nua agus línte táirgeachta nua a thógáil atá riachtanach chun poist mhaithe a chruthú san Eoraip.

An tsíocháin a chaomhnú – treochlár 2030 maidir le hullmhacht i réimse na cosanta

Is plean cuimsitheach é an treochlár um ullmhacht cosanta chun cumais chosanta na hEorpa a neartú. Leagtar amach ann cuspóirí soiléire agus garspriocanna nithiúla chun

• bearnaí cumais a dhúnadh
• dlús a chur le hinfheistíochtaí cosanta ar fud na mBallstát
• ullmhacht cosanta iomlán a bhaint amach faoi 2030 

Tionscnaimh shuaitheanta Eorpacha maidir le hUllmhacht

Moltar ceithre thionscnamh shuaitheanta sa treochlár

• an Tionscnamh Eorpach um Chosaint ar Dhróin
• Faireachán ar Chliathán Thoir na hEorpa
• an Aersciath Eorpach
• an Sciath Eorpach Spáis

Neartóidh siad sin cumas na hEorpa díspreagadh agus cosaint a dhéanamh ar fud na talún, an aeir, na farraige, na cibearshlándála agus an spáis agus, san am céanna, rannchuideoidh siad go díreach le spriocanna ECAT don chumas míleata.

Ullmhacht trí Chomhghuaillíochtaí Cumais

Chun ullmhacht iomlán i réimse na cosanta a bhaint amach, ní mór a chinntiú gur féidir le fórsaí armtha náisiúnta aon ghéarchéim a réamh-mheas, ullmhú di agus freagairt di, coinbhleacht ard-déine san áireamh. 

Iarrtar sa treochlár ar na Ballstáit na Comhghuaillíochtaí Cumais a thabhairt chun críche i naoi bpríomhréimse agus bearnaí criticiúla cumais a dhúnadh trí fhorbairt agus soláthar comhpháirteach. Is iad sin cosaint aeir agus diúracán; cumasóirí straitéiseacha; an tsoghluaisteacht mhíleata; córais airtléire; cibearchosaint, IS, agus cogaíocht leictreonach; diúracáin agus armlón; dróin agus frithdhróin; comhrac talún; agus cosaint mhuirí.

Bonn tionsclaíoch cosanta an Aontais a neartú 

Chun bearnaí cumais a dhúnadh, tá gá le tionscal cosanta láidir de chuid an Aontais a bheidh in ann an méid atá ag teastáil ó na Ballstáit a chur ar fáil ar an scála agus ar an luas is gá. 

Ba cheart leas iomlán a bhaint as an nuálaíocht ó thaobh na cosanta de, réitigh ón Úcráin san áireamh. Ba cheart athléimneacht na slabhraí soláthair cosanta a dhaingniú freisin, trí spleáchais chriticiúla i dtaca le hamhábhar a laghdú chomh maith le hionchuir chriticiúla eile.

Borradh a chur faoin infheistíocht i réimse na cosanta 

Faoi 2030, is é an sprioc atá ann margadh cosanta simplithe a chruthú san Aontas a mbeidh rialacha comhchoiteanna ag gabháil leis a chuirfidh ar chumas na tionsclaíochta táirgeadh níos tapúla agus ar scála níos mó a dhéanamh, rud a spreagfaidh an táirgeadh agus an nuálaíocht araon. Déanfaidh an Coimisiún an acmhainneacht thionsclaíoch a rianú – ag tosú le cosaint aeir agus diúracán, ladrainn agus córais spáis – chun a chinntiú gur féidir leis an Eoraip freastal ar riachtanais phráinneacha.

Leanann an treochlár maidir le hullmhacht i réimse na cosanta an plean ReArm Europe / Ullmhacht 2030, rud a thugann níos mó solúbthachta airgeadais chun an táirgeadh agus an ullmhacht a neartú. Leagtar amach ann freisin pleananna chun limistéar soghluaisteachta míleata uile-Aontais a bhunú faoi 2027, a mbeidh rialacha comhchuibhithe agus líonra bealaí talún, aeir agus farraige ag gabháil leis chun trúpaí agus trealamh a bhogadh go tapa ar fud na hEorpa. Déanfar an tionscnamh sin a fhorbairt i ndlúthchomhar le ECAT, rud a chuirfidh feabhas ar chumas na hEorpa freagairt go tapa do ghéarchéimeanna.