Clár Oibre 2030 maidir le Tomhaltóirí

Is é sin an comhthéacs ina bhfuil an Coimisiún Eorpach ag cur i láthair Chlár Oibre 2030 do Thomhaltóirí (‘an Clár Oibre’), creat nua straitéiseach le haghaidh bheartas tomhaltóirí an Aontais ina leagtar amach tosaíochtaí agus gníomhaíochtaí coincréiteach le haghaidh na 5 bliana amach romhainn. Cumhdaítear leis an gClár Oibre raon leathan gníomhaíochtaí a fhreagraíonn go díreach do na príomhdhúshláin agus a léiríonn cineál trasghearrtha an bheartais tomhaltóirí. Is é is aidhm dó cosaint tomhaltóirí a fheabhsú agus iomaíochas, cothroime shóisialta agus fás inbhuanaithe a chothú, go háirithe trí chur chun feidhme, cur i bhfeidhm agus forfheidhmiú comhsheasmhach agus éifeachtach rialacha an Aontais a neartú agus trí dhul i ngleic le dúshláin thábhachtacha amhail cothroime dhigiteach agus cosaint tomhaltóirí ar líne.  

Cuireann an Clár Oibre leis an méid a baineadh amach leis an gClár Oibre Nua do Thomhaltóirí a glacadh in 2020 agus leanann sé as an bplé fairsing a bhí ar siúl le páirtithe leasmhara. Tugtar aghaidh ann ar cheithre phríomhréimse tosaíochta:

• Plean gníomhaíochta do thomhaltóirí sa mhargadh aonair chun aghaidh a thabhairt ar bhacainní a chuireann cosc ar thomhaltóirí leas iomlán a bhaint as an Margaidh Aonair.
• Cothroime dhigiteach agus cosaint tomhaltóirí ar líne chun cosaint tomhaltóirí, go háirithe leanaí, a neartú sa timpeallacht dhigiteach.
• Tomhaltas inbhuanaithe chun a chinntiú go mbeidh rochtain ag tomhaltóirí ar tháirgí agus ar sheirbhísí inbhuanaithe agus chun cosaint níos fearr a thabhairt dóibh ar an nglas-snasú.
• Forfheidhmiú agus sásamh éifeachtach chun tomhaltóirí a chosaint ar ghníomhaithe margaidh nach n-urramaíonn na rialacha agus a chosnaíonn gnólachtaí comhlíontacha ar iomaíocht éagórach.

Is tosaíochtaí uileghabhálacha a bhaineann le gach réimse den Chlár Oibre iad cosaint tomhaltóirí i staideanna leochaileacha agus simpliú agus laghdú ualaigh. Beidh comhar gníomhach idirnáisiúnta mar bhonn taca leis na gníomhaíochtaí a leagtar amach sa Chlár Oibre agus cuirfidh siad le creat rialachais cuimsitheach trédhearcach dinimiciúil.

Chun tacú leis an tionscnamh sin, reáchtáil an Coimisiún comhairliúchán oscailte poiblí ar fud an Aontais le linn na tréimhse Bealtaine-Lúnasa 2025. Thug an comhairliúchán poiblí léargas luachmhar a chuidigh le bunú Chlár Oibre 2030 do Thomhaltóirí, agus féadfar féachaint ar thorthaí an chomhairliúcháin sa tuarascáil achoimre.