Approċċ komuni għall-miżuri tal-ivvjaġġar fl-UE

Approċċ komuni għall-miżuri tal-ivvjaġġar oqsma prinċipali

Fil-25 ta’ Jannar 2022, il-Kunsill adotta rakkomandazzjoni riveduta dwar l-iffaċilitar tal-moviment sikur u liberu fl-UE matul il-pandemija tal-COVID-19. Dan il-ftehim isegwi l-proposta tal-Kummissjoni tal-25 ta’ Novembru 2021.

Skont ir-rakkomandazzjoni aġġornata, jenħtieġ li l-miżuri tal-COVID-19 jiġu applikati abbażi tas-sitwazzjoni individwali tal-persuni u mhux aktar fuq ir-reġjun ta’ oriġini, bl-eċċezzjoni ta’ żoni fejn il-virus qed jiċċirkola f’livelli għoljin ħafna. Dan ifisser li l-istatus tat-tilqim, tat-test jew tal-fejqan ta’ vjaġġatur b’rabta mal-COVID-19, ippruvat minn Ċertifikat COVID Diġitali tal-UE, għandu jkun il-fattur determinanti ewlieni. Din ir-rakkomandazzjoni twieġeb għaż-żieda sinifikanti fit-teħid tal-vaċċini u l-introduzzjoni rapida taċ-Ċertifikat COVID Diġitali tal-UE, u tissostitwixxi r-rakkomandazzjoni li kienet teżisti qabel.

F’konformità mar-regoli l-ġodda, l-Istati Membri tal-UE jridu jaċċettaw ċertifikati tat-tilqim għal perjodu ta’ 270 jum (9 xhur) mit-tlestija tas-serje primarja tat-tilqim:

• Għal vaċċin b’żewġ dożi, dan ifisser 270 jum mit-tieni doża jew, f’konformità mal-istrateġija nazzjonali tat-tilqim, l-ewwel u l-unika doża wara li jkunu rkupraw mill-COVID-19.
• Għal vaċċin b’doża waħda, dan ifisser 270 jum wara l-ewwel u l-unika doża.

Il-pajjiżi tal-UE m’għandhomx jipprevedu perjodu ta’ aċċettazzjoni differenti għall-finijiet tal-ivvjaġġar fl-Unjoni Ewropea. Il-perjodu ta’ aċċettazzjoni standard ma japplikax għaċ-ċertifikati għal dożi booster.

Mill-1 ta’ Frar 2022, ġew implimentati wkoll regoli ġodda rigward il-kodifikazzjoni tad-dożi booster fiċ-Ċertifikat. Kif diġà ġie ċċarat f’Diċembru, il-boosters se jiġu rreġistrati bħala:

• 3/3 għal doża booster wara sensiela ta’ tilqim primarju ta’ żewġ dożi
• 2/1 għal doża booster wara tilqim b’doża waħda, jew doża waħda minn vaċċin ta’ żewġ dożi amministrata lil persuna li fieqet.

Iċ-ċertifikati li nħarġu b’mod differenti qabel dik il-kjarifika jeħtieġ li jiġu kkoreġuti u maħruġa mill-ġdid, biex jiġi żgurat li l-boosters ikunu jistgħu jiġu distinti mill-istatus tat-tilqim sħiħ.

Din ir-rakkomandazzjoni daħlet fis-seħħ fl-1 ta’ Frar 2022.

Fit-3 ta’ Frar, il-Kummissjoni Ewropea pproponiet li testendi s-sistema taċ-Ċertifikat COVID Diġitali tal-UE b’sena, sat-30 ta’ Ġunju 2023.

Aqra aktar f’din l-iskeda informattiva

Approċċ ibbażat fuq il-persuni

Jeħtieġ li l-vjaġġaturi li jkollhom Ċertifikat COVID diġitali tal-UE validu, fil-biċċa l-kbira tal-każijiet, ma jkunux soġġetti għal restrizzjonijiet addizzjonali għall-moviment liberu.

Ċertifikat COVID Diġitali tal-UE validu jinkludi:

• Ċertifikat tat-tilqim għal vaċċin approvat fil-livell Ewropew li għalih ikunu għaddew mill-anqas 14-il jum u mhux aktar minn 270 jum mill-aħħar doża tas-serje ta’ tilqim primarju. Iċ-ċertifikati tat-tilqim għal dożi booster huma validi immedjatament u mingħajr validità massima, f’dan l-istadju. Il-pajjiżi tal-UE jistgħu jaċċettaw ukoll ċertifikati tat-tilqim għall-vaċċini approvati mill-awtoritajiet nazzjonali jew mid-WHO.
• Riżultat negattiv tat-test tal-PCR miksub mhux aktar minn 72 siegħa qabel l-ivvjaġġar jew test rapidu negattiv tal-antiġeni miksub mhux aktar minn 24 siegħa qabel l-ivvjaġġar.
• Ċertifikat tal-fejqan li jindika li ma jkunux għaddew aktar minn 180 jum mid-data tal-ewwel riżultat pożittiv tat-test.

Persuni li ma jkollhomx Ċertifikat COVID Diġitali tal-UE għandhom jintalbu jagħmlu test qabel jew mhux aktar tard minn 24 siegħa wara l-wasla.

Il-vjaġġaturi b’funzjoni jew bi ħtieġa essenzjali, il-vjaġġaturi transfruntieri u t-tfal taħt it-12-il sena m'għandhomx ikunu meħtieġa li jkunu fil-pussess ta’ Ċertifikat COVID Diġitali tal-UE validu.

Mappa tar-reġjuni tal-UE

Iċ-Ċentru Ewropew għall-Prevenzjoni u l-Kontroll tal-Mard (ECDC) se jkompli jippubblika mappa tar-reġjuni tal-Istati Membri skont sistema tad-dawl tat-traffiku (aħdar, oranġjo, aħmar, aħmar skur). Il-mappa se tkun ibbażata fuq ir-rata ta’ notifika tal-każijiet ta’ 14-il jum, ir-rata tat-teħid tal-vaċċin u r-rata tal-ittestjar.

Il-mappa tad-dawl tat-traffiku sservi prinċipalment bħala għodda ta’ informazzjoni, iżda wkoll biex tikkoordina miżuri għal żoni b’ċirkolazzjoni partikolarment għolja tal-virus. Abbażi ta’ din il-mappa, il-pajjiżi tal-UE għandhom japplikaw miżuri rigward l-ivvjaġġar lejn żoni ħomor skuri u minnhom, fejn il-virus qed jiċċirkola f’livelli għoljin ħafna. Dawn għandhom jiskoraġġixxu l-ivvjaġġar mhux essenzjali u jirrikjedu li l-persuni li jaslu minn dawk iż-żoni li ma jkollhomx fil-pussess tagħhom ċertifikat tat-tilqim jew tal-fejqan jagħmlu test qabel it-tluq u jagħmlu kwarantina wara l-wasla.

Hemm bżonn li jiġu applikati ċerti eċċezzjonijiet għal dawn il-miżuri għal vjaġġaturi b’funzjoni jew ħtieġa essenzjali, vjaġġaturi transfruntieri u tfal taħt l-età ta’ 12-il sena.

Brejk ta’ emerġenza

Meta Stat Membru jimponi restrizzjonijiet b’reazzjoni għall-emerġenza ta’ varjant ġdid, il-Kunsill, f’kooperazzjoni mill-qrib mal-Kummissjoni u appoġġjat mill-ECDC, għandu jirrevedi s-sitwazzjoni. Il-Kummissjoni, abbażi tal-valutazzjoni regolari ta’ evidenza ġdida dwar il-varjanti, tista’ tissuġġerixxi wkoll diskussjoni fil-Kunsill. Miżuri simili huma possibbli wkoll f’każ li s-sitwazzjoni epidemjoloġika fi Stat Membru jew f’żona fi Stat Membru tmur għall-agħar malajr.

Matul id-diskussjoni, il-Kummissjoni tista’ tipproponi li l-Kunsill jaqbel dwar approċċ koordinat rigward l-ivvjaġġar mill-oqsma kkonċernati. Kwalunkwe sitwazzjoni li tirriżulta fl-adozzjoni ta’ miżuri għandha tiġi riveduta regolarment.

Formola komuni ta’ lokalizzazzjoni tal-passiġġieri u protezzjoni tad-data

Il-formoli tal-lokalizzazzjoni tal-passiġġieri għandhom rwol ewlieni biex jiżguraw it-traċċar effettiv tal-kuntatti tal-vjaġġaturi. L-iskambji tad-data bejn l-awtoritajiet tat-traċċar tal-kuntatti tal-Istati Membri jista’ jkun partikolarment importanti meta l-passiġġieri jkunu qed jaqsmu l-fruntieri qrib xulxin, bħal fl-ajruplani jew fil-ferroviji. Sabiex l-Istati Membri jiskambjaw data rilevanti dwar il-passiġġieri bejn il-fruntieri, il-Kummissjoni adottat żewġ atti ta’ implimentazzjoni f’Mejju u f'Lulju 2021, u b’hekk ipprovdiet il-kundizzjonijiet legali meħtieġa għall-ipproċessar ta’ tali data personali u tistabbilixxi pjattaforma ta’ skambju ta’ formoli tal-lokalizzazzjoni tal-passiġġieri. Biex tappoġġja d-diġitalizzazzjoni u l-armonizzazzjoni tal-formoli tal-lokalizzazzjoni tal-passiġġieri, l-Azzjoni Konġunta EU Healthy Gateways żviluppat applikazzjoni web għal Formola tal-Lokalizzazzjoni Diġitali tal-Passiġġieri tal-UE. Il-formoli diġitali tal-lokalizzazzjoni tal-passiġġieri flimkien mal-pjattaforma ta’ skambju tal-formola tal-lokalizzazzjoni tal-passiġġieri jippermettu ġbir u skambju ta’ data aktar faċli u aktar rapidi bejn l-Istati Membri, u b’hekk it-traċċar tal-kuntatti jsir aktar effettiv u effiċjenti.