Negħlbu l-pandemija
Wara aktar minn 3 snin, fil-5 ta’ Mejju 2023, l-Organizzazzjoni Dinjija tas-Saħħa ddikkjarat li l-COVID-19 m’għadhiex emerġenza tas-saħħa globali.
Il-pandemija tal-COVID-19 kellha impatt qawwi fuq in-nies, is-soċjetà tagħna, u l-ekonomija tagħna, iżda rnexxielna negħlbuha bis-saħħa tal-kooperazzjoni, id-determinazzjoni, ir-reżistenza, ix-xjenza u l-innovazzjoni tagħna. Is-solidarjetà Ewropea, fil-kondiviżjoni tal-provvisti mediċi, fit-trattament tal-pazjenti, fl-għajnuna għar-ripatrijazzjoni taċ-ċittadini maqbuda barra pajjiżhom, u fl-irkupru tal-ekonomiji tagħna, għenitna nipproteġu liċ-ċittadini u lin-negozji tagħna, u negħlbu l-pandemija. Dan għen lill-UE ssaħħaħ ir-reżiljenza tagħha u tavvanza fit-tranżizzjonijiet ġusti mil-lat ekoloġiku u diġitali
Azzjoni deċiżiva mill-UE
L-azzjoni deċiżiva li ttieħdet mill-2020, taħt l-Istrateġija tal-UE għall-Vaċċini, tat ir-riżultati. Aktar minn 80% tal-popolazzjoni tal-UE ġiet imlaqqma totalment kontra l-COVID-19. Il-Kummissjoni Ewropea s’issa żgurat sa 4.2 biljun doża ta’ vaċċini kontra l-COVID-19, għaċ-ċittadini Ewropej u biex tgħin lill-pajjiżi mhux tal-UE.
L-ekonomija Ewropea rpiljat u dan kien possibbli minħabba l-implimentazzjoni rapida tal-vaċċini u l-miżuri ta’ stimolu ekonomiku bla preċedent li ġew stabbiliti fil-livell tal-UE u dak nazzjonali. L-azzjoni immedjata tal-Kummissjoni għenet biex jittaffa l-impatt ekonomiku tal-pandemija. Il-baġit pluriennali tal-UE flimkien man-NextGenerationEU, strument ta’ rkupru temporanju ta’ aktar minn €800 biljun biex jgħin fit-tiswija tal-ħsara ekonomika u soċjali immedjata kkawżata mill-pandemija tal-COVID-19, kienu strumentali fl-irkupru u t-tisħiħ tar-reżiljenza tal-UE.
Mit-tifqigħa tal-COVID-19 fil-bidu tal-2020, l-UE mmobilizzat €53.7 biljun b’appoġġ għal aktar minn 140 pajjiż sieħeb f’approċċ ta’ Tim Ewropa, biex tindirizza l-ħtiġijiet relatati mal-pandemija u l-konsegwenzi tagħha. L-appoġġ jgħaqqad ir-riżorsi mill-UE, l-Istati Membri tagħha, il-Bank Ewropew tal-Investiment, u l-Bank Ewropew għar-Rikostruzzjoni u l-Iżvilupp.
Barra minn hekk, minn kmieni, l-UE stinkat biex tiggarantixxi aċċess ekwu għal vaċċini kontra l-COVID-19 affordabbli, sikuri u effettivi għal kulħadd, billi organizzat ir-Rispons Globali għall-Coronavirus u appoġġjat il-COVAX, inizjattiva globali mmirata lejn aċċess ekwu għall-vaċċini kontra l-COVID-19. Il-Kummissjoni, l-Istati Membri u l-Bank Ewropew tal-Investiment saru investitur ewlieni fil-COVAX, b’aktar minn €5 biljun biex jagħmlu disponibbli 1.8 biljun doża ta’ vaċċini għal 92 pajjiż b’introjtu baxx u medju.
L-UE appoġġjat ukoll, f’approċċ ta’ Tim Ewropa, l-iżvilupp tal-kapaċità lokali tal-manifattura tal-vaċċini fl-Afrika, fl-Amerka Latina u fil-Karibew.
Punti ewlenin tar-rispons għall-coronavirus Kronoloġija tal-azzjoni tal-UE
