Cleachtais mhíthreoracha díolacháin ar líne nochtaithe le seiceáil de chuid an Aontais

Fuair an Coimisiún Eorpach agus na húdaráis cosanta tomhaltóirí amach go raibh roinnt lascainí ar líne le linn dhíolachán na hAoine Duibhe agus an Chibir-Luain míthreorach, a bhuí leis an scuab-imscrúdú is déanaí. 

Is éard is scuab-imscrúduithe ann scagthástálacha a dhéanann an Coimisiún Eorpach a chomhordú agus is iad na húdaráis forfheidhmithe náisiúnta a thugann i gcrích iad go comhuaineach. Ghlac údaráis ó 23 Bhallstát, chomh maith leis an Íoslainn agus an Iorua, páirt sa scuab-imscrúdú seo. Ba é an cuspóir a bhí ann measúnú a dhéanamh ar cé acu a chomhlíonann nó nach gcomhlíonann lascainí agus cleachtais phraghsála le linn mórtheagmhais díolacháin dlí tomhaltóirí an Aontais. 

Príomhthorthaí

• as 314 thrádálaí ar líne a seiceáladh, rinne 30% tagairt mhícheart do lascainí. Ní mór lascainí a bheith bunaithe ar an bpraghas is ísle a cuireadh i bhfeidhm le 30 lá anuas.
• Rinne 36% de thrádálaithe iarracht earraí roghnacha a chur le ciseáin tomhaltóirí. Astu sin, rinne 40% acu amhlaidh gan toiliú a iarraidh go soiléir.
• Thaispeáin 34% de thrádálaithe comparáidí praghsanna, ach níor mhínigh 60% acu go soiléir cén áit as ar tháinig na praghsanna tagartha.
• Bhain 18% acu úsáid as teicnící brúdhíola, amhail a mhaíomh go bhfuil táirge beagnach díolta amach nó úsáid a bhaint as amadóirí comhaireamh síos. Bhí níos mó ná leath de na cásanna sin míthreorach, mar shampla, nuair a bhí an maíomh maidir le ganntanas bréagach.
• D’úsáid 10% acu ‘praghsáil beagán ar bheagán’, i gcás ina gcuirtear táillí breise leis go déanach sa phróiseas ceannaigh, cuir i gcás táillí loingseoireachta nó seirbhíse.

Is cleachtais neamhdhleathacha faoi dhlí tomhaltóirí an Aontais iad earraí a chur isteach gan toiliú an tomhaltóra, praghsanna a thaispeáint ar bhealach míthreorach, a mhaíomh go bréagach go bhfuil táirge beagnach díolta amach, nó táillí breise a cheilt go dtí deireadh an phróisis. Tar éis an scuab-imscrúdaithe, féadfaidh údaráis náisiúnta tomhaltóirí beart a dhéanamh i gcoinne na ngnólachtaí lena mbaineann.

Cuireann an Gréasán um Chomhar ar mhaithe le Cosaint Tomhaltóirí dlíthe cosanta tomhaltóirí an Aontais i bhfeidhm. Oibríonn siad le chéile faoi chomhordú an Choimisiúin Eorpaigh chun aghaidh a thabhairt ar sháruithe ar dhlí na dtomhaltóirí ar an Margadh Aonair. Ní mór do thrádálaithe an Treoir maidir le Praghsanna a Chur in Iúl i ndáil le laghduithe ar phraghsanna agus an Treoir maidir le Cleachtais Tráchtála Éagóracha i ndáil le cleachtais phraghsála a chomhlíonadh. 

Tomhaltóirí a bhfuil fadhbanna acu le trádálaí, bíonn roghanna éagsúla acu i dtaca le sásamh a fháil – ó chabhair a fháil ó sheirbhís um réiteach malartach díospóidí nó teagmháil a dhéanamh le Líonra na Lárionad Eorpach do Thomhaltóirí (ECC-Net) go caingean dlí fhoirmiúil a thionscnamh.

Tuilleadh eolais

Preaseisiúint

Scuab-imscrúduithe roimhe seo

An Eoraip Agatsa – Cearta tomhaltóirí