Nipproteġuk meta tixtri online

Nagħmlu x-xiri online iktar sikur

L-ambjent online jagħmilha iktar faċli minn qatt qabel biex tixtri, tqabbel il-prodotti, issib l-aqwa offerti u taċċessa s-servizzi madwar l-UE u lil hinn minnha. 

Iżda biż-żieda fix-xiri online, ir-riskji għall-konsumaturi żdiedu wkoll — minn prodotti mhux sikuri għal prattiki qarrieqa.

L-UE għandha regoli fis-seħħ biex tipproteġik, filwaqt li tiżgura li x-xiri online jseħħ f’ambjent sikur, affidabbli u trasparenti. Mill-pjattaformi li tixtri fuqhom, għall-prodotti li tixtri, sad-drittijiet li int intitolat għalihom.

Pariri dwar is-sigurtà għax-xiri online

X’għandek tagħmel qabel ma tixtri
agħmel riċerka fuq il-bejjiegħ, inkluż billi tivverifika l-informazzjoni ta’ kuntatt tiegħu
ara l-indirizz tas-sit web b’seba’ għajnejn — oqgħod attent għal xi żbalji ortografiċi, għall-HTTPS u għas-simbolu tal-lukkett🔒 fl-istrixxa tal-indirizz tal-brawżer tiegħek
oqgħod iktar attent meta jkun hemm offerti li jidhru tajbin wisq biex ikunu veri
aqra r-reċensjonijiet dwar il-prodott filwaqt li żżomm f’moħħok li mhux ir-reċensjonijiet kollha huma ġenwini. Fittex feedback speċifiku iktar milli tifħir ġeneriku u qabbel ir-reċensjonijiet f’diversi pjattaformi affidabbli
aqra l-politika tar-ritorn u tar-rifużjoni qabel ma tixtri
Meta tħallas, oqgħod attent
uża metodi ta’ pagament siguri li joffru protezzjoni kontra l-frodi u riżoluzzjoni tat-tilwim
evita trasferimenti lil bejjiegħa mhux magħrufa
tibgħatx id-dettalji tal-pagament bl-email jew bl-apps tal-messaġġi
attiva l-awtentikazzjoni b’żewġ fatturi fil-kontijiet tax-xiri u tal-pagament tiegħek
...u anke wara li tixtri, ara li timmonitorja r-rendikonti bankarji tiegħek regolarment

Nibnu suq diġitali affidabbli

Qerq online. Prodotti mhux sikuri. Prattiki kummerċjali żleali. Kontenut illegali. Abbonamenti li jidhru li ma jistgħux jiġu kkanċellati. Ir-riskji huma reali meta tixtri online. L-UE għandha firxa wiesgħa ta’ miżuri fis-seħħ biex tindirizza dawn it-theddidiet u biex tagħmel l-esperjenza tal-konsumatur online waħda sikura u affidabbli.

🧴 Prodotti sikuri u ta’ kwalità

Il-prodotti kollha mibjugħa fl-UE — online jew f’ħanut fiżiku — iridu jikkonformaw mar-regoli dwar is-sikurezza tal-prodotti.
Jekk jinstab li xi prodott diġà mibjugħ joħloq xi riskju għas-sikurezza, l-awtorità rilevanti toħroġ sejħa lura tal-prodott. Din tista’ tinkludi wkoll li l-awtoritajiet nazzjonali jieħdu miżuri biex jirtiraw prodott mis-suq.

📲 Pjattaformi responsabbli

Il-pjattaformi jridu jkunu mgħammra għall-ġlieda kontra l-prodotti illegali fuq is-siti web tagħhom. Meta jsiru jafu bl-elenkar illegali, huma meħtieġa jieħdu azzjoni fir-rigward tagħhom.
Il-kummerċjanti online jridu jipprovdu funzjoni obbligatorja ta’ rtirar online — spiss imsejħa “buttuna tal-irtirar” — li tiżgura li l-kanċellazzjoni tal-kuntratti tkun faċli daqs l-abbonament.

🛒 Trasparenza kullimkien

Is-swieq iridu jivverifikaw u juru d-dettalji ta’ kuntatt tal-bejjiegħa, inkluż l-isem, l-indirizz, u mod kif tilħaqhom, sabiex ikollok informazzjoni ċara dwar mingħand min qed tixtri oġġetti jew servizzi. Huma għandhom jindikaw jekk intix qed tixtri mingħand bejjiegħ privat jew professjonali, minħabba li d-drittijiet tiegħek bħala konsumatur jinbidlu skont mingħand min tkun qed tixtri.
Is-swieq iridu jipprovdu informazzjoni ċara dwar il-prodott jew is-servizz li qed tixtri, il-prezz tiegħu, il-kostijiet tat-trasport u tal-konsenja kif ukoll dwar drittijietek meta l-affarijiet imorru ħażin.
L-elenkar irid jissodisfa r-rekwiżiti għar-reklamar, inkluż li tkun disponibbli informazzjoni dwar min qed jagħmel ir-reklami u għaliex qed tarah.

Drittijietek wara x-xiri

Drittijiet ġenerali tal-konsumatur
garanzija legali minima ta’ sentejn għall-oġġetti kollha. Skont xi tkun il-problema, jaf tkun intitolat għal tiswija jew sostituzzjoni ta’ oġġett, tnaqqis fil-prezz, jew saħansitra rifużjoni sħiħa. Dan japplika għall-oġġetti użati kif ukoll jekk tixtri mingħand bejjiegħ professjonali
għal ċerti prodotti li ma għadhomx koperti mill-garanzija legali, dritt għall-konsumaturi li jitolbu lill-manifatturi jsewwu l-prodotti li teknikament jistgħu jissewwew skont id-dritt tal-UE
Tordna online speċifikament
id-dritt li tikkanċella u tirritorna ordni għal prodott jew servizz (bħal abbonament) fi żmien 14-il jum, mingħajr l-ebda ġustifikazzjoni
drittijiet tal-konsenja bħal ħinijiet garantiti tal-konsenja u protezzjoni kontra l-ħsara u t-telf
il-prattiki ta’ bejgħ aggressivi, bħall-ħolqien ta’ sens falz ta’ urġenza huma pprojbiti

Inti vittma ta’ qerq?

Hemm ħafna tipi differenti ta’ qerq online. Minn emails ta’ phishing għal siti web foloz, ħafna qerq idur mal-flus. Jekk taħseb li kont fil-mira, hemm ftit passi li tista’ tieħu biex tevita iktar tħassib.

Ikkuntattja l-bank tiegħek
Tista’ titlob li tiffriża l-kards tiegħek jew għal ċaħda tad-debitu.
Ipproteġi l-kontijiet tiegħek
Jekk tuża l-istess password fuq diversi kontijiet, mhuwiex biss il-kont li safa vittma tal-qerq li jista’ jiġi affettwat, għaldaqstant ipproteġihom kollha.
Rapportar
Tista’ tirrapporta l-qerq lill-awtoritajiet rilevanti f’pajjiżek.

Sir af lil xi sieħeb jew sieħba online: aħsibha darbtejn qabel ma tressaq lejn il-lemin

Xi qerq saħansitra juża r-romantiċiżmu bħala pretest. Jinbnew rabtiet emozzjonali qabel ma jitolbu l-flus, id-dettalji personali jew pjaċiri. Kun lest li tħobb iżda qabel ma tressaq lejn il-lemin, dejjem aħsibha darbtejn.

Skopri l-pariri

Għodod u servizzi tal-UE għal xiri online sikur

Referenzi u riżorsi

L-Att dwar is-Servizzi Diġitali

Id-drittijiet tal-konsumaturi fl-UE – L-Ewropa Tiegħek

In-Network taċ-Ċentri Ewropej tal-Konsumaturi

Din il-paġna ġiet aġġornata l-aħħar: 16 Lulju 2026