Do mheabhairshláinte a chosaint

Tá tábhacht le do mheabhairshláinte

A bhuí lenar saol ar líne, is iomaí deis a bhíonn ann chun nascadh le chéile, foghlaim agus dul i dteagmháil le daoine eile. Mar sin féin, is féidir le húsáid throm na meán sóisialta agus an iomarca am scáileáin neamhbheartaithe dochar a dhéanamh don mheabhairshláinte agus don tsláinte choirp.

Tá algartaim na meán sóisialta ceaptha chun rannpháirteachas an úsáideora a uasmhéadú. Spreagann gnéithe dearaidh, cuir i gcás scrolláil gan teorainn, uathsheinm agus brúfhógraí, úsáideoirí le níos mó ama a chaitheamh ar an ardán. Is féidir leis sin an dearcadh atá ag daoine ar chúrsaí an tsaoil a chúngú, cur leis an strus agus an imní, agus polarú sóisialta a dhoimhniú.

Cuidíonn dlíthe agus tionscnaimh de chuid an Aontais chun gnéithe diúltacha dár saol ar líne a laghdú. Ar an mbealach sin is féidir leat leanúint de thairbhe a bhaint as teicneolaíochtaí digiteacha nua, as cluichí agus as na meáin, agus d’fholláine mheabhrach á caomhnú san am céanna.

Leideanna chun cothromaíocht dhigiteach níos sláintiúla a bhaint amach

Cuir teorainn leis an am a chaitheann tú os comhair scáileáin
Déan iarracht sosanna beaga a thógáil ón scáileán le linn an lae. Is féidir le sos gearr fiú cuidiú chun an strus a laghdú agus chun d'aird a dhíriú ar bhealach níos fearr. 
Bainistigh na fógraí a fhaigheann tú
Cas as na foláirimh neamhriachtanacha. Nuair nach gcuirtear isteach ort chomh minic sin, is féidir leis a bheith níos éasca d'aird a dhíriú agus ní bhíonn sé ar nós go bhfuil tú ‘ar glao-dhualgas’ i gcónaí.
Cosain do chodladh
Seachain scáileáin a bhfuil an iomarca spreagtha ag baint leo sula dtéann tú a chodladh. 
Bainistigh do spás digiteach
Aon chuntas a chuireann imní nó brú ort, nó a chuireann isteach ort, déan é a dhíleanúint. Lean foinsí agus ábhar iontaofa ar spéis leat iad.
Déan do mhachnamh féin sula gcomhroinneann tú ábhar
Glac nóiméad sula bpostálann tú eolas pearsanta nó sula nglacann tú páirt i bplé teasaí. Is féidir leat an strus a laghdú ach sin a dhéanamh i dtús báire.
Lorg cuidiú go luath
Má tá eispéiris ar líne ag déanamh difear don spion atá ort, do do chodladh, do chaidrimh nó do shaol laethúil, labhair le duine a bhfuil muinín agat as nó lorg tacaíocht ghairmiúil mheabhairshláinte.

An chaoi a gcosnaíonn an tAontas d’fholláine dhigiteach

📖 Eolas faoi algartaim

Ní mór d’ardáin mínithe soiléire sothuigthe a chur ar fáil ina sonraítear go beacht an fáth a bhfuil ábhar áirithe á mholadh duit ag a n-algartam.

⚠️ Ábhar neamhdhleathach ar líne a thuairisciú

Tá sé de cheart agat ábhar neamhdhleathach agus díobhálach ar na hardáin a úsáideann tú a thuairisciú.

∞ Aghaidh a thabhairt ar dhearadh andúile

Is féidir leat fothaí neamhphearsanta a roghnú ar ardáin mhóra chun ábhar a d’fhéadfadh a bheith ‘andúileach’ a laghdú.

👁️ An chibearbhulaíocht a chomhrac

Tá leanaí á gcosaint san Aontas le rolladh amach an aip uile-Aontais, lenar féidir le híospartaigh na bulaíochta ar líne cuidiú a aimsiú go héasca. Tá Ionaid um Idirlíon Níos Sábháilte curtha ar bun ag an Aontas freisin ar fud na hEorpa, agus cabhraíonn siad le leanaí a choinneáil sábháilte ar líne.

📲 Do scileanna digiteacha a fheabhsú

Tacú le d’fholláine trí do scileanna digiteacha a fhorbairt, ionas go mbeidh tú in ann:

eolas míthreorach nó bréageolas a aithint
rioscaí ar líne a bhainistiú
agus teicneolaíochtaí digiteacha a úsáid go críonna

👧 Leanaí agus daoine óga a chosaint

Ní mór d’ardáin leanaí agus daoine óga a úsáideann a gcuid seirbhísí a chosaint, agus é sin a dhéanamh tríd an riosca go nochtfaí iad d’ábhar mar shampla cearrbhachas nó pornagrafaíocht a laghdú.

🛑 Cosc a chur ar fhógraí atá spriocdhírithe ar leanaí

Cinntíonn dlíthe an Aontais go gcuirtear cosc iomlán ar fhógraí atá spriocdhírithe ar leanaí.

🪪 Smacht a thabhairt duit ar do shonraí pearsanta

A bhuí le rialacha an Aontais maidir le cosaint sonraí, tá smacht agat ar an gcaoi a n-úsáidtear do shonraí pearsanta. Is féidir leat rochtain a iarraidh ar na sonraí pearsanta atá ag cuideachta nó eagraíocht fút; a iarraidh orthu iad a cheartú, agus más gá, a iarraidh orthu iad a scriosadh (‘an ceart go ndéanfaí ligean i ndearmad’).

🚫 Cosaint ar fhoréigean ar líne

Cuidíonn rialacha an Aontais linn muid féin a chosaint ar gach cineál foréigin ar líne, ó chiapadh ar líne agus stalcaireacht go comhroinnt grianghraf gan chead. Ó thaobh an dlí de, ní mór do thíortha an Aontais pionós a ghearradh ar chionta mar shampla an chibearsplancáil agus mí-úsáid ghnéasach íomhábhunaithe agus ní mór d’ardáin dhigiteacha mhóra íomhánna neamhdhleathacha neamhthoiliúla nó ábhar cúbláilte a bhaint go tapa.

An mbaineann na nithe seo leat?

Bíonn sé deacair ort éirí as na meáin shóisialta nó aipeanna teachtaireachtaí
Bíonn tú faoi strus mar gheall ar fhógraí leanúnacha agus an iomarca eolais
Bíonn fadhbanna codlata agat toisc go mbíonn scáileáin in úsáid agat go mall san oíche
Cuireann tú do shaol féin i gcomparáid le saol daoine eile ar líne an t-am ar fad
Bíonn tú trí chéile tar éis ábhar díobhálach, ábhar míthreorach nó ábhar a chuireann isteach ort a fheiceáil
Bíonn tú uaigneach agus scoite amach in ainneoin go bhfuil tú nasctha i gcónaí