Is féidir leis an teicneolaíocht dhigiteach cabhrú le leanaí foghlaim faoin domhan, nascadh leis agus eolas a chur air. Ach más tuismitheoir nó cúramóir thú, ní mór duit na rioscaí a thuiscint freisin chun gur féidir leat cabhrú le do leanbh a bhealach a dhéanamh sa domhan ar líne go sábháilte.
Tá ardáin an lae inniu an-andúileach agus dearadh iad chun leanaí a shú isteach a fhad agus is féidir. Scrolláil gan teorainn, físeáin ghearra, agus fothaí an-phearsantaithe, i ngeall orthu sin ar fad, tá sé éasca cuntas a chailleadh ar an am. Dá mhéad ama a chaitheann leanaí ar líne, is ea is mó an riosca go nochtfar iad d’ábhar díobhálach nó neamhdhleathach agus do chreachadóirí ar líne.
Tá an tAontas ag obair chun an t-idirlíon a dhéanamh níos sábháilte do leanaí agus iad a chumhachtú ag an am céanna chun tairbhe a bhaint as uirlisí agus deiseanna digiteacha.
Trí labhairt le do leanaí faoi rioscaí ar líne a sheachaint, is féidir iad a chumhachtú agus cuidiú leo leas iomlán a bhaint as an saol digiteach. Le céimeanna simplí agus praiticiúla, is féidir leis na comhráite sin a bheith níos éasca agus níos éifeachtaí do theaghlaigh.
Conas do chearta a éileamh agus cabhair a iarraidh
Conas is féidir liom mo leanbh a chosaint ar ábhar foréigneach nó gáirsiúil ar líne?
Is féidir le céimeanna praiticiúla cuidiú le nochtadh do linbh d’ábhar díobhálach a laghdú, mar atá socruithe láidre príobháideachais a úsáid, ardáin atá oiriúnach ó thaobh aoise de a roghnú, agus eispéiris níos sábháilte ar líne a spreagadh. Tá moltaí níos mionsonraithe le fáil i dtreoirlínte an Choimisiúin maidir le mionaoisigh a chosaint.
Cén chaoi ar féidir liom iompar contúirteach ar líne a thuairisciú?
Is féidir le foirne saineolaithe i líonra na nIonad um Idirlíon Níos Sábháilte ar fud na hEorpa labhairt faoi rud ar bith atá ag déanamh imní díot, mar atá comhéigean gnéis, cibearbhulaíocht agus ábhar foréigneach. Faigh amach conas is féidir leat teagmháil a dhéanamh leo ar shuíomh gréasáin Idirlíon Níos Fearr do Leanaí.
Cén chaoi ar féidir liom mionaoisigh a mhúineadh chun a bpríobháideachas, a bpasfhocail agus a sonraí pearsanta a chosaint?
Is féidir leat teacht ar acmhainní agus físeáin oideachasúla éagsúla a chuidíonn leatsa agus le do leanbh bhur mbealach a dhéanamh go sábháilte ar an domhan ar líne ar shuíomh gréasáin Idirlíon Níos Fearr do Leanaí.
Cén chaoi ar féidir liom ábhar neamhdhleathach ar líne a thuairisciú?
Ceanglaíonn an tAontas ar ardáin bearta a chur i bhfeidhm chun cur i gcoinne scaipeadh earraí, seirbhísí nó ábhair neamhdhleathacha ar líne. Is féidir leat ábhar neamhdhleathach a thuairisciú go díreach ar na hardáin trí shásra atá éasca le húsáid.
An chaoi a gcosnaíonn an tAontas do leanaí ar líne
Faoi rialacha an Aontais, ceanglaítear ar ardáin ar líne bearta breise a dhéanamh chun leanaí a choinneáil slán sábháilte. Ciallaíonn sé sin níos lú moltaí díobhálacha, uirlisí níos fearr chun mí-úsáid nó ábhar baolach a thuairisciú, agus roghanna níos soiléire chun smacht a fháil ar an méid a fheiceann do leanbh ar líne.
In 2026 chuir Uachtarán an Choimisiúin Eorpaigh, Ursula von der Leyen, painéal speisialta saineolaithe ar bun le cuidiú chun cur chuige Eorpach láidir praiticiúil a fhorbairt i leith leanaí a choinneáil sábháilteacht ar líne.
Féach leat obair an phainéil →
Uirlisí agus cosaintí praiticiúla
Tacaíonn an tAontas leat freisin le huirlisí agus cosaintí praiticiúla le cuidiú chun do leanbh a choinneáil sábháilte ar líne, chun a bpríobháideachas a chosaint, agus chun a chinntiú go mbeidh eispéiris dhigiteacha atá oiriúnach ó thaobh aoise de acu.
📱Cuidiú le do leanbh nósanna sláintiúla scáileáin a fhorbairt
Tacaíonn an feachtas maidir le ham scáileáin sláintiúil leat gnáthaimh a leagan síos, an iomarca am scáileáin a laghdú, agus meabhairshláinte agus folláine do linbh ar líne a fheabhsú.
🪪 Cinntiú go n-úsáideann do leanbh aipeanna agus suíomhanna atá oiriúnach ó thaobh aoise de
Cuirfidh tíortha an Aontais aip nua fíorúcháin aoise i bhfeidhm go luath chun aois ar líne a dheimhniú gan sonraí pearsanta nach bhfuil gá leo a chomhroinnt. Fágfaidh sé sin go mbeidh sé níos éasca rochtain a fháil ar ábhar atá oiriúnach ó thaobh aoise de agus cuideoidh sí le cosc a chur ar leanaí rochtain a fháil ar sheirbhísí nach bhfuil oiriúnach dóibh.
👧 Sonraí pearsanta do linbh a choinneáil sábháilte ar líne
Is féidir leat teorainn a chur leis an gcaoi a mbailíonn agus a n-úsáideann aipeanna sonraí do linbh. Ní mór do sheirbhísí ar líne a mhíniú go soiléir cad iad na sonraí a bhailíonn siad agus is féidir leat a iarraidh go mbainfí iad. Ní mór do leanaí a bheith 16 bliana d’aois ar a laghad (nó 13 bliana d’aois i roinnt tíortha) chun toiliú lena gcuid sonraí pearsanta a chomhroinnt.
⚠️ Mí-úsáid ghnéasach leanaí ar líne a chosc
Chuir an tAontas córais níos láidre i bhfeidhm chun ábhar mí-úsáide gnéasaí leanaí a bhrath, a bhaint agus a thuairisciú níos tapúla. Cuidíonn sé sin le nochtadh d’ábhar díobhálach a laghdú agus feabhsaíonn sé comhar idir ardáin agus údaráis chun leanaí a choinneáil níos sábháilte.
🛡️ Deireadh a chur leis an gcibearbhulaíocht
Is féidir leis an gcibearbhulaíocht tarlú trí theachtaireachtaí bagracha, glaonna, ríomhphoist, comhráite, nó trí ghrianghraif nó físeáin náireacha a chomhroinnt ar na meáin shóisialta, ar fhóraim nó áit ar bith ar líne. Tugann tionscnamh an Aontais chun deireadh a chur leis an gcibearbhulaíocht na huirlisí is gá duit chun í a chosc, a thuairisciú agus deireadh a chur léi.
▶️ Físeáin agus seirbhísí sruthaithe níos sábháilte do leanaí
Tá cosaint níos fearr ag do leanbh ar fhoréigean, ar fhuathchaint agus ar ábhar míchuí nuair a úsáideann siad ardáin sruthaithe.
📢 Fógraíocht chothrom do leanaí
Tá leanaí an-leochaileach i leith cleachtais mhargaíochta fhadhbacha. Cuidíonn rialacha cosanta tomhaltóirí le fógraíocht fholaithe, patrúin dhorcha agus spriocdhíriú éagórach ar leanaí a laghdú. Cosnaítear do leanbh ar fhógraí míthreoracha agus ar dhearaí ionramhála a d’fhéadfadh brú a chur orthu ábhar a cheannach nó idirghníomhú leo, agus cuireann bearta breise cosc ar fhógraíocht spriocdhírithe atá dírithe ar mhionaoisigh.
🧠 Rialacha maidir le IS a shocrú
Le rialacha an Aontais, cuirtear cosc ar chórais lena ndéantar ionramháil ar dhaoine leochaileacha nó lena gcuirtear dallamullóg orthu, leanaí san áireamh, agus rialaítear domhainbhrionnuithe a lipéadú chun meabhlaireacht a chosc.
💡 Litearthacht dhigiteach a chothú agus dul i ngleic leis an mbréagaisnéis
D’fhoilsigh an tAontas leideanna praiticiúla is féidir leat a úsáid chun tacú le litearthacht dhigiteach agus smaointeoireacht chriticiúil leanaí. Cuidíonn siad leat leanaí a mhúineadh faoin gcibearbhulaíocht, faoin mbréagaisnéis, faoin intleacht shaorga, faoi ábhar meabhlach, agus faoi rioscaí digiteacha eile.
An litearthacht dhigiteach agus treoirlínte maidir le dul i ngleic leis an mbréagaisnéis
Nuashonraíodh an leathanach seo den uair dheireanach an 17 Meitheamh 2026