Spjegazzjoni tar-regoli l-ġodda tal-UE dwar it-trasparenza fil-pagi

Kont qed tapplika għall-impjiegi u ffrustrajt ruħek li ma kontx taf x’kienet il-paga? Għaddejt minn diversi ċikli ta’ intervisti, lestejt testijiet, ippreparajt dokumenti, u investejt ħin u enerġija sinifikanti, biex issir taf biss fl-aħħar li s-salarju kien ferm inqas mill-aspettattivi tiegħek? Jew irrealizzajt wara snin ta’ xogħol fir-rwol tiegħek li l-kollega tiegħek qed jirċievi salarju ogħla għall-istess xogħol? L-UE qed tbiddel dan kollu!

Regoli ġodda tal-UE dwar it-trasparenza fil-pagi issa qed jidħlu fis-seħħ madwar l-UE. Dawn se jżidu t-trasparenza fil-pagi, isaħħu l-infurzar tal-prinċipju ta’ paga ugwali bejn in-nisa u l-irġiel, u jtejbu l-aċċess għall-ġustizzja għall-vittmi ta’ diskriminazzjoni fil-pagi. 

Fil-prattika, dan ifisser li min jimpjega se jkollu

• jinforma lil dawk li jkunu qed ifittxu x-xogħol dwar is-salarju tal-bidu jew il-firxa tal-paga fl-avviż ta’ pożizzjoni vakanti jew qabel l-intervista, u ma jibqgħux jitħallew jistaqsuhom dwar l-istorja tal-paga tagħhom
• jipprovdi lill-impjegati, meta dawn jistaqsu, b’informazzjoni dwar il-livell tal-paga individwali tagħhom u l-livelli tal-paga medja, imqassma skont is-sess, għal kategoriji ta’ ħaddiema li jagħmlu l-istess xogħol jew xogħol ta’ valur ugwali
• jippubblika informazzjoni dwar id-differenza fil-pagi bejn il-ħaddiema nisa u rġiel (impjegaturi b’mill-inqas 100 impjegat)
• iwettaq valutazzjoni tal-pagi jekk ir-rapporti dwar il-pagi jiżvelaw differenza bejn il-ġeneri fil-pagi ta’ mill-inqas 5 % li ma tistax tiġi ġġustifikata 

Ir-regoli l-ġodda jtejbu wkoll l-aċċess għall-ġustizzja għall-vittmi ta’ diskriminazzjoni fil-pagi

• il-ħaddiema li sofrew diskriminazzjoni bejn il-ġeneri fil-pagi jistgħu jirċievu kumpens
• l-impjegaturi li ma jissodisfawx l-obbligi ta’ trasparenza se jkollhom jagħtu prova li ma kien hemm l-ebda diskriminazzjoni fil-pagi
• il-pajjiżi tal-UE għandhom jistabbilixxu penali għall-ksur tar-regola dwar il-paga ugwali
• il-korpi tal-ugwaljanza u r-rappreżentanti tal-ħaddiema jistgħu jirrappreżentaw lill-ħaddiema fi proċedimenti legali jew amministrattivi 

Id-dritt għal paga ugwali bejn in-nisa u l-irġiel għal xogħol ugwali jew xogħol ta’ valur ugwali kien wieħed mill-prinċipji fundaturi tal-Unjoni Ewropea mit-Trattat ta’ Ruma fl-1957. Bħalissa, id-differenza bejn il-pagi tal-irġiel u n-nisa fl-UE hija ta’ 11.1 %. Biex tgħin fit-tnaqqis ta’ din id-differenza u tavvanza l-ugwaljanza bejn il-ġeneri, il-Kummissjoni pproponiet id-Direttiva dwar it-trasparenza fil-pagi, li ġiet adottata fl-2023.

Għal iktar informazzjoni

Il-Kummissjoni tilqa’ l-ftehim politiku dwar regoli ġodda tal-UE għat-trasparenza fil-pagi

Azzjoni tal-UE għall-pagi ndaqs