Le straitéis nua leabaítear an comhionannas inscne i ngach gné den saol

Baineann an comhionannas inscne linn go léir, agus téann sé chun tairbhe do chách. Cé go bhfuil dul chun cinn déanta, tógfaidh sé 50 bliain, ar luas reatha an athraithe, ar an Aontas Eorpach comhionannas inscne iomlán a bhaint amach. Tá éagothromaíochtaí fós ann i measc thíortha an Aontais freisin. 

Roimh Lá Idirnáisiúnta na mBan an 8 Márta, tá a straitéis um chomhionannas inscne do 2026-2030 curtha i láthair ag an gCoimisiún Eorpach. Leis an straitéis sin leabaítear an comhionannas inscne i ngach gné den saol, ar líne agus as líne araon. 

Leis an straitéis nua déantar gníomhartha nithiúla de spriocanna Treochlár an Choimisiúin um Chearta na mBan, rud a d’fhormheas gach tír den Aontas in 2025, chun mná agus cailíní a chumasú, fir agus buachaillí a tharraingt isteach, cur go láidir i gcoinne aon chéimeanna siar i dtaca le cearta bunúsacha, agus dlús a chur leis an dul chun cinn i dtreo comhionannas inscne a bhaint amach mar is ceart san Eoraip. 

Is iad seo a leanas na príomhréimsí gníomhaíochta a ghabhann léi: 

• Leanúint den chomhrac i gcoinne an fhoréigin inscnebhunaithe agus béim á leagan ar an gcibearfhoréigean a chomhrac, a mbíonn tionchar díréireach aige ar mhná agus ar chailíní, le bearta chun domhainbhrionnuithe agus domhainbhrionnuithe gnéasacha a chomhrac agus chun feabhas a chur ar chosaint na mban ar líne.
• Fir agus buachaillí a tharraingt isteach sa chomhrac ar son an chomhionannais inscne, agus aitheantas á thabhairt don ról tábhachtach atá acu maidir le hathrú sochaíoch a bhaint amach, ag díriú ar conas ionramháil ar fhaisnéis agus bréagaisnéis a chomhrac chun polarú méadaitheach idir mná agus fir a sheachaint, go háirithe i measc daoine óga.
• Na caighdeáin is airde de chórais sláinte agus cúraim sláinte atá tógtha do chách a chur chun cinn trí thionscnamh a chur san áireamh i gcomhar leis an Eagraíocht Dhomhanda Sláinte chun cáilíocht agus inrochtaineacht chúram sláinte na mban a fheabhsú.
• Borradh a chur faoin rathúnas trí chomhionannas inscne a chur chun cinn ar fud na n-earnálacha eacnamaíocha le gníomhaíochtaí chun níos mó ban a mhealladh chuig gnólachtaí nuathionscanta agus gairmeacha taighde agus nuálaíochta, chomh maith le gairmeacha eolaíochta, teicneolaíochta, innealtóireachta agus matamaitice (ETIM) agus fir a spreagadh chun staidéar agus obair a dhéanamh i réimse na sláinte, an oideachais, an riaracháin agus na litearthachta.
• Dul i ngleic leis na bearnaí pá agus pinsin idir na hinscní, ina measc sin trí thacú leis na tíortha den Aontas an Treoir maidir le Trédhearcacht Pá a chur i bhfeidhm go hiomlán agus go héifeachtach, agus oibriú leis an mBanc Eorpach Infheistíochta chun rochtain ar mhaoiniú a fheabhsú d’fhiontraithe ban agus borradh a chur faoi ionadaíocht na mban san earnáil airgeadais.
• Bearta breise a dhéanamh chun tacú le rannpháirtíocht chomhionann agus shábháilte na mban sa pholaitíocht, lena gcumhdaítear trí dhul i ngleic le hionramháil ar fhaisnéis agus cur isteach ar líne, rud a spreagann polarú idir mná agus fir go minic.
• Leanúint den chomhionannas inscne a chur chun cinn ar an leibhéal domhanda le plean nua gníomhaíochta inscne do 2028-2034, chomh maith le plean gníomhaíochta nua do mhná, don tsíocháin agus don tslándáil. Seolfaidh an tAontas tionscnamh suaitheanta tiomnaithe nua dar teideal ‘SHIELD’ freisin lena ndíreofar ar fheabhas a chur ar an rochtain ar shláinte ghnéis agus atáirgthe agus ar thacú le marthanóirí foréigin inscnebhunaithe. 

Tá an Coimisiún Eorpach tiomanta i gcónaí sochaí chothrom chomhionann a chruthú, lena gcinnteofar go mbainfear comhionannas inscne amach ar gach leibhéal. 

Tuilleadh eolais 

An Straitéis maidir le Comhionannas Inscne 

Treochlár um Chearta na mBan 

Tacú le daoine, ár sochaithe agus ár samhail shóisialta a neartú 

Ceisteanna agus Freagraí faoin straitéis um chomhionannas inscne 2026-2030 

Bileog eolais 

Preaseisiúint: Straitéis nua um Chomhionannas Inscne 2026-2030 curtha i láthair ag an gCoimisiún ar mhaithe le hEoraip níos cothroime, níos comhtháite agus níos rathúla