Miżuri finanzjarji u tas-servizz tan-negozju

Miżuri mmirati lejn is-settur bankarju Russu

Meta nkunu qed innaqqsu l-aċċess tar-Russja għas-swieq kapitali tal-UE, inkunu qed inżidu l-ispejjeż tas-self u tat-tranżazzjonijiet għall-entitajiet sanzjonati u nnaqqru gradwalment il-bażi industrijali tar-Russja.

Il-miżuri jinkludu

• projbizzjoni fuq kwalunkwe forma ta’ self lil ċerti banek Russi u lill-Gvern Russu (inkluż il-Bank Ċentrali) u tax-xiri ta’ titoli maħruġin minnhom
• projbizzjoni fuq it-tranżazzjonijiet kollha ma’ ċerti intrapriżi tal-Istat Russu f’setturi differenti, jiġifieri mal-kumpless militari-industrijali tal-Kremlin
• projbizzjoni tal-esportazzjoni ta’ karti tal-flus u tal-bejgħ ta’ titoli trasferibbli fil-muniti uffiċjali kollha tal-UE
• projbizzjoni tal-klassifikazzjoni tar-Russja u tal-kumpaniji Russi minn aġenziji tal-klassifikazzjoni tal-kreditu tal-UE u tal-forniment ta’ servizzi ta’ klassifikazzjoni lill-klijenti Russi
• projbizzjoni tal-forniment ta’ servizzi ta’ kriptoassi ta’ valur għoli lir-Russja u tal-kartieri kollha tal-kriptoassi, irrispettivament mill-ammont
• projbizzjoni tas-servizzi tan-negozju, direttament jew indirettament, bħal kontabilità, awditjar, awditjar statutorju, żamma tal-kotba u servizzi ta’ konsulenza dwar it-taxxa, konsulenza tal-IT, konsulenza legali, servizzi tal-arkitettura u tal-inġinerija, konsulenza maniġerjali, relazzjonijiet pubbliċi, riċerka tas-suq u stħarriġ tal-opinjoni pubblika, ittestjar u analiżi tekniċi, reklamar, u servizzi ta’ klassifikazzjoni
• projbizzjoni tal-provvediment ta’ pariri lir-Russi għonja rigward l-ippjanar finanzjarju u t-trusts u l-projbizzjoni tad-depożiti kbar tagħhom fil-banek tal-UE
• projbizzjoni liċ-ċittadini Russi minn korpi governattivi fl-infrastruttura kritika tal-Istati Membri
• projbizzjoni tat-tranżazzjonijiet ma’ banek u fornituri tal-kriptoassi fir-Russja u f’pajjiżi terzi li jappoġġjaw il-bażi industrijali tad-difiża tar-Russja
• projbizzjoni tat-tranżazzjonijiet ma’ banek u fornituri tal-kriptoassi li jipparteċipaw fiċ-ċirkomvenzjoni tal-Limitu Massimu tal-Prezzijiet taż-Żejt billi jiffaċilitaw tranżazzjonijiet mal-bastimenti elenkati tal-flotta mistura tar-Russja
• projbizzjoni tat-tranżazzjonijiet ma’ banek ta’ pajjiżi terzi u fornituri tal-kriptoassi li jgħinu fiċ-ċirkomvenzjoni tas-sanzjonijiet, jappoġġaw il-gwerra ta’ aggressjoni tar-Russja kontra l-Ukrajna, jew huma konnessi mas-servizz ta’ messaġġi finanzjarji tar-Russja
• projbizzjoni tat-tranżazzjonijiet permezz ta’ kriptovaluti, inklużi stablecoins, u skambji offshore li jintużaw biex jiġu evitati s-sanzjonijiet.
• projbizzjoni tal-forniment ta’ ċertu software bankarju lill-Gvern Russu u lill-kumpaniji Russi
• projbizzjoni fuq l-użu tas-sistema Russa tal-kards tal-pagament u tal-pagament rapidu (Mir u SBP). 

L-UE imponiet iffriżar tal-assi u projbizzjonijiet ta’ finanzjament fuq numru ta’ banek Russi u qed timblokka r-riżervi tal-kambju miżmuma mill-UE mir-Russja billi

• eskludiet il-banek Russi ewlenin mis-sistema SWIFT, is-sistema dominanti ta’ messaġġi finanzjarji fid-dinja – din il-miżura twaqqaf lil dawn il-banek milli jwettqu t-tranżazzjonijiet finanzjarji tagħhom madwar id-dinja b’mod rapidu u effiċjenti
• il-projbizzjoni tal-banek tal-UE barra mir-Russja milli jużaw is-sistema ta’ messaġġi finanzjarji SPFS, li hi l-ekwivalenti Russu ta’ SWIFT
• il-projbizzjoni ta’ banek ta’ pajjiżi terzi mhux Russi konnessi mal-SPFS milli jagħmlu negozju mal-operaturi tal-UE
• il-projbizzjoni tal-investiment fi proġetti kofinanzjati mill-Fond Russu għall-Investiment Dirett (RDIF)
• il-projbizzjoni ta’ ditti tal-UE milli jinvolvu ruħhom ma’ kwalunkwe persuna ġuridika, entità jew korp li fih l-RDIF ikollu kwalunkwe sjieda jew investiment

Miżuri għall-protezzjoni tas-settur finanzjarju tal-UE

Ir-Russja qed tuża miżuri ta’ litigazzjoni u ritaljazzjoni biex tissekwestra l-assi tad-Depożitorji Ċentrali tat-Titoli (CSDs) tal-UE. Biex tindirizza dan, l-UE introduċiet:

• Deroga li tippermetti lis-CSDs tal-UE jitolbu lill-awtoritajiet kompetenti tal-Istati Membri biex ma jiffriżawx il-bilanċi tal-flus kontanti u jużawhom biex jissodisfaw l-obbligi legali tagħhom mal-klijenti tagħhom
• Klawżola ta’ nuqqas ta’ responsabbiltà għas-CSDs tal-UE, jiġifieri s-CSDs tal-UE mhumiex responsabbli jħallsu l-imgħax jew kwalunkwe forma oħra ta’ kumpens lill-Bank Ċentrali tar-Russja, lil hinn mill-imgħax dovut kuntrattwalment

Miżuri għall-protezzjoni tal-kumpaniji tal-UE

Il-miżuri jinkludu 

• il-projbizzjoni fl-UE tar-rikonoxximent jew l-infurzar ta’ xi deċiżjonijiet speċifiċi maħruġa mill-qrati Russi li jagħtu kompetenza obbligatorja esklużiva lill-qrati Russi f’tilwim bejn kumpaniji Russi u tal-UE. Dan jipproteġi lill-kumpaniji tal-UE mir-rikonoxximent tad-danni mressqa illegalment kontrihom fir-Russja 
• l-introduzzjoni ta’ derogi li jippermettu lill-kumpaniji tal-UE jċedu mir-Russja