Din l-informazzjoni hi disponibbli wkoll: bl-Ukren | українська | bir-Russu | русский
Sospensjoni tal-Ftehim tal-UE għall-Faċilitazzjoni tal-Viża mar-Russja
Fid-9 ta’ Settembru 2022, il-Kunsill qabel li jissospendi bis-sħiħ il-Ftehim tal-UE għall-Faċilitazzjoni tal-Viża mar-Russja. Is-sospensjoni sħiħa taffettwa l-kategoriji kollha ta’ vjaġġaturi li jiġu fl-UE għal soġġorn qasir. Dan ifisser li:
- iċ-ċittadini Russi m’għadhomx igawdu minn aċċess privileġġat għall-UE u jiffaċċjaw proċess ta’ applikazzjoni itwal, aktar għali u aktar diffiċli biex jakkwistaw viża
- l-Istati Membri għandhom diskrezzjoni wiesgħa fl-ipproċessar tal-applikazzjonijiet għal viża għal soġġorn qasir minn ċittadini Russi, u jistgħu jiżguraw skrutinju akbar taċ-ċittadini Russi li jixtiequ jivvjaġġaw lejn l-UE
- l-UE se tibqa’ miftuħa għal ċerti kategoriji ta’ applikanti Russi għal viża li jivvjaġġaw għal skopijiet essenzjali, inklużi membri tal-familja ta’ ċittadini tal-UE, ġurnalisti, dissidenti u rappreżentanti tas-soċjetà ċivili
- id-dokumenti tal-ivvjaġġar Russi maħruġin f’reġjuni okkupati mir-Russja fl-Ukrajna jew f’territorji separatisti fil-Georgia jew lil persuni residenti fihom mhumiex aċċettati bħala dokumenti tal-ivvjaġġar validi għall-kisba ta’ viża jew għall-qsim tal-fruntieri taż-żona Schengen
Regoli aktar stretti dwar il-viżi għaċ-ċittadini Russi
F’Novembru 2025, il-Kummissjoni adottat regoli aktar stretti dwar il-viżi għaċ-ċittadini Russi, fid-dawl taż-żieda fir-riskji għas-sigurtà li jirriżultaw mill-gwerra ta’ aggressjoni tar-Russja kontra l-Ukrajna, inkluż l-użu tal-migrazzjoni bħala arma, atti ta’ sabotaġġ u użu ħażin potenzjali tal-viżi.
Wara din id-deċiżjoni, iċ-ċittadini Russi ma għadhomx jistgħu jirċievu viżi għal dħul multiplu. Dan ifisser li ċ-ċittadini Russi se jkollhom japplikaw għal viża ġdida kull darba li jippjanaw li jivvjaġġaw lejn l-UE, li jippermetti skrutinju mill-qrib u frekwenti tal-applikanti biex jittaffa kwalunkwe riskju potenzjali għas-sigurtà.
Din il-paġna ġiet rieżaminata l-aħħar: 23 April 2026