Ewropa b’saħħitha f’dinja volatili

Matul is-sena li għaddiet, l-Ewropa żammet sod f’dinja fejn qed iseħħu dejjem aktar bidliet. Quddiem it-theddid dejjem akbar għas-sigurtà, id-dipendenzi ekonomiċi użati bħala arma u l-konsegwenzi tal-kunflitti lil hinn mill-fruntieri tagħna, l-Ewropa kompliet tavvanza flimkien billi:

iffirmat ftehimiet kummerċjali ġodda ewlenin fi tliet kontinenti
kompliet bl-appoġġ sod tagħna għall-Ukrajna
ħolqot sħubijiet ġodda li jiksbu l-interessi u l-valuri tal-Ewropa
żammet il-pożizzjoni tagħha quddiem nett fid-dinja fi kwistjonijiet li jinfirxu mill-azzjoni klimatika sas-saħħa madwar id-dinja

L-Ewropa wriet li hemm triq oħra possibbli: waħda li tgħaqqad is-saħħa mas-sħubija u l-indipendenza mal-ftuħ.

Is-saħħa fid-diversità – l-aġenda tal-Ewropa dwar il-kummerċ

Il-prosperità Ewropea tiddependi fuq il-kummerċ internazzjonali. Huwa għalhekk li l-Ewropa ħarset ‘l barra pjuttost milli ‘l ġewwa din l-aħħar sena biex tiddiversifika s-sħubijiet tagħha, issaħħaħ il-ktajjen tal-provvista u tnaqqas id-dipendenzi ekonomiċi. L-Ewropa kkonsolidat ukoll il-pożizzjoni tagħha bħala sieħeb fdat fit-tul, u offriet reżiljenza u prevedibbiltà fi żminijiet inċerti.

Pajjiżi li ffirmaw ftehimiet kummerċjali mal-UE

L-UE diġà għandha 45 ftehim kummerċjali li jkopru 81 pajjiż. B’dawn il-ftehimiet, madwar 712,000 negozju jiffrankaw ammont li huwa stmat li jilħaq EUR 25 biljun, f’dazji doganali fis-sena, meta jesportaw ‘l barra mill-UE.

Din is-sena, l-UE ffirmat jew ikkonkludiet negozjati dwar ftehimiet kummerċjali ġodda ma’:

Għamilna wkoll progress mas-sħab minn:

It-Tajlandja
Il-Malażja
Il-Filippini
L-Emirati Għarab Magħquda

L-involviment ma’ raggruppamenti reġjonali usa’ bħas-Sħubija Trans-Paċifika qed ikabbar ukoll l-impronta tal-Ewropa f’xi wħud mis-swieq tad-dinja li qed jikbru bl-aktar rata mgħaġġla.

Ir-relazzjonijiet kummerċjali bejn l-UE u l-Istati Uniti

Ir-relazzjoni kummerċjali trans-Atlantika tibqa’ l-aktar relazzjoni kummerċjali importanti fid-dinja. EUR 4.9 biljun f’oġġetti u servizzi kuljum jaqsmu l-Atlantiku bejn l-UE u l-Istati Uniti. L-Ewropa tkompli taħdem biex tiżgura relazzjoni stabbli li tipproteġi l-interessi tan-negozji u tal-ħaddiema Ewropej. Qed ukoll taħdem mill-qrib ukoll mal-Istati Uniti u ma’ sħab oħra fuq l-inizjattiva Pax Silica biex issaħħaħ il-koordinazzjoni tal-ktajjen tal-provvista kritiċi tal-IA, is-semikondutturi u t-teknoloġiji avvanzati.

It-tisħiħ tas-sigurtà ekonomika tagħna

Il-kummerċ, l-investiment u l-aċċess għal riżorsi kritiċi qed jintużaw dejjem aktar bħala għodod ġeopolitiċi. L-Ewropa wieġbet billi bniet sett komprensiv ta’ għodod biex tindirizza prattiki kummerċjali inġusti, investimenti ostili, koerċizzjoni ekonomika, distorsjoni tas-suq u kapaċità żejda globali. F’Diċembru 2025, il-Kummissjoni adottat komunikazzjoni dwar it-tisħiħ tas-sigurtà ekonomika tal-Ewropa. B’din, l-UE qed turi li hija lesta tuża dawn l-istrumenti meta l-industriji, il-ħaddiema u s-sigurtà ekonomika tagħha jkunu mhedda. 

Verżjoni testwali

Materja Prima Kritika u RESourceEU

Aċċess sigur u affidabbli għall-materja prima li teħtieġ l-ekonomija tagħna

34 materjal iddikjarat bħala materja prima kritika; eż. il-gallju, il-ġermanju, il-manganiż u l-grafit naturali.
47 proġett strateġiku fl-UE u 13 barra mill-UE magħżulin għal appoġġ immirat skont l-Att dwar il-Materja Prima Kritika.
Ftehimiet ma’ pajjiżi terzi għal aċċess aktar sigur għall-materja prima, inkluż l-ewwel Sħubija għal Kummerċ u Investiment Nadif mal-Afrika t’Isfel u l-ftehim kummerċjali mal-Awstralja.
Issa, pjan ta’ azzjoni RESourceEU biex titnaqqas id-dipendenza għall-batteriji, il-materjali tal-art rari u l-materja prima tad-difiża b’sa 50 % sal-2029.
Mobilizzati EUR 3 biljun fuq perjodu ta’ sena biex jappoġġaw proġetti strateġiċi.
It-twaqqif ta’ Ċentru għall-Materja Prima Kritika biex jippromwovi d-diversifikazzjoni u r-reżiljenza tal-ktajjen tal-valur.

Pajjiżi li ffirmaw ftehimiet diġitali mal-UE

B’aktar minn 60 % tal-PDG globali marbut mat-tranżazzjonijiet diġitali, l-Ewropa qed tespandi s-sħubijiet kummerċjali diġitali tagħha. Fi Frar, daħal fis-seħħ il-Ftehim dwar il-Kummerċ Diġitali tal-UE ma’ Singapore, filwaqt li f’Ġunju ġie ffirmat ftehim simili mar-Repubblika tal-Korea u f’Marzu bdew in-negozjati mal-Kanada. Intlaħaq ftehim separat mal-Brażil biex jiġu żgurati flussi sikuri ta’ data bejnietna.

Ukrajna b’saħħitha u ħielsa

Il-gwerra ta’ aggressjoni tar-Russja fl-Ukrajna issa daħlet sew fil-ħames sena tagħha, u l-Ukrajna mhux biss qed tirreżisti iżda qed toħloq il-kundizzjonijiet biex tinnegozja l-paċi minn pożizzjoni ta’ saħħa. Dan huwa l-ewwel u qabel kollox bis-saħħa tal-kuraġġ u d-determinazzjoni tal-poplu Ukren. Iżda huwa wkoll bis-saħħa tal-appoġġ sod mill-Ewropa, li hija l-akbar kontributur tal-Ukrajna.

Assistenza militari tal-UE

L-UE hija l-akbar sostenitur militari tal-Ukrajna – hekk kif s’issa mmobilizzat EUR 89.7 biljun biex issaħħaħ il-kapaċitajiet ta’ difiża tagħha. Il-Missjoni ta’ Assistenza Militari tal-UE ħarrġet kważi 97,000 membru tal-forzi armati tal-Ukrajna. U, bħala parti mill-Programm Ewropew għall-Industrija tad-Difiża, l-Ewropa qed tgħin biex tappoġġa l-bażi industrijali tad-difiża tal-Ukrajna u biex tintegraha ma’ dik tal-Ewropa.

F’Lulju 2026, l-UE ffirmat sħubija industrijali tad-difiża ġdida, li timmarka pass kbir ’il quddiem fl-integrazzjoni tal-industriji tad-difiża tagħna. Nediet ukoll Patt dwar id-Droni bejn l-UE u l-Ukrajna biex tapprofondixxi l-kooperazzjoni dwar it-teknoloġiji tad-droni u kontra d-droni.

Sanzjonijiet

Sal-lum, l-UE approvat 21 pakkett ta’ sanzjonijiet kontra r-Russja u s-sostenituri tagħha. Dawn is-sanzjonijiet qed ipoġġu l-ekonomija Russa taħt pressjoni u jillimitaw il-kapaċità tagħha li twettaq gwerra.

Verżjoni testwali

21 pakkett ta’ sanzjonijiet

Żieda fil-pressjoni ekonomika fuq ir-Russja

Flotta mistura - Aktar minn 600 bastiment elenkati bħala parti mill-flotta mistura tar-Russja, soġġetti għal projbizzjonijiet fuq l-aċċess għall-portijiet u l-forniment ta’ servizzi
Assi Russi - Immobilizzati assi tal-Bank Ċentrali Russu b’valur ta’ EUR 210 biljun
Elenkar - Assi ta’ aktar minn 2 900 individwu u entità immobilizzati. L-individwi fil-mira huma soġġetti wkoll għal projbizzjoni fuq l-ivvjaġġar
Introjti miż-żejt - Projbizzjoni fuq l-importazzjonijiet ta’ żejt mhux maħdum li jinġarr bil-baħar u limitu massimu fuq il-prezzijiet taż-żejt biex jitnaqqas l-introjtu tar-Russja mill-esportazzjonijiet tal-enerġija. Ir-rieżami tal-limitu massimu tal-prezz ġie sospiż sa Lulju 2027
Importazzjoni tal-gass - Projbizzjoni fuq l-importazzjonijiet tal-LNG Russu minn Jannar 2027 u l-importazzjonijiet tal-gass mill-pipelines mill-ħarifa 2027
Finanzi, kummerċ u propoganda - Projbizzjonijiet fuq aktar minn 100 bank Russu, fuq aktar minn 20 strument ta’ propaganda Russu u fuq il-kummerċ ta’ diversi oġġetti b’użu doppju u teknoloġiji kritiċi

Ċirkumvenzjoni
Enfasi fuq il-ġlieda kontra l-evażjoni u ċ-ċirkumvenzjoni tas-sanzjonijiet

Neżiġu l-ġustizzja għall-Ukrajna u nipproteġu lil dawk li qed jaħarbu mill-gwerra

L-UE ingħaqdet mat-Tribunal Speċjali għad-Delitt ta’ Aggressjoni kontra l-Ukrajna, li ser ikun jista’ jħarrek lill-mexxejja politiċi u militari responsabbli għad-delitt ta’ aggressjoni kontra l-Ukrajna. F’Mejju 2026, il-Kummissjoni rratifikat, bħala membru fundatur, il-konvenzjoni li tistabbilixxi l-Kummissjoni Internazzjonali għat-Talbiet għall-Ukrajna, li se tevalwa u tiddetermina l-kumpens għall-vittmi tal-gwerra.

Irridu niżguraw li kull tifel u tifla Ukreni ttrasferiti bil-forza lejn ir-Russja jitreġġgħu għand familthom. L-UE ngħaqdet mal-Koalizzjoni Internazzjonali għar-Ritorn tat-Tfal Ukreni, u f’Mejju 2026 il-Kummissjoni ospitat b’mod konġunt laqgħa ta’ livell għoli, flimkien mal-Ukrajna u l-Kanada, biex il-kwistjoni titqiegħed fuq quddiem nett tal-aġenda tad-dinja.

L-Istati Membri tal-UE qablu wkoll li jestendu l-protezzjoni temporanja għan-nies li qed jaħarbu mill-gwerra sal-4 ta’ Marzu 2028.

Nappoġġaw is-sigurtà tal-enerġija tal-Ukrajna

Diġà ġew ipprovduti aktar minn EUR 4 biljun ta’ appoġġ għas-sigurtà tal-enerġija lill-Ukrajna mindu r-Russja għamlet l-invażjoni fuq skala sħiħa. Fl-24 ta’ Frar 2026, il-President von der Leyen ħabbret pakkett addizzjonali ta’ EUR 920 miljun għax-xitwa 2026/2027, li jipprovdi appoġġ kritiku għall-ġenerazzjoni tal-enerġija, ir-reżiljenza tal-grilja, l-effiċjenza enerġetika, u l-provvista tas-sħana.

Tiswija
Jerġgħu jitħaddmu l-impjanti tal-enerġija u jiġi pprovdut aktar tagħmir b’mod li jiġu moqdijin 15% tal-bżonnijiet tal-Ukrajna.
Rikostruzzjoni
Jiżdiedu l-esportazzjonijiet tal-elettriku tal-UE biex jiġu moqdijin 12% tal-ħtiġijiet tal-Ukrajna
Bidu ġdid
Nagħtu spinta lill-produzzjoni deċentralizzata tal-enerġija, ukoll billi nipprovdu pannelli solari lill-isptarijiet

It-Tkabbir – inlestu l-Unjoni tagħna

F’dinja aktar perikoluża u frammentata, is-sigurtà tal-Ewropa tiddependi fuq l-istabbiltà tal-viċinat tagħha. Dan jibda bil-politika tat-tkabbir tagħna. It-tkabbir dejjem se jibqa’ proċess ibbażat fuq il-mertu, u aħna impenjati li nagħtu lill-pajjiżi kandidati l-appoġġ sħiħ tagħna fi triqthom lejn is-sħubija.

L-Ukrajna u l-Moldova
Dan is-sajf, l-UE fetħet l-ewwel żewġ ġabriet ta’ negozjati tal-adeżjoni kemm mal-Moldova kif ukoll mal-Ukrajna, b’enfasi fuq il-“prinċipji fundamentali” (inkluż l-istat tad-dritt) kif ukoll ir-relazzjonijiet esterni.
F'Ġunju 2026, it-tieni Summit ta’ bejn l-UE u l-Moldova emfasizza l-progress notevoli tal-pajjiż fi triqtu lejn l-UE.
Il-Balkani tal-Punent
In-negozjati mal-pajjiżi kandidati tal-Balkani tal-Punent mxew ‘l quddiem. L-Istati Membri tal-UE qablu li jibdew jabbozzaw it-Trattat tal-Adeżjoni mal-Montenegro.
Biswit in-negozjati, qed invaraw l-investiment u r-riformi permezz ta’ pjanijiet ta’ tkabbir iddedikati. Barra minn dan, erbgħa mill-istati tal-Balkani tal-Punent, u l-Moldova, ingħaqdu maż-Żona Unika ta’ Pagamenti bl-Euro tagħna.
Qed ninnegozjaw dwar l-adeżjoni tal-Balkani tal-Punent fiż-żona roaming tagħna, biex in-nies li jivvjaġġaw bejn l-UE u r-reġjun ikunu jistgħu jużaw ir-Roaming Daqslikieku f’Pajjiżek.
L-Albanija wkoll kisbet tappa importanti, meta f’Lulju 2026 għalqet l-ewwel tliet kapitoli tagħha ta’ negozjati.
Sadanittant, qed inkomplu naħdmu mal-Bożnija-Ħerzegovina, il-Kosovo, il-Maċedonja ta’ Fuq, u s-Serbja biex nappoġġawhom fir-rotta Ewropea tagħhom.
Il-Georgia
L-Ewropa hija impenjata favur l-aspirazzjonijiet Ewropej leġittimi tal-poplu tal-Georgia, u hekk se tibqa’. Fid-dawl tal-ksur persistenti tad-demokrazija u d-drittijiet fundamentali mill-awtoritajiet tal-Georgia, f’Marzu 2026 li għadda l-Kummissjoni ssospendiet l-ivvjaġġar mingħajr viża għad-detenturi tal-passaporti diplomatiċi u uffiċjali tal-Georgia. Din id-deċiżjoni ma taffettwax liċ-ċittadini regolari.

Niżguraw aktar stabbiltà mal-ġirien tal-ġirien tagħna u nappoġġaw il-paċi fil-Lvant Nofsani

Mill-Afrika ta’ Fuq għall-Kawkasu tan-Nofsinhar, l-Ewropa qed issaħħaħ is-sħubijiet biex iġġib stabbiltà u opportunitajiet ekonomiċi ġodda.

L-Armenja u l-Ażerbajġan
L-UE ospitat l-ewwel summit tagħha li qatt sar mal-Armenja, li ffoka fuq l-appoġġ għall-paċi u l-istabbiltà fir-reġjun. Nediet ukoll is-Sħubija għall-Konnettività bejn l-UE u l-Armenja biex tgħin fit-tisħiħ tal-konnessjonijiet tat-trasport, tal-enerġija u dawk diġitali. F’Lulju 2026, il-President von der Leyen żaret l-Armenja kif ukoll l-Ażerbajġan, bħala turija tal-appoġġ tal-Ewropa għall-paċi u għall-ġid tar-relazzjonijiet ta’ ġirien bejn iż-żewġ pajjiżi.
Waqt iż-żjara tagħha, il-President ħabbret pakkett ġdid ta’ EUR 200 miljun tal-Global Gateway għall-paċi permezz tal-konnettività fil-Kawkasu tan-Nofsinhar, kif ukoll miżuri kummerċjali addizzjonali għall-Armenja kif ukoll Sħubija għall-Konnettività bejn l-UE u l-Ażerbajġan.
L-Artiku
L-UE qed taġġorna l-istrateġija tagħha UE-Artiku u ssaħħaħ il-kooperazzjoni fin-nazzjonijiet u r-reġjuni tal-Artiku. Qed nikkollegaw il-komunitajiet permezz tal-infrastruttura diġitali u nibnu sħubijiet biex nilliberaw l-materjali kritiċi li l-Ewropa teħtieġ biex tixpruna t-tranżizzjoni nadifa tagħha. 
L-Ewropa kienet f’solidarjetà sħiħa ma’ Greenland u r-Renju tad-Danimarka wara theddid mhux ġustifikat kontra d-demokrazija tagħha. Matul iż-żjara tagħha f’Settembru 2026, il-President von der Leyen ħabbret pakkett ta’ sħubija tal-Global gateway ta’ EUR 200 miljun għal investimenti fi Greenland. Dan se joħloq opportunitajiet għall-popolazzjoni lokali filwaqt li jikkontribwixxi għal reġjun tal-Artiku sostenibbli, prosperu u paċifiku.
Il-Lvant Nofsani
Fil-Lvant Nofsani, is-sena li għaddiet kienet iddominata minn kunflitt u instabbiltà, mill-Iran u l-Golf sa Gaża u x-Xatt tal-Punent, l-Iżrael u l-Libanu. L-Ewropa kkundannat il-vjolenza u intensifikat l-involviment fir-reġjun kollu u qed taħdem mill-qrib mas-sħab biex tappoġġa soluzzjonijiet diplomatiċi u stabbiltà, issaħħaħ ir-rabtiet ekonomiċi u twieġeb għall-ħtiġijiet umanitarji.
L-UE approfondiet il-kooperazzjoni mas-sħab tal-Golf b’reazzjoni għall-attakki tal-Iran u kompliet in-negozjati kummerċjali mal-Emirati Għarab Magħquda. In-negozjati għal Ftehimiet ta’ Sħubija Strateġika mas-sitt pajjiżi tal-Golf intensifikaw ukoll f’dawn l-aħħar xhur.
F’Jannar 2026, il-President von der Leyen u l-President Costa vvjaġġaw lejn il-kapitali tas-Sirja, Damasku, għall-ewwel darba mill-waqgħa tar-reġim ta’ Bashar al-Assad u ltaqgħu mal-President Ahmed al-Sharaa. Dan kien l-ewwel wieħed f’sensiela ta’ passi li varaw mill-ġdid is-sħubija tagħna mas-Sirja u saħħew l-appoġġ tagħna għall-poplu Sirjan u l-istituzzjonijiet tiegħu. 
L-ewwel summit bejn l-UE u l-Eġittu sar f’Ottubru 2025 biex tissaħħaħ il-kooperazzjoni fil-kummerċ, il-migrazzjoni, l-enerġija, l-investiment u l-appoġġ għall-aġenda ta’ riforma tal-Eġittu u l-assoċjazzjoni tiegħu ma’ Orizzont Ewropa. L-ewwel summit bejn l-UE u l-Ġordan sar f’Jannar 2026 biex tissaħħaħ il-kooperazzjoni dwar ir-reżiljenza ekonomika, is-sigurtà reġjonali u l-appoġġ għar-refuġjati.
L-UE żiedet b’mod sinifikanti l-appoġġ umanitarju fir-reġjun kollu, inkluż l-appoġġ permezz tal-Grupp ta’ Donaturi tal-Palestina. Permezz tal-Inizjattiva “Tim Gaża” il-Kummissjoni ġabret EUR 883.6 miljun biex tappoġġa azzjonijiet ta’ rkupru bikri f’diversi setturi għall-benefiċċju tal-popolazzjoni ċivili f’Gaża. Imponiet ukoll sanzjonijiet fuq abitanti estremisti Iżraeljani tal-insedjamenti responsabbli minn abbużi serji u sistematiċi kontra l-Palestinjani fix-Xatt tal-Punent. 
Il-Mediterran
F’Novembru 2025, l-UE nediet il-Patt tagħha għall-Mediterran biex tappoġġa l-paċi, is-sigurtà u l-istabbiltà fit-tul fir-reġjun. Filwaqt li jlaqqa’ flimkien l-UE, il-pajjiżi tal-UE u s-sħab tan-Nofsinhar tal-Mediterran, għandu l-għan li jinbena spazju komuni tal-Mediterran aktar konness, prosperu u sigur. F’April 2026, inħareġ l-ewwel pjan ta’ azzjoni tal-Patt għall-Mediterran.

Sħubijiet li jwettqu l-interessi u l-valuri tal-Ewropa

L-Ewropa qed taħdem lejn l-indipendenza fl-ekonomija dinjija mhux permezz tal-iżolament iżda permezz tas-sħubija. Qed tibni relazzjonijiet reżiljenti bbażati fuq interessi reċiproċi, prosperità kondiviża u rispett għas-sovranità.

Il-Portal globali
Madwar l-Afrika, l-Amerka Latina, l-Asja u lil hinn minnhom, l-istrateġija ta’ Global Gateway qed tappoġġa proġetti li javvanzaw kemm il-prijoritajiet tal-iżvilupp tal-pajjiżi sħab kif ukoll l-interessi strateġiċi tal-Ewropa. Hija qed tiffinanzja proġetti li jvarjaw mit-tranżizzjoni diġitali fil-Kolombja għal proġetti tal-enerġija nadifa fl-Afrika t’Isfel u r-Rotta tat-Trasport Internazzjonali Trans-Kaspju li se ttejjeb il-konnettività bejn l-Ewropa u l-Asja Ċentrali. Tinsab fit-triq it-tajba biex tinvesti aktar minn EUR 400 biljun sal-2027.
Il-Global Gateway taħdem minħabba li tgħaqqad l-ambizzjoni tas-settur mal-għarfien espert tas-settur privat. Biex insaħħu dan l-approċċ, varajna l-Hub ta’ Investiment tal-Global Gateway, punt ta’ dħul uniku li jlaqqa’ n-negozji, il-gvernijiet u l-istituzzjonijiet tal-finanzi għall-iżvilupp biex ifasslu u jwettqu proġetti flimkien.

Fuq quddiem fil-qasam tal-klima
F’Novembru 2025, waqt il-COP30 f’Belém, il-Brażil, il-President von der Leyen għamlet enfasi fuq l-impenn qawwi tal-Ewropa għat-trattat internazzjonali għall-ġlieda kontra t-tibdil fil-klima, il-Ftehim ta’ Pariġi. Dan issaħħaħ fil-Liġi tal-UE dwar il-Klima bil-wegħda li jitnaqqsu l-emissjonijiet ta’ gassijiet serra b’90 % sal-2040, meta mqabbla mal-livelli tal-1990.
L-Ewropa għadha fuq quddiem nett fil-finanzjament dinji għall-klima, billi tipprovdi EUR 31.7 biljun f’finanzjament pubbliku għall-klima u timmobilizza EUR 11-il biljun addizzjonali f’finanzjament privat fis-sena 2024 waħidha. 
Permezz tal-Fond għall-Inizjattiva dwar il-Bonds Ekoloġiċi fuq Skala Globali, imniedi f’April 2026, l-Ewropa se timmobilizza sa EUR 20 biljun ta’ kapital privat għal proġetti ta’ infrastruttura sostenibbli fuq skala kbira filwaqt li trawwem swieq tal-bonds ekoloġiċi f’pajjiżi sħab.
L-UE kkontribwiet ukoll aktar minn EUR 15.1 biljun għall-kampanja ta’ wegħdiet ta’ donazzjonijiet, Scaling up Renewables in Africa, ospitata b’mod konġunt mill-President von der Leyen u l-President Ramaphosa tal-Afrika t’Isfel. Dawn l-investimenti se jespandu l-aċċess għall-enerġija nadifa, jappoġġaw l-iżvilupp industrijali, joħolqu l-impjiegi u jsaħħu s-sigurtà tal-enerġija kemm għall-Afrika kif ukoll għall-Ewropa.
Oċeani
Huwa għalhekk li l-UE nediet OceanEye, biex issaħħaħ il-kapaċità tal-Ewropa għall-osservazzjoni tal-oċeani u l-monitoraġġ marittimu filwaqt li tappoġġa r-riċerka xjentifika u ekonomija blu aktar kompetittiva u sostenibbli.
Saħħa globali
Minn tifqigħat tal-Ebola għal mard infettiv emerġenti, id-dinja għadha qed tiffaċċja riskji dejjem akbar għas-saħħa f’mument meta l-finanzjament internazzjonali jinsab taħt pressjoni. Permess tal-Inizjattiva għar-Reżiljenza tas-Saħħa Dinjija, l-UE qed issawwar ir-reżiljenza dinjija u tħejji għall-kriżijiet qabel iseħħu.
L-għajnuna umanitarja
Fl-2026, aktar minn 239 miljun persuna madwar id-dinja kellhom bżonn l-assistenza umanitarja. Filwaqt li ħafna donaturi qed inaqqsu l-kontribuzzjonijiet tagħhom, l-Ewropa tibqa’ l-entità li l-aktar tagħti għajnuna umanitarja fid-dinja, b’aktar minn EUR 1.9 biljun iddedikati għall-2026 biss.
Bħala prova tas-solidarjetà tal-Ewropa li ssalva l-ħajjiet, meta l-Venezwela ntlaqtet minn żewġ terremoti massivi f’Ġunju 2026, il-Mekkaniżmu tal-UE għall-Protezzjoni Ċivili kkoordina l-appoġġ ipprovdut minn 19-il pajjiż Ewropew li bagħtu timijiet ta’ tiftix u salvataġġ, esperti tekniċi u bagħtu tagħmir għall-kenn, l-ilma u s-sanità.

Aktar punti ewlenin

Din il-paġna telenka biss għażla ta’ kisbiet miksuba matul is-sena li għaddiet.
Għal aktar informazzjoni, niżżel il-fuljett (PDF).

Din il-paġna ġiet aġġornata l-aħħar: 11 Settembru 2026

Niksbu l-indipendenza tal-Ewropa