Page contents Page contents Féach ar ár sraith de 6 bheochan!Féach anois Cad é an smacht reachta? Faoin smacht reachta, gníomhaítear na cumhachtaí poiblí uile i gcónaí laistigh de na srianta atá leagtha amach faoin dlí, i gcomhréir le luachanna an daonlathais agus na gceart bunúsach, agus faoi smacht cúirteanna neamhspleácha neamhchlaonta. Is prionsabal seanbhunaithe é an smacht reachta. Cé go bhfuil féiniúlachtaí agus traidisiúin náisiúnta éagsúla ag na Ballstáit, is ionann brí lárnach an smachta reachta i ngach ceann acu agus is féidir í a shainiú de réir na sé phrionsabal seo a leanas: dlíthiúlacht, rud a thugann le tuiscint go bhfuil próiseas trédhearcach, cuntasach, daonlathach agus iolraíoch ann chun dlíthe a achtú; prionsabal na deimhneachta dlíthiúla; toirmeasc ar fheidhmiú treallach na cumhachta feidhmiúcháin; cosaint éifeachtach bhreithiúnach ó chúirteanna neamhspleácha neamhchlaonta a bhfuil athbhreithniú breithiúnach éifeachtach acu, lena gcuimsítear urraim do chearta bunúsacha; prionsabal scaradh na gcumhachtaí; agus comhionannas os comhair an dlí. Tá na prionsabail sin aitheanta ag Cúirt Bhreithiúnais an Aontais Eorpaigh agus ag an gCúirt Eorpach um Chearta an Duine. Ina theannta sin, tá caighdeáin forbartha ag Comhairle na hEorpa agus tá tuairimí agus moltaí eisithe aici a thugann treoir sheanbhunaithe chun an smacht reachta a chur chun cinn agus a chaomhnú. Cén fáth a bhfuil an smacht reachta tábhachtach san Aontas Eorpach? Is é an smacht reachta, a chumhdaítear in Airteagal 2 den Chonradh ar an Aontas Eorpach, bunchloch an Aontais Eorpaigh. Ráthaítear leis an smacht reachta go gcuirfear dlí an Aontais i bhfeidhm go haonfhoirmeach ar fud na mBallstát uile, rud a chruthaíonn timpeallacht intuartha do dhaoine agus do ghnólachtaí. Gan an smacht reachta, ní bheadh aon mhargadh aonair ann, agus ní fhéadfadh daoine bogadh ó thír amháin den Aontas go tír eile den Aontas agus a fhios acu go bhfuil feidhm ag na rialacha céanna maidir le gach duine. Cinntíonn sé go gcloítear le cearta bunúsacha agus leis an daonlathas. Ciallaíonn sé freisin, má sháraítear cearta saoránach agus gnólachtaí, go bhfuil rochtain acu ar an gceartas os comhair cúirt neamhspleách neamhchlaonta. Tá sé ríthábhachtach freisin maidir le dlíthe agus beartais an Aontais a chur chun feidhme, agus tá sé lárnach d’Aontas an chomhionannais, na ndeiseanna agus na cothroime sóisialta. Ar na cúiseanna sin go léir, tá an smacht reachta ar cheann de na bunluachanna ar a bhfuil an tAontas Eorpach bunaithe. Is príomhchritéar é freisin do thíortha is iarrthóirí ar mian leo teacht isteach san Aontas. Ar mhaith leat tuilleadh eolais a fháil? Féach ar ár sraith de shé bheochan! Inár sraith beochana atá deartha ag an ealaíontóir iomráiteach Christoph Niemann, léirímid i dtéarmaí simplí inrochtana an fáth a bhfuil tábhacht leis an smacht reachta sa saol laethúil, agus meafar an spóirt á úsáid againn. Gan réiteoir neodrach, an bhfuil cluiche peile cothrom i ndáiríre? Agus an rachfá i mbun cluiche púil nó cispheile dá n-athródh na rialacha leath bealaigh tríd? Féach ar ár 6 bheochan faoin smacht reachta agus scaip iad ar na meáin shóisialta trí úsáid a bhaint as an haischlib #RuleOfLaw. Comhionannas os comhair an dlí San Eoraip, baineann na rialacha céanna le gach duine beag beann ar a dtionscnamh, inscne, cine, aois, reiligiún, nó aon tréith eile. Trí phrionsabal an chomhionannais os comhair an dlí a chaomhnú, cinntímid cothroime san Eoraip. Deimhneacht dhlíthiúil San Eoraip, ní mór na rialacha a bheith soiléir agus intuartha. Ar an gcaoi sin, tá a fhios ag saoránaigh agus ag gnólachtaí cad iad na cearta atá acu agus cad iad na hoibleagáidí atá orthu, rud a chuireann ar a gcumas gníomhú dá réir. Trí sheasamh leis an bprionsabal sin, cosnaímid an smacht reachta san Eoraip. Easpa mí-úsáid cumhachta San Eoraip, ní féidir le haon duine a shealbhaíonn oifig phoiblí gníomhú go treallach ná mí-úsáid a bhaint as a gcumhacht ar mhaithe le gnóthachan pearsanta. Má dhéanann siad é sin, tabharfar chun cuntais iad. Trí sheasamh leis an bprionsabal sin, cinntímid go bhfreastalaíonn feidhmiú na gcumhachta feidhmiúcháin ar leasanna an phobail. Cúirteanna neamhspleácha San Eoraip, ní mór do bhreithiúna a bheith neamhspleách ar an rialtas. Ní féidir ach le cúirteanna neamhspleácha cearta bunúsacha a chosaint. Ní féidir leo a bheith i bhfabhar aon cheann de na páirtithe sa chás. Sin an fáth ar féidir le saoránaigh agus gnólachtaí muinín a bheith acu go gcinntear a gcásanna go cothrom. Trí sheasamh leis an bprionsabal sin, cinntímid go bhfaighidh gach duine triail chóir. Dlíthiúlacht San Eoraip, níl aon duine lasmuigh den dlí. Bíonn próiseas daonlathach i gceist chun dlíthe a ghlacadh, próiseas atá bunaithe ar rialacha soiléire. Ní mór dóibh siúd atá i gcumhacht gníomhú de réir an dlí. Trí sheasamh leis an bprionsabal sin, cosnaímid an smacht reachta san Eoraip. Prionsabal scaradh na gcumhachtaí San Eoraip, ní féidir le duine ar bith cumhacht neamhtheoranta a bheith aige. Sin é an fáth go bhfuil an reachtas, an feidhmeannas agus na breithiúna scartha amach óna chéile. Déanann na cumhachtaí sin seiceáil agus cothromú ar a chéile. Trí sheasamh leis an bprionsabal sin, cosnaímid an smacht reachta san Eoraip. Tuilleadh acmhainní i dtaca leis an smacht reachta An bhfuil suim agat tuilleadh a fháil amach faoin smacht reachta san Aontas Eorpach? Féach na naisc thíos chun tuilleadh eolais a fháil faoin bhfáth a bhfuil tábhacht leis an smacht reachta agus faoin méid atá á dhéanamh ag an gCoimisiún Eorpach chun é a chosaint. Bosca uirlisí maidir leis an Smacht Reachta: Leis an mBosca Uirlisí maidir leis an Smacht Reachta, cuirtear roinnt ionstraimí ar fáil chun an smacht reachta a chur chun cinn agus chun saincheisteanna atá ag teacht chun cinn a chosc nó chun freagairt dóibh. Tuarascáil maidir leis an Smacht Reachta: Leis an Tuarascáil maidir leis an Smacht Reachta, déantar monatóireacht ar fhorbairtí suntasacha a bhaineann leis an smacht reachta sna Ballstáit, bíodh siad dearfach nó diúltach. Scórchlár Ceartais an Aontais: Tugann Scórchlár Ceartais an Aontais forléargas bliantúil ar tháscairí a bhaineann le héifeachtacht, cáilíocht agus neamhspleáchas na gcóras ceartais. Idirphléití Náisiúnta maidir leis an Smacht Reachta: Le hidirphléití náisiúnta maidir leis an smacht reachta, tugtar páirtithe leasmhara agus údaráis le chéile chun plé a dhéanamh ar phríomh-shaincheisteanna náisiúnta maidir leis an smacht reachta, bunaithe ar an Tuarascáil maidir leis an Smacht Reachta. Naisc ghaolmhara Cad a dhéanann an Coimisiún chun an smacht reachta a chaomhnú?
