Tá an t-eolas seo ar fáil sna teangacha seo a leanas chomh maith: Úcráinis | українська | Rúisis | русский
Cabhair dhaonnúil agus cosaint shibhialta
Tá níos mó ná €1.4 billiún leithdháilte ag an gCoimisiún le haghaidh cláir cabhrach daonnúla san Úcráin atá le cur i bhfeidhm ag comhpháirtithe daonnúla ar an láthair.
I gcomhréir le tosaíochtaí rialtas na hÚcráine, cuirtear an méid seo a leanas ar fáil le cúnamh daonnúil an Aontais:
- foscadh
- tacaíocht airgid
- cúram sláinte
- cúnamh bia
- oideachas
- uisce agus sláintíocht
Ina theannta sin, seachadadh níos mó ná 159,000 tona de chúnamh comhchineáil chuig an Úcráin ó Bhallstáit an Aontais agus ó chomhpháirtithe trí Shásra an Aontais um Chosaint Shibhialta.
Tá aslonnuithe leighis á gcomhordú ag an Aontas d’othair ón Úcráin a bhfuil cóireáil de dhíth orthu go práinneach. Go dtí seo tá breis is 5,000 othar aistrithe ag an Aontas chuig ospidéil ar fud na hEorpa chun cúram speisialaithe a fháil.
In 2022 shlóg an tAontas €330 milliún le haghaidh clár tacaíochta éigeandála a chuidigh chun rochtain a chinntiú ar earraí agus seirbhísí bunúsacha, amhail oideachas, cúram sláinte agus bia. Chuidigh an clár tacaíochta freisin leis an daonra a chosaint, daoine atá easáitithe ina dtír féin agus na pobail óstacha san áireamh, agus chun tacú le fiontair bheaga agus mheánmhéide agus leis an talmhaíocht.
Tacú le hiarrachtaí dímhianaithe san Úcráin
Gheall an tAontas agus a Bhallstáit €500 milliún i dtreo dímhianú daonnúil san Úcráin idir 2022 agus 2030, rud a fhágann gur príomhdheontóirí iad sa réimse sin.
Tá an tAontas ag tacú le hiarrachtaí gníomhaíochta mianach na hÚcráine trí acmhainneachtaí náisiúnta a neartú, trí oiliúint a chur ar dhímhianadóirí na hÚcráine agus iad a fheistiú, agus trí ghlacadh cur chuige nuálach maidir le gníomhaíocht mianach a chur chun cinn, úsáid madraí dímhianaithe san áireamh. Cuidíonn an cúnamh sin chun limistéir éillithe a dhéanamh sábháilte do shibhialtaigh, agus téarnamh agus atógáil na tíre á gcumasú ag an am céanna.
Mar chuid de na hiarrachtaí sin, tá Comhdháil um Ghníomhaíocht Mianach na hÚcráine 2026 á comhóstáil ag an Aontas agus ag an Úcráin sa Bhruiséil ón 16 go dtí an 18 Samhain. Is é is aidhm don imeacht tacaíocht idirnáisiúnta a shlógadh, comhpháirtíochtaí domhanda a neartú, agus cur chuige nuálach maidir le gníomhaíocht mianach a chur chun cinn, san Úcráin agus níos faide i gcéin.
Tacaíocht rescEU
Tá soláthairtí leighis, aonaid shealadacha dídine agus gineadóirí cumhachta curtha ar fáil ag an Aontas trí stoc-chairn rescEU, sin agus trealamh speisialaithe le haghaidh rioscaí don tsláinte phoiblí amhail bagairtí ceimiceacha, bitheolaíocha, raideolaíocha agus núicléacha.
Ar an iomlán, chuir an tAontas tacaíocht rescEU níos mó ná €180 milliún ar fáil don Úcráin ó thús an chogaidh.
Seo a leanas cineálacha de thacaíocht rescEU atá curtha ar fáil don Úcráin:
- riachtanais tithíochta
- éidí cosanta
- dí-éilleáin
- aerálaithe
- caidéil iondoirte
- monatóirí othar
- feistí ultrafhuaime
Cosaint shealadach
Tar éis thús an ionraidh chuir an tAontas an Treoir um Chosaint Shealadach i bhfeidhm láithreach. Tugann sé sin cearta áirithe san Aontas do dhaoine easáitithe atá ar a dteitheadh ón gcogadh san Úcráin, agus an méid seo a leanas san áireamh:
- ceadanna cónaithe
- modhanna chun rochtain a fháil ar chóiríocht oiriúnach
- cúram leighis
- oideachas do leanaí
Ó shin i leith, chuir tíortha an Aontais fáilte roimh níos mó ná ceithre mhilliún duine ón Úcráin faoin scéim cosanta sealadaí sin. Chomhaontaigh an tAontas síneadh a chur leis an gcosaint shealadach go dtí mí an Mhárta 2028, ó tharla gur léir i gcónaí an gá atá le daoine atá ag teitheadh ón Úcráin a chosaint.
Thug an Coimisiún an tsolúbthacht is mó is féidir isteach ionas gur féidir leis na Ballstáit cistí comhtháthaithe nár caitheadh a úsáid freisin chun tacú le daoine atá ag teitheadh ón gcogadh. A bhuí leis sin, tá suas le €17 mbilliún curtha ar fáil chuige sin.
Tacaíocht do leanaí de chuid na hÚcráine
Tá €100 milliún curtha ar fáil ag an Aontas chun rochtain shábháilte ar oideachas do pháistí a chinntiú san Úcráin.
Deonaíodh níos mó ná 380 bus scoile agus chuir an Coimisiún 1.5 milliún téacsleabhar ar fáil do mhic léinn san Úcráin.
Leanaí na hÚcráine a thabhairt ar ais abhaile
Ó thús ionradh iomlán na Rúise ar an Úcráin in 2022, díbríodh níos mó ná 20,500 leanbh ón Úcráin go neamhdhleathach agus aistríodh iad le forneart chuig an Rúis agus chuig na críocha atá faoi fhorghabháil shealadach.
Rinne an tAontas comhchathaoirleacht leis an Úcráin agus le Ceanada ar chruinniú ardleibhéil den Chomhghuaillíocht Idirnáisiúnta um Fhilleadh na Leanaí as an Úcráin an 11 Bealtaine 2026. Le linn an imeachta, gheall na rannpháirtithe go gcuirfidís dlús leis an ngníomhaíocht chun filleadh gach linbh ón Úcráin a thóg an Rúis a chinntiú, chomh maith le cuntasacht iomlán as na coireanna sin.
Scéalta ar an láthair
Is teicneoir éigeandála leighis (EMT) é Anton Atroshchenko, 29 mbliana d’aois. Tá sé mar chuid den 11ú Foireann Éigeandála Leighis Éigeandála ag Ionad Oblast Chernihiv um Chúram Éigeandála Leighis agus Leigheas Tubaiste. Tar éis athchóiriú a rinneadh le déanaí ar chúram sláinte san Úcráin, ceanglaítear ar gach tiománaí otharchairr cáiliú mar ghairmithe leighis a sholáthraíonn cúram práinneach lasmuigh de shuíomhanna ospidéil nó ar an mbealach chucu. Cháiligh Anton mar EMT a bhuí le hoiliúint a d’eagraigh an tAontas agus Clár Forbartha na Náisiún Aontaithe (UNDP).
Nuair a sheol an Rúis a hionradh míleata iomlán ar an Úcráin, bhí Chernihiv faoi léigear ar feadh 41 lá. Uair amháin, tharla sé gur tosaíodh ag lámhach orthu agus iad ag fágáil foirgnimh. D’aimsigh siad foscadh i bpasáiste, taobh thiar de dhá bhalla, in éineacht le daoine a bhí ina gcónaí ann. Thit balla díreach 15 mhéadar uathu. A bhuí leis an oiliúnt a fuair Anton mar EMT, d’fhoghlaim sé scileanna nua a chuidíonn chun beatha othar a shábháil gach lá.
Athbhreithníodh an leathanach seo den uair dheireanach an 2 Meán Fómhair 2026