Din l-informazzjoni hi disponibbli wkoll: bl-Ukren | українська | bir-Russu | русский
L-għajnuna umanitarja u l-protezzjoni ċivili
Il-Kummissjoni allokat ’il fuq minn €1.4 biljun għal programmi ta’ għajnuna umanitarja fl-Ukrajna li għandhom jiġu implimentati mis-sħab fil-post.
F’konformità mal-prijoritajiet tal-gvern Ukren, l-assistenza umanitarja tal-UE tipprovdi
- kenn
- appoġġ fi flus kontanti
- servizzi tas-saħħa
- assistenza alimentari
- edukazzjoni
- ilma u faċilitajiet sanitarji
Barra minn hekk, twasslu ’l fuq minn 159,000 tunnellata ta’ assistenza in natura lill-Ukrajna mill-Istati Membri u s-sħab tal-UE permezz tal-Mekkaniżmu tal-UE għall-Protezzjoni Ċivili.
L-UE, l-Istati Membri tagħha, u s-sħab tal-Assoċjazzjoni Ewropea tal-Kummerċ Ħieles (EFTA – European Free Trade Association) ipprovdew €380 miljun għat-tneħħija tal-mini għal skopijiet umanitarji, inklużi €80 miljun mill-baġit tal-UE.
L-UE qed tikkoordina l-evakwazzjonijiet mediċi ta’ pazjenti Ukreni fi bżonn urġenti ta’ trattament, u s’issa ttrasferiet aktar minn 5,000 pazjent lejn sptarijiet madwar l-Ewropa biex jingħataw kura speċjalizzata.
Fl-2022, l-UE mmobilizzat €330 miljun għal programm ta’ appoġġ ta’ emerġenza li għen biex jiġi żgurat l-aċċess għall-prodotti u s-servizzi bażiċi bħall-edukazzjoni, is-servizzi tas-saħħa, u l-ikel. Il-programm ta’ appoġġ għen ukoll biex tiġi protetta l-popolazzjoni — kemm il-persuni spostati internament kif ukoll il-komunitajiet li laqgħuhom — u biex jiġu appoġġjati l-intrapriżi żgħar u ta’ daqs medju kif ukoll l-agrikoltura.
Appoġġ tar-rescEU
Permezz tal-ħażniet tar-rescEU l-UE mmobilizzat provvisti mediċi, unitajiet ta’ kenn temporanji, u ġeneraturi tal-enerġija kif ukoll tagħmir speċjalizzat għar-riskji għas-saħħa pubblika bħat-theddid kimiku, bijoloġiku, radjoloġiku, u nukleari.
B’kollox, mill-bidu tal-gwerra ’l hawn l-UE pprovdiet lill-Ukrajna b’aktar minn€181 miljun f’appoġġ tar-rescEU.
It-tipi ta’ appoġġ tar-rescEU pprovduti lill-Ukrajna jinkludu
- ħtiġijiet ta’ akkomodazzjoni
- ilbies ta’ protezzjoni
- dekontaminanti
- ventilaturi
- pompi tal-infużjoni
- monitors tal-pazjenti
- apparati tal-ultrasound
Protezzjoni temporanja
Sa mill-bidu tal-invażjoni, l-UE immedjatament skattat id-Direttiva dwar il-Protezzjoni Temporanja. Din tagħti lill-persuni spostati li qed jaħarbu mill-gwerra fl-Ukrajna ċerti drittijiet fl-UE, inklużi
- permessi tar-residenza
- mezzi biex jiksbu aċċess għal akkomodazzjoni xierqa
- kura medika
- edukazzjoni għat-tfal
Minn dak iż-żmien ’l hawn, il-pajjiżi tal-UE laqgħu ’l fuq minn erba’ miljun ruħ mill-Ukrajna fl-ambitu ta’ din l-iskema ta’ protezzjoni temporanja. Il-Kummissjoni pproponiet li l-protezzjoni temporanja tiġi estiża sa Marzu 2028, peress li għadha evidenti l-ħtieġa li n-nies li qed jaħarbu mill-Ukrajna jiġu protetti.
Il-Kummissjoni introduċiet flessibbiltà massima sabiex l-Istati Membri jkunu jistgħu jużaw ukoll il-fondi ta’ koeżjoni li ma ntefqux biex joffru sostenn lin-nies li qed jaħarbu mill-gwerra. Dan ippermetta li jiġu żblukkati sa €17-il biljun għal dan il-għan.
Sostenn lit-tfal Ukreni
L-UE pprovdiet €100 miljun bħala kontribut biex jiġi żgurat li t-tfal ikollhom aċċess sikur għall-edukazzjoni fl-Ukrajna.
Ngħataw ’il fuq minn 380 xarabank tal-iskola u l-Kummissjoni bagħtet 1.5 miljun ktieb tat-tagħlim għall-istudenti fl-Ukrajna.
Ir-ritorn tat-tfal Ukreni lejn id-dar
Mill-bidu tal-invażjoni fuq skala sħiħa tal-Ukrajna mir-Russja fl-2022 ’l hawn, ’il fuq minn 20,500 tifel u tifla Ukreni ġew deportati illegalment u ttrasferiti kontra r-rieda tagħhom lejn ir-Russja u t-territorji okkupati temporanjament.
Fil-11 ta’ Mejju 2026 l-UE kkopresediet, mal-Ukrajna u mal-Kanada, laqgħa ta’ livell għoli tal-Koalizzjoni Internazzjonali għar-Ritorn tat-Tfal Ukreni. Matul l-avveniment, il-parteċipanti impenjaw ruħhom li jintensifikaw l-azzjoni biex jiggarantixxu ir-ritorn ta’ kull tifel u tifla Ukreni li ttieħdu mir-Russja, u jiżguraw li jingħata kont sħiħ għal dawn id-delitti.
Stejjer mill-post
Anton Atroshchenko, ta’ 29 sena, huwa tekniku mediku tal-emerġenza. Jagħmel parti mill-11-il Tim Mediku tal-Emerġenza fiċ-Ċentru tal-Oblast ta’ Chernihiv għall-Kura Medika ta’ Emerġenza u l-Mediċina f’Każ ta’ Diżastru. B’riżultat ta’ riforma reċenti fis-servizzi tas-saħħa fl-Ukrajna, ix-xufiera kollha tal-ambulanzi jridu jkunu professjonisti mediċi li jipprovdu kura urġenti barra mill-isptarijiet jew meta jkunu fi triqithom lejhom. Anton sar tekniku mediku tal-emerġenza bis-saħħa ta’ taħriġ organizzat mill-UE u mill-Programm ta’ Żvilupp tan-NU (UNDP).
Meta r-Russja tat bidu għall-invażjoni fuq skala sħiħa tal-Ukrajna, Chernihiv kien assedjat għal 41 jum. Darba minnhom it-tim spiċċa f’nofs l-isparar meta kien ħiereġ minn binja. Stkennew fil-kuritur, wara żewġ ħitan, flimkien mar-residenti. Kien hemm ħajt li ġġarraf 15-il metru biss ’il bogħod minnhom. Bis-saħħa tat-taħriġ li ħa bħala tekniku mediku tal-emerġenza, Anton kiseb ħiliet ġodda li jgħinuh biex isalva l-ħajjiet tal-pazjenti kuljum.
Din il-paġna ġiet aġġornata l-aħħar: 26 Ġunju 2026