Forbhreathnú
Is náisiún ceannasach daonlathach í an Úcráin a chinn, faoi shaoirse, gur mian léi teacht isteach sa teaghlach Eorpach seo againne.
Chuir an Úcráin isteach ar bhallraíocht san Aontas ag deireadh mhí Feabhra 2022, cúpla lá tar éis don Rúis fogha iomlán gan chúis gan údar a thabhairt faoin Úcráin.
Tá an tAontas ag obair lenár gcomhpháirtithe san Úcráin chun an próiseas aontachais a éascú agus chun tacú leo na critéir bhallraíochta a chomhlíonadh.
Dul chun cinn na hÚcráine go dtí seo
Chuir an Coimisiún i láthair a thuairim ar iarratas na hÚcráine i mí an Mheithimh 2022, agus bhronn na Ballstáit uile stádas mar iarrthóir ar bhallraíocht san Aontas ar an Úcráin an mhí sin.
I mí na Nollag 2023, chomhaontaigh ceannairí an Aontais tús a chur le caibidlíocht aontachais leis an Úcráin. Chuir an tAontas tús foirmiúil leis an gcaibidlíocht aontachais leis an Úcráin i mí an Mheithimh 2024.
I mí an Mheithimh 2026 chomhaontaigh Ballstáit an Aontais tús a chur leis an gcéad chnuasach caibidlíochta leis an Úcráin maidir le bunphrionsabail.
Tá caibidlíocht aontachais an Aontais bunaithe ar shé chnuasach théamacha. Leis an gcnuasach darb ainm ‘bunphrionsabail’, cuimsítear na bunluachanna agus na bunphrionsabail ar a bhfuil an tAontas bunaithe, ón smacht reachta go hinstitiúidí daonlathacha láidre.
Le linn na caibidlíochta, ní mór don Úcráin athchóirithe a chur i bhfeidhm chun ailíniú le dlíthe agus caighdeáin an Aontais, ar a dtugtar an acquis freisin. Léirigh an tír go bhfuil acmhainneacht shuntasach aici athchóirithe a chur i gcrích, fiú le linn an chogaidh.
Tá dul chun cinn déanta ag an Úcráin cheana féin maidir le roinnt snáithe tábhachtacha, ina measc:
- athchóiriú ar a córas ceartais
- geilleagar margaidh feidhmiúil a fhorbairt
- an comhrac i gcoinne an sciúrtha airgid
- an córas riaracháin phoiblí a nuachóiriú
- cearta mionlach náisiúnta a chosaint
Is láidre atá an Eoraip leis an Úcráin
In ainneoin chogadh foghach na Rúise agus in ainneoin na gcruatan atá roimh an Úcráin faoi láthair, tá tús curtha ag an Úcráin le turas a mbainfidh idir Úcránaigh agus Eorpaigh tairbhe nach beag as.
Le haontachas na hÚcráine, mhéadófaí an chobhsaíocht agus an tslándáil réigiúnach, threiseofaí ár gcomhluachanna maidir leis an tsaoirse agus an daonlathas, agus dhéanfaí ár n-éagsúlacht chultúrtha agus ár n-oidhreacht chultúrtha a shaibhriú. Leathnódh sé freisin an margadh aonair, rud a chruthódh deiseanna nua do ghnólachtaí Eorpacha agus a neartódh iomaíochas na hEorpa.
Tá naisc láidre stairiúla agus chultúrtha ag an Úcráin leis an Eoraip agus is mian léi tairbhe a bhaint as an gcobhsaíocht pholaitiúil agus eacnamaíoch atá ag na Ballstáit.
Is daonlathas lánfheidhme uachtaránachta-parlaiminte atá san Úcráin, agus tá riarachán poiblí dea-fheidhmiúil aici a choinnigh ag imeacht í le linn an chogaidh. Tá sochaí shibhialta ghníomhach ann agus cruthaíodh gur cothrom agus saor atá an córas toghcháin.
Gach Úcránach atá ag troid ar son todhchaí níos fearr, tá a shúile ar an Eoraip. Agus le chéile, is féidir linn an troid sin a bhuachan. Le chéile, is féidir linn ár nAontas a iomlánú. Le chéile, is féidir linn an Úcráin a thabhairt isteach inár mbaile Eorpach coiteann. Sin aisling laochra agus mhairtírigh na hÚcráine. Agus sin an aisling atá againne freisin. Le cheile, is sinne an Eoraip.
An Úcráin a thabhairt níos gaire don Aontas
Tá an tAontas ag obair cheana féin chun an Úcráin a lánpháirtiú de réir a chéile ina mhargadh aonair agus chun deis a thabhairt do mhuintir na hÚcráine tairbhe a bhaint as cuid de na buntáistí atá ag saoránaigh na hEorpa.
Trádáil
Tá comhaontú comhlachais ag an Aontas agus ag an Úcráin ó bhí 2014 ann. Is é an comhaontú sin an phríomhuirlis chun an Úcráin agus an tAontas a thabhairt níos gaire dá chéile: cuireann sé naisc pholaitiúla níos doimhne, naisc eacnamaíocha níos láidre, agus meas ar luachanna coiteanna chun cinn.
Áirítear sa chomhaontú an limistéar domhain cuimsitheach saorthrádála (DCFTA), lena gcuirtear borradh faoin trádáil idir an tAontas agus an Úcráin trí tharaifí ar earraí agus ar sheirbhísí a ghearradh de réir a chéile. Rannchuidíonn sé freisin chun an Úcráin a lánpháirtiú i margadh aonair an Aontais tríd an Úcráin a spreagadh chun cinnte a dhéanamh go bhfuil sí ag teacht le caighdeáin an Aontais. Tháinig DCFTA nuashonraithe i bhfeidhm i mí Dheireadh Fómhair 2025, rud a chuideoidh chun sreafaí trádála a fheabhsú a thuilleadh.
Is é an tAontas príomh-chomhpháirtí trádála na hÚcráine, arb ionann é agus os cionn 50% dá trádáil in earraí in 2024. Shroich an trádáil iomlán in earraí idir an tAontas agus an Úcráin €67.2 billiún in 2024, rud a chiallaíonn go bhfuil méadú faoi dhó tagtha ar thrádáil earraí ó tháinig DCFTA i bhfeidhm in 2016.
Tuilleadh eolais faoin trádáil idir an tAontas agus an Úcráin
Comhtháthú an mhargaidh aonair
Chuaigh an Úcráin isteach i gClár an Mhargaidh Aonair i mí Feabhra 2023. Cuireann rannpháirtíocht sa chlár sin ar chumas chuideachtaí beaga agus meánmhéide (FBManna) na hÚcráine tacaíocht a fháil agus rochtain a fháil ar mhargaí an Aontais.
Taighde, nuálaíocht agus oideachas
Glacann eolaithe agus saoránaigh ón Úcráin páirt i gcláir thábhachtacha de chuid an Aontais maidir le taighde, nuálaíocht agus oideachas trí na cláir Fís Eorpach agus Erasmus+.
I mí na Nollag 2023 d’oscail an Coimisiún oifig nua Fís Eorpach i gCív. Cuidíonn rannpháirt na hÚcráine sa chlár Fís Eorpach agus i gClár Taighde agus Oiliúna Euratom le héiceachóras taighde agus nuálaíochta na tíre a chaomhnú agus a chothú.
Tá breis agus 11,500 malartú maoinithe ag an Aontas idir saoránaigh an Aontais agus na hÚcráine tríd an gclár Erasmus+ ó bhí 2021 ann.
Tuilleadh eolais faoi thacaíocht an Aontais do thaighde agus nuálaíocht na hÚcráine
Nascacht
Tá an Úcráin comhlachaithe le clár na Saoráide um Chónascadh na hEorpa ó mhí an Mheithimh 2023. Chuir sé sin ar a gcumas d’údaráis agus cuideachtaí na hÚcráine iarratas a dhéanamh ar mhaoiniú ón Aontas le haghaidh tionscadail leasa choitinn in earnáil an iompair, earnáil an fhuinnimh agus san earnáil dhigiteach, rud a chuireann tuilleadh feabhais ar nascacht na hÚcráine lena comharsana san Aontas.
Tháinig an Úcráin isteach i limistéar fánaíochta an Aontais an 1 Eanáir 2026. Is féidir le saoránaigh den Úcráin a thaistealaíonn chuig Ballstáit an Aontais a seirbhísí móibíleacha a úsáid gan stró anois, gan costais fánaíochta bhreise a íoc. Is amhlaidh atá i gcás na saoránach den Aontas atá ag fánaíocht san Úcráin.
An Cultúr
Tá €50 milliún geallta ag an Aontas chun tacú le hearnálacha cultúir agus cruthaitheacha na hÚcráine ó thús an chogaidh.
Ó 2022 i leith, tá níos mó ná €7 milliún curtha ar fáil ag Eoraip na Cruthaitheachta d’eagraíochtaí cultúrtha na hÚcráine agus €700,000 i ndeontais soghluaisteachta d’ealaíontóirí agus do ghairmithe cultúrtha. Tacaíonn an maoiniú le caomhnú na hoidhreachta cultúrtha agus le léirithe ealaíonta laistigh agus lasmuigh den Úcráin araon.
Amlíne
- 15 Meitheamh 2026
Chomhaontaigh an tAontas tús a chur leis an gcéad chnuasach caibidlíochta aontachais (Bunphrionsabail) leis an Úcráin ag an dara comhdháil idir-rialtasach.
- 30 Meán Fómhair 2025
Chuir an Úcráin próiseas scagtha na gcaibidlí caibidlíochta i gcrích leis an gCoimisiún Eorpach.
- 25 Meitheamh 2024
Chuir an tAontas tús foirmiúil leis an gcaibidlíocht aontachais leis an Úcráin ag an gcéad chomhdháil idir-rialtasach.
- 12 Márta 2024
Chuir an Coimisiún dréachtchreat le haghaidh chaibidlíocht aontachais na hÚcráine faoi bhráid na Comhairle.
- 14 Nollaig 2023
Chinn an Chomhairle Eorpach tús a chur le caibidlíocht aontachais leis an Úcráin.
- 8 Samhain 2023
Mhol an Coimisiún don Chomhairle tús a chur le caibidlíocht aontachais leis an Úcráin.
- 23 Meitheamh 2022
D’aithin an Chomhairle Eorpach an pheirspictíocht Eorpach agus bhronn sé stádas mar iarrthóir ar an Úcráin.
- 17 Meitheamh 2022
D’eisigh an Coimisiún a thuairim ar an iarratas ar bhallraíocht san Aontas.
- 28 Feabhra 2022
Chuir an Úcráin isteach ar bhallraíocht san Aontas.
Nuashonraíodh an leathanach seo den uair dheireanach an 15 Meitheamh 2026