In-normalità ġdida

Ir-Renju Unit ħareġ mill-Unjoni Ewropea fil-31 ta’ Jannar 2020, wara 47 sena ta’ sħubija fl-UE.

Ir-Renju Unit tilef id-drittijiet u l-benefiċċji kollha li kellu bħala Stat Membru tal-UE u m’għadux parti mis-Suq Uniku u l-Unjoni Doganali tal-UE. M’għadux kopert mill-ftehimiet internazzjonali tal-UE.

Erba’ trattati jirregolaw ir-relazzjonijiet bejn l-UE u r-Renju Unit:

• il-Ftehim dwar il-Ħruġ bejn l-UE u r-Renju Unit, fis-seħħ mill-1 ta’ Frar 2020, żgura li l-ħruġ tar-Renju Unit mill-UE seħħ b’mod ordnat, u jipproteġi d-drittijiet taċ-ċittadini tal-UE u taċ-ċittadini tar-Renju Unit, l-interessi finanzjarji tal-UE, u l-paċi u l-istabbiltà fil-gżira tal-Irlanda.

• il-Ftehim ta’ Kummerċ u Kooperazzjoni bejn l-UE u r-Renju Unit beda japplika b’mod proviżorju fl-1 ta’ Jannar 2021, u jkopri għadd ta’ oqsma ta’ interess reċiproku għall-UE u għar-Renju Unit u jikkonsisti fi Ftehim ta’ Kummerċ Ħieles, kooperazzjoni ambizzjuża dwar kwistjonijiet ekonomiċi, soċjali, ambjentali u tas-sajd, u sħubija mill-qrib għas-sigurtà taċ-ċittadini tagħna, koperta minn kapitolu ta’ governanza b’saħħtu b’infurzar vinkolanti, mekkaniżmi effettivi għas-soluzzjoni tat-tilwim u miżuri ta’ salvagwardja f’każ li l-obbligi ma jiġux issodisfati.

• il-Ftehim dwar is-Sigurtà tal-Informazzjoni bejn l-UE u r-Renju Unit, marbut mal-istruttura istituzzjonali tal-Ftehim ta’ Kummerċ u Kooperazzjoni bejn l-UE u r-Renju Unit, u applikabbli proviżorjament mill-1 ta’ Jannar 2021, se jippermetti lill-UE u lir-Renju Unit jiskambjaw informazzjoni klassifikata, billi japplikaw garanziji b’saħħithom fir-rigward tat-trattament u l-protezzjoni tal-informazzjoni skambjata.

• u l-Ftehim bejn l-UE u r-Renju Unit dwar il-kooperazzjoni fl-użi sikuri u paċifiċi tal-enerġija nukleari, applikabbli wkoll proviżorjament mill-1 ta’ Jannar 2021, jipprovdi għal kooperazzjoni wiesgħa dwar is-sikurezza nukleari u l-użi paċifiċi tal-enerġija nukleari, mirfuda minn assigurazzjonijiet li ż-żewġ naħat se jikkonformaw mal-obbligi internazzjonali ta’ nonproliferazzjoni u mhux se jbaxxu l-livell attwali tagħhom tal-istandards tas-sikurezza nukleari.

Fl-okkażjoni tal-iffirmar, il-Partijiet għamlu serje ta’ Dikjarazzjonijiet.

Anke b’dawn it-trattati fis-seħħ, hemm konsegwenzi wiesgħa u estensivi għaċ-ċittadini, in-negozji, l-amministrazzjonijiet pubbliċi u l-partijiet ikkonċernati kemm fl-UE kif ukoll fir-Renju Unit. Biex jittaffa t-tfixkil, il-Kummissjoni ħarġet gwida estensiva biex tgħin lill-partijiet ikkonċernati affettwati kollha jħejju ruħhom. Il-Kummissjoni ħadet ukoll il-passi meħtieġa biex tadatta l-qafas legali tal-UE għas-sitwazzjoni l-ġdida.