Il-Finanzi u l-Patt Ekoloġiku

Biex jinkisbu l-għanijiet stabbiliti mill-Patt Ekoloġiku Ewropew, il-Kummissjoni wiegħdet li timmobilizza mill-anqas €1 triljun f’investimenti sostenibbli matul l-għaxar snin li ġejjin.

30% tal-baġit pluriennali tal-UE (2021-2028) u l-istrument uniku tal-UE tan-NextGenerationEU (NGEU) għall-irkupru mill-pandemija tal-COVID-19, ġew allokati għal investimenti ekoloġiċi.

Il-pajjiżi tal-UE jridu jiddedikaw mill-anqas 37% tal-finanzjament li jirċievu taħt il-Faċilità għall-Irkupru u r-Reżiljenza ta’ €672.5 biljun għal investimenti u riformi li jappoġġjaw l-objettivi klimatiċi. L-investimenti u r-riformi kollha li għandhom jiġu ffinanzjati b’dan il-mod ma għandhom jagħmlu ebda ħsara sinifikanti lill-objettivi ambjentali tal-UE. Il-Kummissjoni, f’isem l-UE, beħsiebha tiġbor 30% tal-fondi taħt l-NGEU permezz tal-ħruġ ta’ bonds ekoloġiċi.

Politika ta’ Koeżjoni tal-UE

Il-politika ta’ Koeżjoni tal-UE tgħin lill-pajjiżi, ir-reġjuni, il-gvernijiet lokali u l-bliet tal-UE jimplimentaw investimenti kbar li jikkontribwixxu għall-Patt Ekoloġiku Ewropew. Għandhom jiddedikaw mill-anqas 30% ta’ dak li jirċievu mill-Fond Ewropew għall-Iżvilupp Reġjonali għal dawn il-prijoritajiet. Barra minn hekk, 37% tal-Fond ta’ Koeżjoni se jikkontribwixxi speċifikament biex tinkiseb in-newtralità klimatika sal-2050.

Il-Kummissjoni stabbilixxiet il-Pjan ta’ Investiment għall-Patt Ekoloġiku Ewropew (EGDIP), magħruf ukoll bħala l-Pjan ta’ Investiment għal Ewropa Sostenibbli (SEIP), bħala parti mill-Patt Ekoloġiku. Dan jinkludi l-Mekkaniżmu għal Tranżizzjoni Ġusta, li jiffoka fuq l-iżgurar ta’ tranżizzjoni xierqa u ġusta lejn ekonomija ekoloġika. Hu se jimmobilizza investimenti sinifikanti matul il-perjodu 2021-2027 biex jappoġġja liċ-ċittadini tar-reġjuni l-aktar milquta mit-tranżizzjoni.

Mobilizzazzjoni tal-investimenti pubbliċi u privati

Il-programm InvestEU se jikkontribwixxi għal dan l-isforz u jipprovdi lill-UE b’finanzjament kruċjali fit-tul billi jingrana fondi privati u pubbliċi sostanzjali. Ir-Regolament InvestEU jipprevedi li l-fond InvestEU kollu kemm hu se jimmira mill-anqas 30% tal-investiment li jikkontribwixxi għall-objettivi klimatiċi. Skema ta’ Tranżizzjoni Ġusta dedikata se tiġġenera investiment addizzjonali għall-benefiċċju tat-territorji ta’ Tranżizzjoni Ġusta f’komplementarjetà mal-Fond għal Tranżizzjoni Ġusta u l-faċilità ta’ self għas-settur pubbliku.

Barra minn hekk, il-miżuri ta’ finanzjament sostenibbli, inkluż ir-Regolament dwar it-Tassonomija għall-klassifikazzjoni tal-investimenti ekoloġiċi, se jikkontribwixxu għall-Patt Ekoloġiku Ewropew billi jagħtu spinta lill-investiment tas-settur privat fi proġetti ekoloġiċi u sostenibbli.

Il-Kummissjoni Ewropea adottat sett ta’ proposti leġiżlattivi sabiex il-politiki tal-UE dwar il-klima, l-enerġija, it-trasport u t-tassazzjoni tagħmilhom tajbin biex inaqqsu l-emissjonijiet tal-gassijiet serra b’mill-inqas 55% sal-2030, meta mqabbla mal-livelli tal-1990. Aktar informazzjoni dwar Inwettqu l-Patt Ekoloġiku Ewropew.