Pjan ta’ rkupru għall-Ewropa

L-akbar pakkett ta’ stimolu li qatt ġie ffinanzjat

Il-baġit fit-tul tal-UE, flimkien man-NextGenerationEU (NGEU), l-istrument temporanju mfassal biex jagħti spinta lill-irkupru, jiffurmaw l-akbar pakkett ta’ stimolu li qatt ġie ffinanzjat fl-Ewropa. B’kollox, €2.018 triljun fi prezzijiet attwali* qed jgħinu biex l-Ewropa tinbena mill-ġdid wara l-COVID-19. Din se tkun Ewropa aktar ekoloġika, aktar diġitali u aktar reżiljenti.

Il-fondi qed jintużaw biex jindirizzaw l-aktar sfidi importanti quddiem l-Ewropa u biex jappoġġjaw lil dawk fil-bżonn. Wara l-invażjoni tal-Ukrajna mir-Russja, il-baġit tal-UE ġie mmobilizzat biex jipprovdi assistenza ta’ emerġenza u appoġġ, fl-Ukrajna u fil-pajjiżi tal-UE, u biex itaffi l-konsegwenzi umanitarji tal-gwerra.

^{*€1.8 triljun fi prezzijiet tal-2018}

Fatti u figuri tal-QFP 2021-2027 u tan-NextGenerationEU

Elementi ewlenin tal-pakkett

Aktar minn 50% tal-baġit fit-tul u tan-NextGenerationEU qed jappoġġjaw il-modernizzazzjoni, pereżempju, bis-saħħa ta’:

Barra minn hekk, il-pakkett jagħti attenzjoni lil:

Novitajiet ewlenin

Qafas Finanzjarju Pluriennali 2021-2027 u allokazzjonijiet totali tan-NextGenerationEU għal kull intestatura*

_{L-ammonti kollha huma f’€, fi prezzijiet attwali. Sors: Il-Kummissjoni Ewropea}

Il-qofol tan-NextGenerationEU hu l-Faċilità għall-Irkupru u r-Reżiljenza (RRF) – strument li joffri għotjiet u self biex jiġu appoġġjati riformi u investimenti fl-Istati Membri tal-UE b’valur totali ta’ €723.8 biljun. Biex jirċievu fondi mill-Faċilità għall-Irkupru u r-Reżiljenza, l-Istati Membri jeħtieġ li jħejju Pjanijiet għall-Irkupru u r-Reżiljenza li jiddeskrivu kif se jinvestu l-fondi. Barra minn hekk, jeħtieġ li jissodisfaw l-istadji importanti u l-miri rilevanti, u qabel ma jkun jista’ jsir kwalunkwe żborż taħt l-RRF, il-Kummissjoni tivvaluta l-ilħuq sodisfaċenti ta’ kull stadju importanti u mira.

Biex tikkonsulta l-pjanijiet ta’ Stati Membri differenti tal-UE u ssegwi l-iżborżi li saru s’issa, ara t-Tabella ta’ Valutazzjoni interattiva għall-Irkupru u r-Reżiljenza.

Il-bqija tal-fondi min-NextGenerationEU qed jiġu żborżati lill-Istati Membri tal-UE minn diversi programmi tal-UE: l-Assistenza fl-Irkupru għall-Koeżjoni u għat-Territorji tal-Ewropa (REACT-EU), Orizzont Ewropa, InvestEU, il-Fond Agrikolu Ewropew għall-Iżvilupp Rurali jew il-Fond għal Tranżizzjoni Ġusta (JTF).

Wara l-aggressjoni tar-Russja fuq l-Ukrajna, l-Istati Membri tal-UE jistgħu jużaw xi wħud minn dawn il-fondi biex jindirizzaw il-ħtiġijiet tar-refuġjati li jaslu fit-territorji tagħhom.

Tqassim tan-NextGenerationEU

_{L-ammonti kollha huma f’€, fi prezzijiet attwali. Sors: Il-Kummissjoni Ewropea}

Allokazzjonijiet nazzjonali

Il-baġit tal-UE mhux u qatt ma kien dwar li trodd lura skont kemm tirċievi jew viċeversa. L-Istati Membri kollha jibbenefikaw mill-fatt li jkunu parti mis-suq uniku, u jindirizzaw flimkien l-isfidi komuni. Il-fondi tal-UE, pereżempju taħt il-fondi ta’ koeżjoni jew Orizzont Ewropa, imorru f’kull rokna tal-UE.

F'ċerti oqsma ta’ politika l-Istati Membri rċevew ammonti assenjati minn qabel. Tista’ tikkonsultahom hawnhekk.

Self għall-finanzjament tal-irkupru

Biex tiffinanzja n-NextGenerationEU, il-Kummissjoni Ewropea - f’isem l-Unjoni Ewropea – qed tissellef fis-swieq b'rati aktar favorevoli minn bosta Stati Membri u tqassam mill-ġdid l-ammonti.

Qabel in-NextGenerationEU, il-Kummissjoni Ewropea diġà ħarġet bonds, pereżempju biex tiffinanzja self lill-Istati Membri tal-UE u lil pajjiżi terzi, inklużi sa €100 biljun għall-programm SURE biex jiġu appoġġjati l-impjiegi u n-nies jibqgħu jaħdmu waqt il-pandemija tal-COVID-19.

L-Unjoni Ewropea se tiġbor sa madwar €800 biljun fi prezzijiet attwali sal-2026 għan-NextGenerationEU permezz ta’ strateġija ta’ finanzjament diversifikata.

L-UE bħala mutwatarja

Pjan direzzjonali ċar lejn sorsi ġodda ta’ dħul biex jgħinu fil-ħlas lura tas-self.

Fil-Ftehim interistituzzjonali ta’ Diċembru 2021, il-Parlament Ewropew, il-Kunsill u l-Kummissjoni qablu li jaħdmu biex jintroduċu biżżejjed riżorsi proprji ġodda biex ikopru r-ripagamenti tan-NextGenerationEU.

F’Diċembru 2021, il-Kummissjoni għalhekk ipproponiet tliet sorsi ġodda ta’ dħul għall-baġit tal-UE, biex tgħin tħallas lura l-parti tal-għotjiet tan-NextGenerationEU. Din il-proposta tikkontribwixxi wkoll għall-finanzjament tal-Fond Soċjali għall-Klima, li għandu l-għan li jiżgura li ħadd ma jitħalla jibqa' lura fit-tranżizzjoni lejn ekonomija dekarbonizzata.

Fl-20 ta’ Ġunju 2023, il-Kummissjoni lestiet il-proposta tagħha għall-ġenerazzjoni li jmiss ta’ riżorsi proprji. Il-pakkett jinkludi riżorsa proprja statistika temporanja ġdida bbażata fuq il-profitti tal-kumpaniji. Wara l-ftehim politiku dwar il-pakkett Lesti għall-mira ta’ 55%, li għandu l-għan li jiżgura li l-politiki tal-UE jikkontribwixxu għan-newtralità klimatika tal-kontinent tagħna, il-Kummissjoni aġġustat ukoll il-proposti dwar ir-riżorsi proprji bbażati fuq l-iskema tal-UE għall-Iskambju ta’ Kwoti tal-Emissjonijiet (ETS) u l-Mekkaniżmu ta’ Aġġustament tal-Karbonju fil-Fruntieri (CBAM) meta mqabbla mal-proposti oriġinali ta’ Diċembru 2021.

Barra minn hekk, tinżamm ir-riżorsa proprja bbażata fuq is-sehem tal-profitti residwi minn kumpaniji multinazzjonali li se jiġu riallokati lill-Istati Membri tal-UE skont il-ftehim tal-OECD/G20 dwar riallokazzjoni tad-drittijiet ta’ tassazzjoni (“l-Ewwel Pilastru”). Il-Kummissjoni qed taħdem mal-Parlament Ewropew u mal-Istati Membri tal-UE fil-Kunsill sabiex ikun hemm approvazzjoni rapida tal-għejun ġodda ta’ dħul.

Sorsi ta’ dħul għall-baġit tal-UE għall-2021-2027

Il-ġenerazzjoni li jmiss ta’ riżorsi proprji tal-UE

Il-benefiċjarji

Kulħadd jista’ jibbenefika mill-baġit tal-UE. Sib sejħiet miftuħin u li se jinfetħu dalwaqt għal proposti ta' finanzjament, ikseb informazzjoni ta' sfond dwar il-proċessi u l-programmi ta' finanzjament, u applika online.

Tgħallem dwar il-proċess tal-offerti u dwar l-opportunitajiet biex tinnegozja mal-Kummissjoni Ewropea.

Kuntest

Il-Kummissjoni ressqet il-proposta tagħha għall-baġit fit-tul li jmiss tal-UE fit-2 ta’ Mejju 2018.

Fis-27 ta’ Mejju 2020, b’reazzjoni għall-kriżi bla preċedent ikkawżata mill-coronavirus, il-Kummissjoni Ewropea pproponiet l-istrument ta’ rkupru temporanju NextGenerationEU, kif ukoll rinforzi mmirati għall-baġit fit-tul tal-UE għall-2021-2027.

Fil-21 ta’ Lulju 2020, anqas minn xahrejn wara, il-kapijiet ta’ stat jew ta’ gvern tal-UE laħqu ftehim politiku dwar il-pakkett.

L-adozzjoni finali mill-Kunsill saret fis-17 ta’ Diċembru 2020.

Il-proċess tan-negozjati