An 18 Aibreán déanaimid ceiliúradh ar 75 bliana ó síníodh Conradh Pháras, an conradh lenar bunaíodh an Comhphobal Eorpach do Ghual agus Cruach, agus an chéad cheann ónar eascair bunú an Aontais Eorpaigh. Leis an gconradh sin, a shínigh an Bheilg, Poblacht Chónaidhme na Gearmáine, an Fhrainc, an Iodáil, Lucsamburg agus an Ísiltír, réitíodh an bealach chun comhtháthú eacnamaíoch na hEorpa a dhoimhniú, Comhphobal Eacnamaíoch na hEorpa a bhunú le Conradh na Róimhe sa bhliain 1957 agus an tAontas Eorpach a chur ar bun le Conradh Maastricht in 1992. Ba é Aire Gnóthaí Eachtracha na Fraince, Robert Schuman, a mhol go mbunófaí comhphobal do ghual agus cruach san óráid a thug sé an 09 Bealtaine 1950, ar a dtugtar Dearbhú Schuman. Tar éis dó éifeachtaí tubaisteacha an dara cogadh domhanda a fheiceáil, is mar seo a labhair sé: “Leis an dlúthpháirtíocht táirgthe a bhunófaí ar an mbealach sin, ní amháin go mbeidh aon chogadh idir an Fhrainc agus an Ghearmáin doshamhlaithe, ach beidh sé dodhéanta ó thaobh ábhair de”. Seoladh an Comhphobal Eorpach do Ghual agus Cruach bliain ina dhiaidh sin. Ba é príomhaidhm an Chomhphobail saorghluaiseacht an ghuail agus na cruach a eagrú, rochtain ar fhoinsí táirgeachta a éascú, agus trédhearcacht praghsanna a chinntiú. An tráth sin, bhí siombalachas nach beag ag baint le rogha an ghuail agus na cruach: ba thionscail ríthábhachtacha iad beirt ag tús na 1950í. I dteannta na mbuntáistí eacnamaíocha a bhain leis an gcomhphobal, bhí sé i gceist freisin deireadh na hiomaíochta idir an Fhrainc agus an Ghearmáin a chomóradh trína n-acmhainní a chomhthiomsú. Bhí an cómhargadh guail agus cruach le bheith ina thionscadal trialach a bhféadfaí a leathnú de réir a chéile go réimsí eacnamaíocha eile, agus a mbeadh Eoraip pholaitiúil mar thoradh air sa deireadh. Leagadh bunchloch leis an gConradh do go leor de na hinstitiúidí atá san Aontas sa lá atá inniu ann freisin, nuair a bunaíodh feidhmeannas ar tugadh an ‘tArd-Údarás’ air, réamhtheachtaí an Choimisiúin Eorpaigh mar a thugtar inniu air, mar aon le Tionól Parlaiminteach, Comhairle Airí, Cúirt Bhreithiúnais agus Coiste Comhairleach. Tuilleadh eolais Conarthaí bunaidh Sonraí Dáta foilsithe17 Aibreán 2026ÚdarArd-Stiúrthóireacht na Cumarsáide
