Mur għall-kontenut ewlieni
Logo tal-Kummissjoni Ewropea
mt
Il-Kummissjoni Ewropea

Il-protezzjoni tad-data u l-privatezza tiegħek

Il-protezzjoni tad-data u l-privatezza tiegħek

Id-data tiegħek hija importanti

Ilkoll nikkondividu d-data personali kuljum, fix-xiri online, fil-prenotazzjonijiet, jew fl-abbonament għal servizz ġdid. Id-data tiegħek hija importanti. Int biss għandek tiddeċiedi kif tintuża. 

L-UE għandha regoli b’saħħithom fis-seħħ biex tiżgura li d-data tiegħek dejjem tiġi ttrattata b’mod responsabbli, u li int tibqa’ fil-kontroll.

Kun af drittijietek

  • Kun af x’data tinżamm dwarek

    Tista’ tistaqsi lil kwalunkwe organizzazzjoni x’data personali għandha dwarek, għaliex tinsab għandha, u kif qed tużaha. It-tweġiba trid tasal fi żmien xahar, mingħajr ħlas. 

  • Ikkoreġi d-data tiegħek

    Jekk organizzazzjoni jkollha informazzjoni mhux akkurata jew mhux kompluta dwarek, għandek id-dritt li titlob biex tiġi kkoreġuta. 

  • Itlob li d-data tiegħek titħassar

    Tista’ titlob li d-data tiegħek titħassar, meta ma tkunx iktar meħtieġa, jew jekk tiddeċiedi li ma tridx li tintuża iktar. Dan jissejjaħ id-“dritt li tintesa”.

  • Għid le għal ċerti użi

    Għandek id-dritt li toġġezzjona għal kif qed tintuża d-data tiegħek — pereżempju, għal skopijiet ta’ kummerċjalizzazzjoni diretta. Jekk toġġezzjona, l-organizzazzjoni trid tieqaf tużaha għal dak l-iskop. 

  • Ħu d-data tiegħek miegħek

    Jekk taqleb minn servizz għal ieħor, tista’ titlob li d-data personali tiegħek tiġi ttrasferita direttament lill-fornitur il-ġdid. Qatt m’għandek tħossok imsakkar. 

  • Skopri jekk xi ħaġa tmur ħażin

    Jekk id-data personali tiegħek tintilef, tinsteraq jew tiġi aċċessata mingħajr awtorizzazzjoni, l-organizzazzjoni responsabbli għad-data tiegħek trid tinfurmak direttament. 

Id-data tiegħek, id-drittijiet tiegħek

Qatt ħassejt li l-mowbajl tiegħek qed jisimgħek? Id-data tiegħek tirrifletti ħajtek — mis-siti web li żżur sal-għażliet li tagħmel kuljum. Jekk tuża app tal-fitness, pereżempju, l-informazzjoni dwar il-passi, l-irqad jew ir-rata ta’ kemm tħabbat qalbek għandha dejjem tibqa’ taħt il-kontroll tiegħek. 

Kif tieħu azzjoni

Jekk taħseb li d-data personali tiegħek mhijiex korretta, qed tintuża b’mod li ma taqbilx miegħu, jew qed tiġi ttrattata b’mod inġust, tista’ tieħu azzjoni.

📧Ikkuntattja l-organizzazzjoni

Ikkuntattja lill-kumpanija jew lill-organizzazzjoni li għandha d-data tiegħek u spjega għaliex trid taċċessaha, tikkoreġiha, tħassarha, jew toġġezzjona għal kif qed tintuża. Normalment tista’ tagħmel dan bl-email jew permezz ta’ formola online, u ma għandekx bżonn tuża lingwaġġ legali. It-tweġiba trid tasal fi żmien xahar.

Sir af iktar dwar drittijietek
🌍Ikkuntattja l-awtorità nazzjonali tal-protezzjoni tad-data tiegħek

M’intix sodisfatt(a)? Jekk l-organizzazzjoni ma tweġibx, jew ma tkunx kuntent bit-tweġiba tagħha, tista’ teskala l-kwistjoni quddiem l-awtorità nazzjonali għall-protezzjoni tad-data tiegħek, li tgħin biex jiġi żgurat li r-regoli dwar il-protezzjoni tad-data jiġu applikati kif suppost madwar l-UE.

Awtoritajiet nazzjonali għall-protezzjoni tad-data

L-UE: għandha l-iktar regoli b’saħħithom fid-dinja dwar il-protezzjoni tad-data

Mill-2018, ir-Regolament Ġenerali dwar il-Protezzjoni tad-Data (GPDR), l-iktar liġi b’saħħitha fid-dinja dwar il-protezzjoni tad-data, jiggarantixxi drittijietek. 

  • Il-GDPR japplika għal kwalunkwe organizzazzjoni li tittratta d-data personali tiegħek, pubblika jew privata, kbira jew żgħira.
  • Jekk kumpanija toffri oġġetti jew servizzi lin-nies fl-UE, il-GDPR ikopri kif din tittratta d-data tagħhom. U dawn ir-regoli ma jiqfux mal-fruntieri tal-UE. Jekk id-data tiegħek tivvjaġġa lil hinn mill-Ewropa, l-UE tiżgura li l-istess standards għoljin ta’ protezzjoni jsegwuha.

Fl-UE hemm ukoll liġijiet li jipproteġu l-privatezza tiegħek online. 

  • Dawn il-liġijiet iżommu l-konverżazzjonijiet tiegħek privati, jagħtuk kontroll fuq il-cookies, u jħalluk tagħżel li ma tirċevix messaġġi ta’ kummerċjalizzazzjoni mhux mixtieqa.

Ħu l-kontroll

Filwaqt li drittijietek huma l-iktar protezzjoni b’saħħitha tiegħek, hemm ukoll passi ta’ kuljum li tista’ tieħu biex iżżomm id-data personali tiegħek sikura. 

🔐 Uża passwords b’saħħithom u uniċi

Uża password differenti għal kull wieħed mill-kontijiet online tiegħek, u agħmilhom diffiċli biex taqtahom. Software tal-ġestjoni tal-password jista’ jgħinek fiż-żamma tal-passwords.

🤔 Aħsibha darbtejn qabel tikkondividi

Ladarba l-informazzjoni personali tkun online, jista’ jkun diffiċli li titneħħa. Qabel tikkondividi d-dettalji dwarek jew dwar l-oħrajn, ikkunsidra min jista’ jarahom u kif jistgħu jintużaw.

🎣 Ibqa’ b’seba’ għajnejn għall-qerq

Emails u messaġġi frodulenti spiss jippruvaw iqarrqu bik biex tagħti l-informazzjoni personali. Jekk tħoss li xi ħaġa ma tkunx mistennija — speditur mhux familjari, talba urġenti, link suspettuża — tikklikkjax.

🧐 Aqra qabel taqbel

Meta sit web jew app titlob il-kunsens tiegħek biex tuża d-data tiegħek, ħu l-ħin tiegħek biex tifhem dak li qed taqbel miegħu. Xi servizzi jaf jidhru mingħajr ħlas mal-ewwel daqqa t’għajn, iżda jistgħu jimmonetizzaw id-data tiegħek minflok ma jitolbu tariffa ta’ abbonament. 

⚙️ Rieżamina l-konfigurazzjoni tal-privatezza tiegħek

Il-biċċa l-kbira tal-apps u tal-pjattaformi tal-midja soċjali jħalluk tikkontrolla min jista’ jara l-informazzjoni tiegħek u kif tintuża. Ħu ftit minuti biex tikkontrolla — il-konfigurazzjonijiet prestabbiliti mhux dejjem ikunu fl-aħjar interessi tiegħek.

⚠️ Oqgħod għassa għal xi xejriet suspettużi

Xi siti web jużaw inganni ta’ disinn qarrieqi biex jħeġġuk taċċetta l-cookies: il-ħabi tal-buttuna tar-rifjut, l-aċċettazzjoni bi klikk waħda filwaqt li r-rifjut jirrikjedi diversi passi, jew l-użu ta’ kliem qarrieqi bħal “Billi tuża dan is-sit inti taqbel...”. Skont ir-regoli tal-UE, li tgħid le għandu jkun faċli daqs li tgħid iva.

👋 Ħassar l-abbonament

Kull email ta’ kummerċjalizzazzjoni li tirċievi tuża d-data personali tiegħek. Xbajt? Iftaħ waħda minnhom u fittex “ħassar l-abbonament”, “ġestixxi l-preferenzi”, “tirċevix”: skont ir-regoli tal-UE din l-għażla trid tkun preżenti dejjem.

Referenzi u riżorsi

Din il-paġna ġiet aġġornata l-aħħar: 16 Lulju 2026