Oqsma ta' azzjoni tal-UE

3 prinċipji

3 prinċipji jiddeterminaw kif u f'liema oqsma tista' taġixxi l-UE:

• l-għoti ta' kompetenzi – l-UE għandha biss dik l-awtorità mogħtija mit-trattati tal-UE, li ġew ratifikati mill-pajjiżi membri kollha
• il-proporzjonalità – l-azzjoni tal-UE ma tistax tmur lil hinn minn dak li hu neċessarju biex tikseb l-objettivi tat-trattati
• is-sussidjarjetà – f'oqsma fejn jistgħu jaġixxu l-UE jew il-gvernijiet nazzjonali, l-UE tista' tintervieni biss jekk tkun tista' taġixxi b'mod aktar effettiv

L-UE biss tista' tilleġiżla

F'ċerti oqsma, l-UE biss tista' tgħaddi l-liġijiet. Ir-rwol tal-pajjiżi membri hu limitat għall-applikazzjoni tal-liġi, sakemm l-UE ma tawtorizzahomx jadottaw ċerti liġijiet huma stess. F'dawn l-oqsma, l-UE għandha dawk li t-trattati jsejħulhom kompetenzi esklużivi:

• unjoni doganali
• regoli tal-kompetizzjoni għas-suq uniku
• politika monetarja għall-pajjiżi taż-żona tal-euro
• kummerċ u ftehimiet internazzjonali (taħt ċerti ċirkustanzi)
• pjanti u annimali tal-baħar regolati mill-politika komuni tas-sajd

L-UE jew il-gvernijiet nazzjonali jistgħu jilleġiżlaw

F'ċerti oqsma, kemm l-UE kif ukoll il-pajjiżi membri jistgħu jgħaddu l-liġijiet. Iżda l-pajjiżi membri jistgħu jagħmlu dan biss jekk l-UE ma tkunx diġà pproponiet liġijiet jew iddeċidiet li ma tagħmilx dan. F'dawn l-oqsma, l-UE għandha dawk li t-trattati jsejħulhom kompetenzi kondiviżi:

• suq uniku
• impjiegi u affarijiet soċjali
• koeżjoni ekonomika, soċjali u territorjali
• agrikoltura
• sajd
• ambjent
• protezzjoni tal-konsumatur
• trasport
• networks trans-Ewropej
• enerġija
• ġustizzja u drittijiet fundamentali
• migrazzjoni u affarijiet interni
• saħħa pubblika (għall-aspetti definiti fl-Artikolu 168 tat-Trattat dwar il-Funzjonament tal-Unjoni Ewropea)
• riċerka u spazju
• kooperazzjoni għall-iżvilupp u għajnuna umanitarja

Il-pajjiżi membri jilleġiżlaw, l-UE tgħin

F'ċerti oqsma, l-UE tista' biss tappoġġja, tikkoordina jew tikkomplementa l-azzjoni tal-pajjiżi membri. M'għandha ebda setgħa biex tgħaddi l-liġijiet u ma tistax tinterferixxi fl-abbiltà tal-pajjiżi membri biex jagħmlu dan. F'dawn l-oqsma, l-UE għandha dawk li t-trattati jsejħulhom kompetenzi ta' appoġġ.

• saħħa pubblika
• industrija
• kultura
• turiżmu
• edukazzjoni u taħriġ, żgħażagħ u sport
• protezzjoni ċivili
• kooperazzjoni amministrattiva

L-UE għandha rwol speċjali

F'ċerti oqsma, kompetenzi speċjali jippermettu lill-UE li jkollha rwol partikolari jew li tmur lil hinn minn dak li normalment hu permess taħt it-trattati:

• il-koordinazzjoni ta' politiki ekonomiċi u tal-impjiegi
• id-definizzjoni u l-implimentazzjoni tal-Politika Estera u ta' Sigurtà Komuni
• il-"klawsola tal-flessibbiltà", li taħt kundizzjonijiet stretti tippermetti lill-UE biex tieħu azzjoni barra mill-oqsma normali ta' responsabbiltà tagħha