Infheistíocht a dhéanamh i ndaoine, i mBallstáit agus i réigiúin

Pleananna infheistíochta saincheaptha

Leis an mbuiséad fadtéarmach nua, tabharfar le chéile príomhchistí an Aontais a chuirfidh na Ballstáit agus na Réigiúin i bhfeidhm faoi straitéis chomhleanúnach amháin, í dírithe ar an mbeartas comhtháthaithe agus talmhaíochta. Cuirfear an straitéis sin chun feidhme trí Phleananna Comhpháirtíochta Náisiúnta agus Réigiúnaí a bheidh níos simplí, níos solúbtha agus níos saincheaptha, chun tionchar gach euro a infheistítear a uasmhéadú.

Is é is aidhm do na pleananna an méid seo a leanas a dhéanamh:

• éagothromaíochtaí réigiúnacha a laghdú
• an bhochtaineacht a chomhrac
• tacú leis an talmhaíocht agus leis an iascach
• cuidiú chun dúshláin teorann a bhainistiú.

Tá siad saincheaptha toisc go bhfuil riachtanais éagsúla ag na réigiúin, agus is iad is fearr a thuigeann conas tosaíochtaí an Aontais a chur i bhfeidhm go háitiúil. 

Déanfar na Pleananna a cheapadh agus a chur i bhfeidhm i ndlúthchomhar idir an Coimisiún, na Ballstáit, na Réigiúin, na pobail áitiúla agus na páirtithe leasmhara ábhartha eile go léir. Beidh gach Ballstát in ann rochtain a fháil ar an méid céanna cistí agus a bhí ann roimhe seo. 

Iasachtaí nua ón Aontas le haghaidh spriocanna straitéiseacha

Den chéad uair riamh, cuirfidh an tAontas suas le €150 billiún d’iasachtaí (le tacaíocht ón Aontas) ar fáil chun cabhrú le tíortha infheistíocht a dhéanamh i réimsí amhail tionscal na cosanta, bonneagar fuinnimh nó teicneolaíochtaí straitéiseacha. Tugtar ‘Catalyst Europe’ ar na hiasachtaí sin, agus cuireann siad acmhainní breise ar fáil do na Ballstáit chun tacú le cuspóirí Eorpacha. 

An ceartas agus an smacht reachta

Tríd an gclár um Cheartas, tiomnóidh an tAontas beagnach €800 milliún chun an smacht reachta a chaomhnú, cearta bunúsacha na saoránach a chosaint, agus an daonlathas a neartú. 

Úsáidfear an maoiniú sin chun an méid seo a leanas a dhéanamh:

• comhar breithiúnach in ábhair shibhialta agus choiriúla a chur chun cinn
• tacú le hoiliúint do bhreithiúna agus do ghairmithe dlí
• rochtain chomhionann ar cheartas a chinntiú do gach saoránach agus gnólacht

Leis na pleananna comhpháirtíochta náisiúnta agus réigiúnaí, beidh an smacht reachta agus cearta bunúsacha ina gcoinníoll le haghaidh infheistíochta agus beidh siad dírithe ar athchóiriú. Beidh coimircí láidre agus coinníollacha soiléire ann chun a chinntiú go n-úsáidfear an t-airgead go freagrach agus go héifeachtach.