De réir mar a théann an Eoraip trí aistrithe móra, cuir i gcás an t-aistriú glan, an t-aistriú digiteach, agus an t-aistriú déimeagrafach, tá sé níos tábhachtaí ná riamh infheistíocht a dhéanamh sa tsócmhainn is mó atá aici, muintir na hEorpa. Beidh buiséad fadtéarmach an Aontais ríthábhachtach chun cearta sóisialta a chur chun cinn.
Trí infheistíochtaí spriocdhírithe, tacóidh sé leis na rudaí seo a leanas:
- poist ar ardchaighdeán
- cuimsiú sóisialta
- oideachas agus scileanna
- tithíocht inacmhainne agus bonneagar sóisialta.
Is éard atá i gceist le hinfheistíocht a dhéanamh i ndaoine freisin tacú le rannpháirtíocht dhaonlathach agus spás sibhialta bríomhar, chomh maith le saoirse ealaíonta agus chultúrtha a chosaint. Leanfaidh an buiséad fadtéarmach d’infheistíocht a dhéanamh i réimsí na scileanna, an chultúir, na meán agus na luachanna.
Príomhfhigiúirí
Infheistíochtaí a chur in oiriúint do riachtanais áitiúla
Mar chuid de na pleananna comhpháirtíochta náisiúnta agus réigiúnaí nua, tacóidh Ciste Sóisialta na hEorpa le cuspóirí oideachais, fostaíochta agus sóisialta, cuir i gcás:
- athchóirithe agus infheistíochtaí san athsciliú agus san uas-sciliú
- feabhas a chur ar cháilíocht na gcóras oideachais agus oiliúna
- bochtaineacht agus easpa dídine a chomhrac.
Ina theannta sin, bainfidh na Ballstáit tairbhe as iasachtaí beartais Catalyst Europe chun tacú le cuimsiú sóisialta agus forbairt scileanna.
Dul i ngleic leis an mbochtaineacht
Trí phleananna comhpháirtíochta, déanfaidh Ciste Sóisialta na hEorpa an méid seo a leanas:
- comhdheiseanna do chách a chur chun cinn
- tacú le líontáin láidre sábháilteachta sóisialta
- cuimsiú sóisialta agus
- cothroime idirghlúine a chothú agus
- an bhochtaineacht a chomhrac
Tacóidh na pleananna nua leis na daoine is leochailí, rud a neartóidh an tsamhail shóisialta Eorpach.
Nuálaíocht shóisialta a chur chun cinn
Cuirfidh Saoráid an Aontais borradh faoin nuálaíocht ar fud an gheilleagair shóisialta trí thacú leis an méid seo a leanas:
- micreamhaoiniú agus maoiniú fiontair shóisialta
- geilleagar sóisialta
- bonneagar sóisialta (bonneagar sláinte agus oideachais san áireamh)
- tithíocht shóisialta agus tithíocht do mhic léinn.
Tacú leis an bhfoghlaim agus aghaidh a thabhairt ar bhearnaí scileanna
Beidh clár treisithe Erasmus+ ina chnámh droma ag Aontas na Scileanna, agus cuirfidh sé cistiú riachtanach ar fáil do na nithe seo a leanas:
- tionscnaimh spóirt agus óige
- comhar traschultúrtha
- deiseanna forbartha pearsanta
- tionscadail rannpháirtíochta pobail.
Cuideoidh an Ciste Eorpach um Iomaíochas freisin le poist ar ardchaighdeán a chruthú in earnálacha straitéiseacha, trí thacú le foghlaim ar feadh an tsaoil, le hoideachas, le tionscadail oiliúna agus le printíseachtaí.
Tacú leis an tsochaí shibhialta, luachanna comhroinnte agus an daonlathas
Tacóidh an buiséad fadtéarmach leis an tsochaí shibhialta trí chláir éagsúla. Mar shampla, tacóidh na comhpháirtíochtaí náisiúnta agus réigiúnacha agus an Ciste um Iomaíochas le gníomhaíochtaí LIFE don chomhshaol, don bhithéagsúlacht agus don gheilleagar ciorclach.
Le clár láidir AgoraEU, cuirfear luachanna comhroinnte chun cinn, an daonlathas, an comhionannas agus an smacht reachta ina measc, agus tacóidh sé le héagsúlacht chultúrtha na hEorpa, lena hearnálacha closamhairc agus cruthaitheacha, le saoirse na meán agus le rannpháirtíocht na sochaí sibhialta.
An méid a chuireann buiséad an Aontais i gcrích inniu
Tá athchóiriú mór á dhéanamh ar Mhúsaem Stair Nádúrtha na Cróite i Ságrab, áit a bhfuil an bailiúchán is mó sa tír, le tacaíocht ó bhuiséad an Aontais. Díríonn an tionscadal ar Phálás stairiúil Amadeo, agus tá sé d’aidhm aige a acmhainneacht a leathnú, líon na gcuairteoirí a mhéadú agus a chuid oibre eolaíochta agus músaemeolaíochta a neartú. Cruthóidh sé sin poist nua agus cuirfidh sé an Músaem chun cinn mar phríomhspreagadh don turasóireacht forbarthach agus do chaomhnú na hoidhreachta cultúrtha.
Athbhreithníodh an leathanach seo den uair dheireanach an 15 Eanáir 2026