Il-baġit fit-tul il-ġdid tal-UE se jagħmel użu minn pjanijiet ta’ sħubija nazzjonali u reġjonali aktar sempliċi u mfasslin apposta biex jinvesti fin-nies, fir-reġjuni, u fl-Istati Membri, b’enfasi fuq
- it-tnaqqis tad-disparitajiet
- is-sostenn għall-agrikoltura u s-sajd
- it-tisħiħ tad-drittijiet soċjali
- il-promozzjoni ta’ opportunitajiet indaqs.
Dawn il-pjanijiet se jinkludu salvagwardji b’saħħithom għall-istat tad-dritt, għat-trasparenza, u għar-responsabbiltà, filwaqt li jiżguraw li r-reġjuni inqas żviluppati u l-bdiewa jirċievu sostenn garantit.
Ċifri ewlenin
Pjanijiet ta’ investiment imfasslin apposta
Il-baġit fit-tul il-ġdid se jgħaqqad flimkien il-fondi ewlenin tal-UE implimentati mill-Istati Membri u mir-reġjuni fl-ambitu ta’ strateġija koerenti waħda, iċċentrata fuq il-politika ta’ koeżjoni u fuq dik agrikola. Din l-istrateġija se tiġi implimentata permezz ta’ pjanijiet ta’ sħubija nazzjonali u reġjonali aktar sempliċi u mfasslin apposta, biex jiġi mmassimizzat l-impatt ta’ kull euro investit.
Il-pjanijiet għandhom l-għan li
- innaqqsu d-disparitajiet reġjonali
- neħduha kontra l-faqar
- insostnu l-agrikoltura u s-sajd
- ngħinu fil-ġestjoni tal-isfidi fil-fruntieri.
Il-pjanijiet huma mfasslin apposta minħabba li r-reġjuni għandhom ħtiġijiet differenti, u ħadd ma jaf aħjar minnhom kif jimplimentaw il-prijoritajiet tal-UE lokalment.
Se jitfasslu u jiġu implimentati fi sħubija mill-qrib bejn il-Kummissjoni, l-Istati Membri, ir-reġjuni, il-komunitajiet lokali, u l-partijiet ikkonċernati rilevanti l-oħrajn kollha. Kull Stat Membru se jkun jista’ jaċċessa l-istess ammont ta’ fondi bħal qabel.
Self ġdid tal-UE għall-għanijiet strateġiċi
Għall-ewwel darba, l-UE se toffri sa €150 biljun f’self, appoġġat mill-UE, biex tgħin lill-pajjiżi jinvestu f’oqsma bħall-industrija tad-difiża, l-infrastruttura tal-enerġija, jew teknoloġiji strateġiċi. Dan is-self, magħruf bħala “Catalyst Europe”, jipprovdi lill-Istati Membri b’riżorsi addizzjonali biex jappoġġaw l-objettivi Ewropej.
Il-ġustizzja u l-istat tad-dritt
Permezz tal-programm Ġustizzja, l-UE se tiddedika kważi €800 miljun għad-difiża tal-istat tad-dritt, għall-protezzjoni tad-drittijiet fundamentali taċ-ċittadini, u għat-tisħiħ tad-demokrazija.
Dan il-finanzjament se jintuża biex
- nippromwovu l-kooperazzjoni ġudizzjarja f’materji ċivili u kriminali
- insostnu t-taħriġ għall-imħallfin u għall-professjonisti legali
- niggarantixxu li ċ-ċittadini u n-negozji kollha jkollhom aċċess ugwali għall-ġustizzja
Il-pjanijiet ta’ sħubija nazzjonali u reġjonali se jaraw li l-istat tad-dritt u d-drittijiet fundamentali jkunu kundizzjoni għall-investiment u jkunu fiċ-ċentru tar-riforma. Se jkun hemm salvagwardji b’saħħithom u kundizzjonijiet ċari biex jiġi żgurat li l-flus jintużaw b’mod responsabbli u effettiv.
Fejn se jmorru l-fondi?
- Għar-reġjuni
madwar €450 biljun se jkunu disponibbli għall-koeżjoni ekonomika, soċjali, u territorjali, b’mill-inqas €218-il biljun għar-reġjuni inqas żviluppati
- Għall-agrikoltura u sajd
€300 biljun biex jiġi sostnut l-introjtu tal-bdiewa b’riżerva rduppjata; mill-inqas €2 biljun għas-sajd biex jiġu ssalvagwardjati l-mezzi tal-għajxien u s-sostenibbiltà
- Għan-nies
14% tal-baġit allokati għall-politiki soċjali, bi traċċar sħiħ; il-finanzjament tal-Erasmus+ se jikber b’50% biex l-iskambji tal-istudenti jespandu
- Għall-migrazzjoni u l-ġestjoni tal-fruntieri
se jiġi ttripplat l-investiment fil-migrazzjoni u fil-ġestjoni tal-fruntieri
- Għar-rispons għall-kriżijiet
se jittrippla l-investiment fil-Fond ta’ Solidarjetà, sabiex inkunu nistgħu naġixxu malajr u b’mod deċiżiv meta jseħħu diżastri naturali
X’qed jagħtina l-baġit tal-UE llum
Il-Fond għal Tranżizzjoni Ġusta (JTF, Just Transition Fund) jagħti sostenn lir-reġjuni l-aktar milqutin mit-tranżizzjoni lejn ekonomija newtrali għall-klima. Fir-reġjun ta’ Ida-Viru fl-Estonja, li ilu jiffoka fuq l-estrazzjoni tal-iskist keroġenuż, il-JTF qed jappoġġa l-bini ta’ fabbrika ġdida li tipproduċi l-kalamiti magħmulin minn materjali tal-art rari. Il-proġett mistenni joħloq 1,000 impjieg ġdid u se jkollu rwol vitali fit-tranżizzjoni tal-enerġija tal-Ewropa. Il-kalamiti magħmulin minn materjali tal-art rari jistgħu jintużaw fit-turbini eoliċi u f’vetturi ibridi u elettriċi.
Din il-paġna ġiet rieżaminata l-aħħar: 15 Jannar 2026