Spinta ġdida għad-demokrazija Ewropea

Inwettqu l-wegħdiet tagħna

L-istat tad-dritt huwa l-ġebla tax-xewka tad-demokraziji tagħna. Huwa integrali wkoll għall-futur tal-ekonomiji tagħna u għas-sigurtà tal-Ewropa. Huwa għalhekk li impenjajna ruħna li nipprijoritizzaw l-istat tad-dritt u nagħtu spinta ġdida lid-demokrazija Ewropea. Bir-reġimi awtoritarji jippruvaw idgħajfu l-valuri u s-soċjetajiet ħielsa u miftuħa tagħna, ma nistgħux nieħdu d-demokrazija bħala fatt. Irridu niġġieldu għaliha kuljum mill-ġdid.   

Matul dan il-mandat, żviluppajna liġijiet biex niddefendu u nsaħħu d-demokrazija, niġġieldu l-indħil barrani, niġġieldu d-diżinformazzjoni u nipproteġu l-libertà u l-pluraliżmu tal-media, kif ukoll is-sikurezza tal-ġurnalisti. U ħadna azzjoni mingħajr preċedent biex nirrispettaw l-istat tad-dritt fl-Istati Membri kollha. Stabbilixxejna Rapport annwali dwar l-Istat tad-Dritt, b’rakkomandazzjonijiet imfassla apposta għal kull Stat Membru biex jiġi evitat ksur tal-istat tad-dritt u biex jissaħħaħ aktar. 

Meta d-djalogu ma kienx biżżejjed, użajna l-għodod għad-dispożizzjoni tagħna, bħall-mekkaniżmu ta’ kundizzjonalità li għadu kif ġie stabbilit u l-proċeduri ta’ ksur. Indirizzajna l-isfidi għall-istat tad-dritt b’mod sod, biex nipproteġu d-demokrazija Ewropea tagħna u s-soċjetajiet liberi u miftuħa tagħna. 

Wegħdiet miżmuma

It-tisħiħ u s-salvagwardja tad-demokrazija Ewropea 

• Il-Pjan ta’ Azzjoni għad-Demokrazija Ewropea stabbilixxa miżuri għall-promozzjoni ta’ elezzjonijiet ħielsa u ġusti, għat-tisħiħ tal-libertà tal-media u għall-ġlieda kontra d-diżinformazzjoni.
• Liġijiet ġodda dwar ir-reklamar politiku, id-drittijiet elettorali u l-finanzjament tal-partiti, ġew adottati f’Marzu 2024.
• Biex ngħinu fil-ġlieda kontra d-diżinformazzjoni, fl-2022 saħħaħna l-Kodiċi ta’ Prattika kontra d-diżinformazzjoni.
• L-inizjattiva Anti-SLAPP, maqbula f’Novembru 2023, qed tipprovdi l-aħjar protezzjoni legali possibbli lill-ġurnalisti u lid-difensuri tad-drittijiet tal-bniedem tal-UE.
• Il-pakkett dwar id-Difiża tad-Demokrazija, adottat f’Diċembru 2023, huwa sett ta’ regoli ġodda biex jissaħħu t-trasparenza u r-responsabbiltà demokratika.
• Fl-2024 ippubblikajna gwida speċifika għal Pjattaformi Online u Magni tat-Tiftix Kbar Ħafna biex nippromwovu l-aħjar prattiki li jsaħħu r-reżiljenza tal-proċessi elettorali tagħna.
• Qbilna dwar il-ħolqien ta’ Korp tal-Etika li jkopri l-istituzzjonijiet kollha tal-UE li jistabbilixxi standards dwar l-etika għall-istituzzjonijiet kollha u jiżgura koordinazzjoni regolari bejniethom.

Id-difiża tal-libertà tal-media

• Bl-Att Ewropew dwar il-Libertà tal-Media, il-Kummissjoni stabbiliet għall-ewwel darba sett ta’ salvagwardji komuni biex tipproteġi l-libertà u l-pluraliżmu tal-media fl-Ewropa.
• Adottat Rakkomandazzjoni biex fl-Unjoni Ewropea tiżgura l-protezzjoni, is-sikurezza u t-tisħiħ tal-pożizzjoni tal-ġurnalisti u ta’ professjonisti oħra fil-midja. 

It-tisħiħ tal-għodod biex jiġi rispettat l-istat tad-dritt 

• Il-Kummissjoni pproduċiet annwalment Rapport dwar l-Istat tad-Dritt, li jagħti rakkomandazzjonijiet konkreti lill-Istati Membri dwar kif isaħħu l-istat tad-dritt fil-livell nazzjonali.
• Ir-Regolament dwar il-Kondizzjonalità tal-Baġit jippermetti s-sospensjoni tal-pagamenti jew tal-korrezzjonijiet finanzjarji f’każijiet meta l-istat tad-dritt ma jkunx qed jiġi rispettat fi Stat Membru.
• Il-pjanijiet għall-irkupru u r-reżiljenza taħt NextGenerationEU jistgħu jinkludu stadji importanti dwar it-tisħiħ tal-indipendenza ġudizzjarja u aspetti oħra relatati mal-istat tad-dritt, li l-Istat Membru kkonċernat se jkollu jimplimenta sabiex jirċievi pagament sħiħ.
• Il-Kummissjoni Ewropea bdiet proċeduri ta’ ksur biex tipproteġi l-istat tad-dritt u l-valuri tal-UE f’diversi Stati Membri. 

Nagħtu vuċi lill-Ewropej dwar il-futur tal-Ewropa 

• Il-Konferenza dwar il-Futur tal-Ewropa saret minn April 2021 sa Mejju 2022 u ppermettiet lil persuni mill-Istati Membri, l-etajiet u l-isfondi kollha jaqsmu l-ideat tagħhom dwar il-futur tal-Ewropa tagħhom f’dibattitu miftuħ u inklużiv.
• Filwaqt li tibni fuq il-legat tal-Konferenza, il-Kummissjoni ħadet it-tmexxija fl-introduzzjoni ta’ ġenerazzjoni ġdida ta’ Panels taċ-Ċittadini biex tissaħħaħ il-parteċipazzjoni pubblika fit-tfassil tal-politika tal-UE.
• Aġġornajna l-portal “Semma’ Leħnek” f’punt ta’ dħul uniku għall-għodod kollha ta’ involviment taċ-ċittadini tagħna.

Aqra aktar dwar dawn il-kisbiet