L-impatt tat-tibdil demografiku fl-Ewropa

Is-setgħa tad-demografija

Id-demografija tirrakkonta l-istorja ta’ ħajjitna. Huwa dwar kemm x’aktarx indumu ħajjin, l-għadd ta’ tfal li nistgħu nistennew li jkollna, u fejn u kif x’aktarx inqattgħu ħajjitna. It-tibdil demografiku għandu impatt qawwi fuq l-ekonomiji tagħna, fuq is-sistemi soċjali u tas-saħħa tagħna kif ukoll fuq il-ħtiġijiet tal-akkomodazzjoni u tal-infrastruttura fir-reġjuni tal-Ewropa. Dan min-naħa tiegħu għandu implikazzjonijiet għall-baġits u l-politiki tal-gvern. L-UE tintegra t-tħassib demografiku fl-iżvilupp ta’ politiki rilevanti tal-UE u ħadna għadd ta’ inizjattivi speċifiċi fil-livell tal-UE li jappoġġjaw lill-Istati Membri fl-indirizzar tat-tibdil demografiku.

Aqra r-rapport: L-impatt tat-tibdil demografiku f’ambjent li qed jinbidel

Wara li nifhmu l-kawżi u l-effetti tat-tranżizzjonijiet demografiċi nkunu nistgħu nimmaniġġjaw aħjar il-konsegwenzi tagħhom u nagħmlu użu mill-opportunitajiet tagħhom, u fl-aħħar mill-aħħar jgħinna nibnu UE prospera għall-ġenerazzjonijiet futuri.

It-tibdil demografiku fl-UE għandu impatt fuq

• is-suq tax-xogħol - hekk kif il-popolazzjoni Ewropea fl-età tax-xogħol qed tonqos biex jiġi sostnut it-tkabbir ekonomiku jeħtieġ li ndaħħlu aktar nies fis-suq tax-xogħol u/jew li nżidu l-produttività permezz tal-avvanzi teknoloġiċi u l-iżvilupp tal-ħiliet
• l-impjiegi - peress li n-nies jgħixu ħajja itwal u aktar b’saħħitha, ħafna ċittadini jridu jaħdmu aktar fit-tul, għalkemm mhux neċessarjament fl-istess tip ta’ impjiegi.
• is-servizzi tal-kura - is-sehem dejjem jikber ta’ persuni akbar fl-età fl-UE jġib miegħu ħtieġa akbar għal servizzi ta’ kura u jisfida s-sostenibbiltà finanzjarja fit-tul tal-istati soċjali tagħna
• il-bilanċ demografiku - ix-xejriet demografiċi ma jaffettwawx kull pajjiż u kull reġjun bl-istess mod. Filwaqt li għadd ta’ Stati Membri tal-UE huma mbassra li jesperjenzaw tnaqqis fil-popolazzjoni tagħhom diġà fis-snin li ġejjin, oħrajn huma mbassra li jaraw żieda fil-popolazzjoni matul l-istess perjodu
• iż-żoni rurali - b’mod ġenerali, ir-reġjuni rurali huma aktar affettwati mit-tnaqqis fil-popolazzjoni minn dawk li huma fil-biċċa l-kbira urbani, minħabba l-bidliet naturali u l-migrazzjoni ’l barra
• il-pożizzjoni tal-Ewropa fid-dinja - hekk kif is-sehem tal-UE tal-popolazzjoni globali huwa mbassar li jkompli jonqos fid-deċennji li ġejjin, il-ħtieġa għal kooperazzjoni mill-qrib fil-livelli kollha biex tiġi żgurata l-kompetittività tas-Suq Uniku tagħna qed issir dejjem aktar urġenti

Ara aktar statistika demografika għall-pajjiżi individwali tal-UE

L-Ewropej qed jgħixu aktar fit-tul u huma f'saħħithom aktar minn qatt qabel. Fid-deċennji li ġejjin, is-sehem u n-numru ta’ nies anzjani fl-UE se jiżdied. Din ix-xejra għandha impatt sinifikanti fuq il-ħajja ta’ kuljum tan-nies u fuq is-soċjetajiet tagħna, li ġġib magħha kemm opportunitajiet kif ukoll sfidi.

Minħabba l-iskala, il-veloċità u l-impatt li din ix-xejra se jkollha fis-soċjetà kollha, hu importanti li jiġu kkunsidrati approċċi ġodda u jiġi żgurat li l-politiki jkunu adatti għall-iskop tagħhom f’era ta’ bidla kbira – mit-tranżizzjonijiet ekoloġiċi u diġitali sa forom ġodda ta’ xogħol u l-indirizzar tal-isfidi ewlenin tas-saħħa, inklużi l-pandemiji.

Il-kompetenzi biex jiġu indirizzati l-effetti tat-tixjiħ huma fil-biċċa l-kbira f’idejn l-Istati Membri u l-UE tinsab f’pożizzjoni tajba biex tidentifika kwistjonijiet u xejriet ewlenin u tappoġġja l-azzjoni dwar it-tixjiħ fil-livell nazzjonali, reġjonali u lokali. Tista’ tgħin lill-Istati Membri u lir-reġjuni jiżviluppaw ir-rispons politiku tagħhom stess u mfassal apposta għat-tixjiħ.

Green paper dwar it-tixjiħ

Il-Kummissjoni Ewropea ppubblikat il-Green Paper dwar it-tixjiħ f’Jannar 2021 fejn nediet dibattitu politiku wiesa’ dwar it-tixjiħ biex jiġu diskussi l-għażliet dwar kif għandhom jiġu antiċipati u indirizzati l-isfidi u l-opportunitajiet li jġib miegħu t-tixjiħ kif ukoll kif tista’ tinżamm kwalità tal-ħajja tajba tal-popolazzjoni li qed tixjieħ għall-itwal żmien possibbli. Il-kontributi għall-konsultazzjoni pubblika dwar il-Green Paper għenu biex jiġu identifikati l-miżuri meħtieġa għall-appoġġ għall-promozzjoni tar-reżiljenza ekonomika u soċjali f’Ewropa li qed tixjieħ.

L-Ewropa għaddejja minn trasformazzjoni demografika kbira. It-tibdil demografiku għandu impatt profond fuq il-ħajja ta’ kuljum u jeħtieġ soluzzjonijiet olistiċi u integrati.

Peress li ċ-ċittadini tagħna qed jgħixu ħajja itwal u aktar b’saħħitha, il-politiki kollha tagħna jeħtieġ li jkunu jħarsu ’l quddiem u jappoġġjaw il-bidla minn soċjetà li qed tixjieħ għal soċjetà ta’ lonġevità.

Il-konklużjonijiet tal-Kunsill Ewropew ta’ Ġunju 2023 appellaw lill-Kummissjoni biex tressaq sett ta’ għodod biex tappoġġja lill-Istati Membri fl-indirizzar tal-isfidi demografiċi u l-impatt tagħhom fuq il-vantaġġ kompetittiv tal-Ewropa.

Is-sett ta’ għodod demografiċi, imħejji b’rispons mill-Kummissjoni, jibbaża fuq l-esperjenzi mill-UE kollha u jistabbilixxi approċċ komprensiv għat-tibdil demografiku strutturat madwar erba’ pilastri:          

1. l-appoġġ għall-ġenituri billi jiġu rrikonċiljati aħjar l-aspirazzjonijiet tal-familja u x-xogħol imħallas, b’mod partikolari billi jiġi żgurat aċċess għal kura tat-tfal ta’ kwalità u bilanċ tajjeb bejn ix-xogħol u l-ħajja privata;
2. l-appoġġ u l-għoti tas-setgħa lill-ġenerazzjonijiet żgħażagħ biex jirnexxu, jiżviluppaw il-ħiliet tagħhom, jiffaċilitaw l-aċċess tagħhom għas-suq tax-xogħol u għal akkomodazzjoni affordabbli;
3. l-għoti tas-setgħa lill-ġenerazzjonijiet akbar fl-età u s-sostenn tal-benesseri tagħhom, permezz ta’ riformi flimkien ma’ politiki xierqa tas-suq tax-xogħol u tal-post tax-xogħol;
4. fejn meħtieġ, l-indirizzar tan-nuqqas ta’ ħaddiema permezz ta’ migrazzjoni legali mmaniġġjata, f’komplementarjetà sħiħa biex jiġu sfruttati t-talenti minn ġewwa l-UE.

Is-sett ta’ għodod jirrikonoxxi l-ħtieġa li tiġi kkunsidrata d-dimensjoni territorjali tal-bidliet demografiċi, speċifikament fir-reġjuni li jesperjenzaw il-fenomenu tat-tnaqqis fil-popolazzjoni u mobbiltà sinifikanti 'l barra tal-ħaddiema żgħażagħ (“eżodu ta’ mħuħ”).

Fuq xiex qed naħdmu