Scéal Choimisiún von der Leyen

Nuair a bhuail an phaindéim is measa dá raibh ar domhan lenár linn, chuaigh an Coimisiún i mbun gnó chun beatha daoine, slí bheatha daoine agus ár ngeilleagar a chosaint.

Chabhraíomar le taighde ar vacsaíní tarrthála agus chuireamar ar fáil iad níos luaithe ná mar a rinneadh riamh roimhe.. Rinneamar deimhin de go raibh na vacsaíní ar fáil do gach Eorpach in aon am amháin, cibé Ballstát ina raibh cónaí orthu. Fuaireamar suas le 4.6 billiún dáileog vacsaíne, thar ceann na mBallstát, chun muintir na hEorpa a chosaint agus chun iad a chomhroinnt le tíortha comhpháirtíochta. Fuair os cionn 80% de dhaoine fásta an Aontais an cúrsa vacsaínithe tosaigh.

Ó ba rud é go bhféadfaidh tíortha a dteorainneacha a oscailt go cúramach de bharr an vacsaínithe, d’fhorbraíomar uirlisí praiticiúla chun a chur ar chumas mhuintir na hEorpa taisteal go sábháilte. Chuireamar Deimhniú Digiteach COVID an Aontais ar bun, deimhniú lena nasctar 78 gcinn de thíortha agus críocha. Is é sin an tsamhail feasta le haghaidh córas domhanda chun soghluaisteacht a éascú agus saoránaigh ar fud an domhain a chosaint ar phaindéimí.

Agus an chontúirt ann go ndúnfaí cuideachtaí agus go gcuirfí deireadh le poist de dheasca na ndianghlasálacha, d’fhorbraíomar ionstraim le haghaidh Tacaíocht shealadach chun Rioscaí Dífhostaíochta a mhaolú i gcás Éigeandála (SURE). In 2020, choinnigh sé 2.5 milliún cuideachta ar oscailt agus 31.5 milliún Eorpach ina bpost, rud a d’fhág nár tháinig géarchéim ollmhór eacnamaíoch agus shóisialta chun cinn. Agus nuair a bhí teorainneacha dúnta agus earraí dá stopadh ar an mbóthar, sheolamar na Lánaí Glasa chun cúrsaíocht a éascú agus chun ganntanais earraí bunúsacha a chosc.

Díreach nuair a bhí vacsaíní á gcur ar fáil do gach Eorpach in aon am amháin, d’oibríomar chun a chinntiú go bhféadfadh geilleagair na mBallstát uile, go háirithe iad siúd is measa a bhí buailte ag an bpaindéim, téarnamh go tapa. Tráth an chúlaithe eacnamaíoch is measa ó bhí an Dara Cogadh Domhanda ann, bhaineamar amach an téarnamh is láidre ó bhí an borradh iarchogaidh ann. Is é an fáth a raibh an téarnamh sin indéanta gur fhorbraíomar plean nua ceannasach chun airgead a thiomsú ar an margadh agus chun infheistíocht a dhéanamh le chéile i dtéarnamh agus athléimneacht na hEorpa.

De bharr NextGenerationEU tá iontaoibh bhreise á cur inár ngeilleagar. Agus luach níos mó ná €800 billiún air, tá sé ag cur chun cinn ár ngeilleagar le meascán d’infheistíocht agus d’athchóirithe faoi láthair. Tá torthaí nithiúla do mhuintir na hEorpa tagtha cheana féin ar na céadta tionscadal atá á maoiniú ag NextGenerationEU, ó fheirmeacha gaoithe amach ón gcósta go traenacha leictreacha, ó sheirbhísí poiblí digiteacha thar barr go hospidéil den chéad scoth. San am céanna, tá NextGenerationEU á úsáid go straitéiseach ag na Ballstáit chun athchóirithe móra a dhéanamh, ar nós athchóirithe ar an margadh saothair, athchóirithe pinsin, agus dlús a chur le ceadú foinsí in-athnuaite fuinnimh. Ar an gcaoi sin tá an tAontas seo againne ag soláthar cumhachta do théarnamh na hEorpa. 

Le linn a mhandáide, chuir an Coimisiún go mór le cumas na hEorpa tacaíocht ríthábhachtach a chur ar fáil do thíortha atá buailte ag tubaiste, ó thuilte go dóiteáin foraoise, ó chreathanna talún go héigeandálaí leighis.

Tá tacaíocht dírithe ag Sásra an Aontais um Chosaint Shibhialta chuig gach cuid den mhór-roinn agus níos faide i gcéin. Bhí ár bhfoirne ag obair chun daoine a tharrtháil agus an smionagar a ghlanadh díreach uair an chloig tar éis do chreathanna talún marfacha scrios a dhéanamh san Albáin, sa Chróit agus sa Tuirc. Ghníomhaigh siad go tapa agus thug tacaíocht ar an talamh tar éis tuilte tubaisteacha sa Bheilg, sa Ghearmáin, san Iodáil agus sa tSlóivéin.

Ó 2019 i leith, tá os cionn €3 bhilliún curtha ar fáil againn trí Chiste Dlúthpháirtíochta an Aontais do Bhallstáit agus do thíortha aontachais ar bhuail tubaistí nádúrtha agus éigeandálaí sláinte poiblí iad.

Chuidigh ár gcabhlach comhraic dóiteáin falscaithe a chomhrac ón nGréig go dtí an Phortaingéil, ón bhFrainc go dtí an Albáin. Agus ar an taobh thall den Atlantach freisin. Den chéad uair riamh, chuaigh Ceanada i muinín na hEorpa chun tacaíocht a fháil nuair a bhuail na dóiteáin foraoise é ba mheasa le blianta beaga anuas. Agus d’fhreagair an Eoraip an glao: Chuaigh na céadta comhraiceoirí dóiteáin Eorpacha i ngleic leis na dóiteáin dhiana a rinne scrios i bhforaoisí Cheanada.

Léirigh minicíocht agus déine na mórtheagmhas haimsire, chomh maith leis an bpaindéim, gur gá dúinn níos mó a dhéanamh chun tubaistí a fhreagairt. Sin an fáth ar chruthaíomar rescEU: cúlchiste coiteann d’acmhainní Eorpacha, ina bhfuil cabhlach eitleán agus héileacaptar comhraic dóiteáin, eitleáin aslonnaithe leighis, agus stoc-chairn earraí leighis. Fíorlíontán sábhála Eorpach le haghaidh éigeandálaí.

Nuair a thagann tubaiste chun cinn, tá ár nAontas anois níos cumasaí ná riamh chun tacú le muintir na hEorpa — agus leis an gcuid eile den domhan. Ó 2020 i leith, tá comhordú déanta againn ar 232 oibríocht Aerdhroichid Dhaonnúil, oibríochtaí lenar freastalaíodh ar 12 ghéarchéim ar fud an domhain, an drochstaid dhaonnúil in Gaza le déanaí.

Le blianta beaga anuas, tá níos mó bainte amach ag an Eoraip do shaoránaigh agus do ghnólachtaí sa spás digiteach ná mar a baineadh amach riamh. 

Leagamar síos fís shoiléir ag tús na mandáide: cinnte a dhéanamh de go mbainfidh ár sochaí tairbhe as an teicneolaíocht agus go gcuirfidh an nuálaíocht dlús lenár n-iomaíochas, agus rioscaí do shaoránaigh a laghdú san am céanna. 

Chomhlíonamar ár mandáid. Ar fud na hEorpa, tá na billiúin infheistithe againn i leathnú na snáthoptaice agus 5G. Tá réigiúin tuaithe nasctha againn agus chuireamar scileanna ar fáil do na céadta míle oibrithe le haghaidh na todhchaí digití. Sholáthraíomar fís dhuinelárnach den spás digiteach agus chomhdhlúthaíomar ár gceannaireacht theicneolaíoch. 

In 2019, ní raibh ní ríomhairí Eorpacha a bhí in aon cheann de na hocht sár-ríomhaire is fearr. Sa lá atá inniu ann, tá ceithre cinn de na ríomhairí is cumhachtaí ar domhan suite san Aontas Eorpach — san Fhionlainn, san Iodáil, sa Spáinn agus sa Ghearmáin. 

San am céanna, tá an Eoraip anois ar an gceannródaí domhanda is mó i leith chearta na saoránach ar líne. Leis an nGníomh um Sheirbhísí Digiteacha, leagamar amach na bunphrionsabail le haghaidh gach cuideachta digití san Eoraip, chomh maith le cearta soiléire d’úsáideoirí. Shainíomar na freagrachtaí speisialta atá ar ardáin mhóra idirlín maidir leis an ábhar a chuireann siad chun cinn agus a scaipeann siad — chun cabhrú le dul i ngleic leis an bhfuathchaint agus leis an mbréagaisnéis, mar shampla, agus chun mionaoisigh a chosaint. Agus leis an IIonstraim um Margaí Digiteacha, táimid á chinntiú go bhfeidhmeoidh mórchuideachtaí digiteacha de réir rialacha cothroma agus go gcuirfidh siad trédhearcacht agus deimhneacht dhlíthiúil ar fáil do ghnólachtaí an Aontais.

Is amhlaidh atá i gcás na hIntleachta Saorga chomh maith. Ina theannta sin, a bhuí leis an nGníomh um an Intleacht Shaorga, atá fabhrach don nuálaíocht , tá an Eoraip ar an aon mhór-roinn amháin ina bhfuil rialachán tiomnaithe i bhfeidhm maidir leis an intleacht shaorga, rialachán atá dírithe ar úsáidí ardriosca. Tá níos mó i gceist leis an ngníomh céanna ná rialacha – is túsphointe é an Gníomh um an Intleacht Shaorga, lena dtabharfar deis do chuideachtaí Eorpacha a bheith ar thús cadhnaíochta i dtaobh intleacht shaorga iontaofa a fhorbairt de.

Tá a fhios againn gur féidir leis an intleacht shaorga borradh ollmhór a chur faoi tháirgiúlacht ár gcuideachtaí. Dá bhrí sin, táimid ag cabhrú leo an intleacht shaorga a chomhtháthú ina bpróisis ghnó. Mar shampla, táimid ag tabhairt rochtain do ghnólachtaí nuathionscanta agus FBManna ar ár sár-ríomhairí den chéad scoth, ionas gur féidir leo samhlacha móra intleachta saorga a fhorbairt, a oiliúint agus a thástáil. 

San am céanna, tá bealach slán forbartha againn chun leas a bhaint as acmhainneacht eacnamaíoch na sonraí. Leis an nGníomh um Shonraí, dreasóimid na daoine a ghineann na sonraí lena gcomhroinnt sa chaoi go mbeidh ár néalmhargaí níos iomaíche — rud a chuirfidh na deicheanna billiún euro lenár n-olltáirgeacht intíre faoi 2028. 

Tá dea-thoradh ag teacht ar Dheacáid Dhigiteach na hEorpa.

Tá tionscal na hEorpa i gcroílár ár misin go mbeidh rath ar ár muintir. Agus ár n-uaillmhian a chomhlíonadh ní mór dúinn geilleagar glan a thógáil. Chun cabhrú lenár dtionscal leanúint de bheith iomaíoch ar fud an domhain le linn an aistrithe, d’fhorbraíomar cur chuige mear chun tacú le príomhearnálacha, ó shliseanna agus teicneolaíocht ghlan, ó cheallraí go gaoth. Tugann sin infheistíocht, scileanna, saoráidí rialála cliste agus comhar le comhpháirtithe le chéile.

Rinneamar tástáil ar an gcur chuige sin leis an nGníomh Eorpach um Shliseanna, chun borradh a chur faoi mhonarú sliseanna agus tacú le méadú agus nuálaíocht ar fud an tslabhra luacha. Agus d’éirigh leis sin. Tá breis agus €100 billiún d’infheistíocht bheartaithe – idir phoiblí agus phríobháideach – ginte cheana féin leis an nGníomh Eorpach um Shliseanna, ar feadh tslabhra luacha. Agus tá poist mhaithe á gcruthú leis ar fud na hEorpa, ó Magdeburg go Catania, ó Bhaile Átha Cliath go Dresden, ó Wrocław go Grenoble.

Tá an cur chuige céanna á chur i bhfeidhm againn chun a chinntiú gur san Eoraip a bheidh todhchaí ár dtionscal teicneolaíochta glaine. Cuideoidh ár nGníomh um Thionscal Glan-Nialasachta leis an Aontas cumas láidir monaraíochta intíre a fhorbairt. Faoi 2030, ba cheart 40 % ar a laghad dár n-éileamh ar theicneolaíochtaí glan-nialasachta a chumhdach le hacmhainneacht mhonaraíochta na hEorpa. Is féidir lenár dtionscadail straitéiseacha agus ár ngleannta, lena gceadaítear athchóirithe agus rialacha soláthair agus ceantála spriocdhírithe, cabhrú leis an Aontas éirí ina cheannródaí domhanda san aistriú chuig fuinneamh glan agus poist ghlasa ardcháilíochta a chruthú sa bhaile.

Mar an gcéanna, d’fhorbraíomar an Gníomh um Amhábhair Chriticiúla chun rochtain a chinntiú dár gcuideachtaí ar ábhair riachtanacha, ábhair atá ríthábhachtach d’iomaíochas agus do shlándáil eacnamaíoch na hEorpa. Sa lá atá inniu ann, is ón tSín a fhaigheann an Eoraip an chuid is mó dá tearc-chréanna agus d’amhábhair chriticiúla eile. D’fhéadfadh teannas geopholaitiúil nó imeachtaí amhail an phaindéim fadhbanna táirgthe tromchúiseacha iartheachtacha a spreagadh tráth ar bith san Eoraip. Sin an fáth ar fhorbraíomar an prionsabal nua ‘dí‑rioscú seachas díchúpláil’ i leith na Síne, prionsabal ar ghlac Ballstáit an Aontais agus comhpháirtithe G7 leis. Tá tionscadail nua á bhforbairt againn san Eoraip, ach tá comhpháirtíochtaí straitéiseacha tairbhiúla á bhforbairt againn freisin le tíortha amhail an Astráil, an tSile agus Ceanada, chun amhábhair chriticiúla a fháil agus a phróiseáil agus chun slabhraí soláthair cuideachtaí Eorpacha a éagsúlú.

Agus chun dul in oiriúint do chúinsí geopholaitiúla, d’fhorbraíomar an chéad Straitéis Slándála Eacnamaíche dá raibh againn riamh, ina bhfuil céimeanna nithiúla chun ár n-athléimneacht a mhéadú agus ár ngeilleagar a chur as baol. Ina theannta sin, is cur chuige pragmatach atá againn: acmhainneachtaí dílse na hEorpa a chur chun cinn i bpríomhearnálacha, cosaint ar spleáchas, agus comhpháirtíochtaí chun comhleasanna a chur chun cinn. Tá an Eoraip ag éirí níos láidre agus níos sábháilte dá bharr sin.

Is mór-roinn í an Eoraip ar mhúnlaigh go leor pobal a stair. Seasfaimid i gcónaí lenár n-oibleagáidí sábháilteacht a chur ar fáil do dhaoine a bhfuil cosaint idirnáisiúnta á lorg acu, agus is cúis mhórtais dúinn bealaí dleathacha imirce a chur ar fáil a rachaidh chun tairbhe do shochaithe agus do gheilleagair na hEorpa freisin.

Mar sin féin, le linn géarchéimeanna roimhe seo nuair a tháinig líon dídeanaithe agus imirceach neamhrialta níos mó ná mar a tháinig riamh roimhe isteach san Aontas, ba léir nach raibh na huirlisí cearta ag an Eoraip chun dul i ngleic leis an mbrú.

Dá bhrí sin, i dtús mhandáid an Choimisiúin seo, gheallamar go mbunófaí comhchóras chun bainistiú níos fearr a dhéanamh ar an imirce san Aontas. Sin an fáth ar chuireamar i láthair Comhshocrú nua maidir le hImirce agus Tearmann.

Tar éis caibidlíocht chasta pholaitiúil agus dhlíthiúil, tháinig na Ballstáit agus Parlaimint na hEorpa ar chomhaontú maidir leis an tacar cuimsitheach rialacha sin, rud a thug tús úr don Eoraip, áit a bhfuil bacadh agus marbhántacht feicthe againn ar feadh na mblianta fada.

Leis na rialacha nua, déanfaimid rialú níos doichte ar ár dteorainneacha seachtracha. Táimid ag déanamh nósanna imeachta tearmainn, fillte agus teorann níos tapúla agus níos éifeachtaí agus ag cur i bhfeidhm teorainneacha ama níos déine agus rialacha níos déine chun iarratais mhíchuí nó iarratais a thagann astu sin a theorannú, ach na ráthaíochtaí is gá do dhaoine aonair á gcoinneáil ar bun againn. Eiseofar láithreach cinntí um fhilleadh dóibh siúd nach bhfuil ceart fanachta acu.

Agus tá rialacha níos soiléire anois againn maidir le freagracht na mBallstát, ina bhfuil bearta feabhsaithe chun gluaiseachtaí tánaisteacha a theorannú.
Tacóidh na Ballstáit le chéile trí úsáid a bhaint as sásra dlúthpháirtíochta atá solúbtha ach buan. Beidh an rogha ag gach ceann acu an cineál dlúthpháirtíochta is mian leo a roghnú. Is fearr anois atá an tAontas seo againne in ann an imirce a bhainistiú.

I gcomhthráth le reachtaíocht níos éifeachtaí a fhorbairt, le linn na mandáide seo, chuidigh an Coimisiún leis na Ballstáit aghaidh a thabhairt ar dhúshláin láithreacha — ón méadú ar líon na ndaoine atá ag teacht isteach sa Mheánmhuir go hionstraimiú na himirce atá ar bun ag an mBealarúis — le tacaíocht oibríochtúil agus le cúnamh ó ghníomhaireachtaí an Aontais. Agus thógamar comhpháirtíochtaí le tríú tíortha chun an smuigleáil a chomhrac agus chun an filleadh a mhéadú.

An chomhpháirtíocht chuimsitheach a shíníomar leis an Túinéis, cuir i gcás, baineann buntáistí frithpháirteacha léi nach mbaineann leis an imirce — ó fhuinneamh agus oideachas go scileanna agus slándáil. Is í sin an treoirphlean le haghaidh comhaontuithe eile atá le síniú le tíortha comhpháirtíochta, chun comhar a chothú agus chun bainistiú imirce a fheabhsú.

Le blianta beaga anuas, léirigh Coimisiún von der Leyen a mhinice is féidir dúshláin ollmhóra a fhreagairt agus é ag obair i gcomhar le cairde agus le comhpháirtithe. A bhuí le cumas an Aontais comhghuaillíochtaí cumhachtacha a chruthú ar fud an domhain, neartaíodh ról na hEorpa ar fud an domhain.

Ba ar an Afraic a thug Coláiste na gCoimisinéirí reatha a chéad chuairt. Le hobair Choimisiún von der Leyen, tá an caidreamh leis na Stáit Aontaithe tugtha go leibhéil nua, le dlúthchomhar chun tacú leis an Úcráin, agus maidir le fuinneamh, gníomhú ar son na haeráide, trádáil agus teicneolaíocht. Chuidigh sé freisin leis an gcaidreamh leis an Ríocht Aontaithe a athshocrú tar éis Brexit. Thugamar Creat Windsor chun críche le caibidlíocht, creat a chuir ceann de na caidrimh is tábhachtaí atá againn san Eoraip ar ais ar bhealach dearfach.

Agus d’fhorbraíomar glúin nua comhpháirtíochtaí le Global Gateway, an clár infheistíochta domhanda is mó a bhí ag an Eoraip riamh. Is é Global Gateway, dar luach €300 billiún, an tairiscint atá againn le haghaidh tionscadail ardcháilíochta infheistíochta agus bonneagair lena gcloítear le hardchaighdeáin chomhshaoil agus shóisialta agus lena gcruthaítear poist agus fás go háitiúil.

Baineann Global Gateway le comhpháirtíochtaí a rachaidh chun tairbhe do chách a fhorbairt agus leasanna ár gcomhpháirtithe agus leasanna an Aontais á gcur san áireamh ó thaobh na geopholaitíochta de.

Agus tá torthaí air cheana féin. Roghnaíodh breis agus 200 tionscadal suaitheanta, lenar ghabh €66 bhilliún d’infheistíochtaí ó chomhpháirtíochtaí straitéiseacha maidir le hamhábhair leis an Namaib, leis an tSile agus leis an Airgintín, go comhar maidir le hidrigin in-athnuaite le Maracó agus leis an Éigipt, nó maidir le córas digiteach cáblaí fomhuirí, ar a dtugtar Medusa, a nascann an tAontas le tíortha na hAfraice Thuaidh. Beidh cuid mhór tionscadal eile ag teacht.

Cuirtear an Tairseach Dhomhanda chun feidhme de réir cur chuige ‘Team Europe’ — institiúidí an Aontais agus Ballstáit an Aontais ag obair i gcomhar le chéile — agus ní hamháin go dtacaíonn sí leis an aistriú glan agus leis an aistriú digiteach ar fud an domhain, ach cuireann sí le tionchar an Aontais ar an ardán domhanda freisin. 

Tá an Eoraip ag daingniú a cáile mar chomhpháirtí fadtéarmach iontaofa, agus í ag obair ar mhaithe le sochair fhrithpháirteacha.