Id-dritt li jinstemgħu
L-Artikolu 24 tal-Karta tad-Drittijiet Fundamentali tal-Unjoni Ewropea jiddikjara li: "It-tfal(…) jistgħu jesprimu l-opinjonijiet tagħhom liberament. Dawn l-opinjonijiet għandhom jitqiesu f'materji li jirrigwardawhom skont l-età u l-maturità tagħhom.”
Id-dritt tat-tfal kollha li jinstemgħu u li l-opinjonijiet tagħhom jittieħdu bis-serjetà skont l-età u l-maturità tagħhom huwa stabbilit ukoll fl-Artikolu 12 tal-Konvenzjoni tan-NU dwar id-Drittijiet tat-Tfal (UNCRC).
Il-Kummissjoni Ewropea tippromwovi u tipproteġi d-dritt tat-tfal li jinstemgħu fil-leġiżlazzjoni u l-politiki tagħha. It-tfal huma aġenti tal-bidla. Il-Kummissjoni trid tappoġġjahom fil-kontribut tagħhom għall-bidliet. It-tfal ġew ikkonsultati dwar l-istrateġija bl-għajnuna tal-organizzazzjonijiet ewlenin tad-drittijiet tat-tfal u se jkunu involuti fl-implimentazzjoni u fil-monitoraġġ tal-istrateġija.
L-azzjonijiet tal-UE biex it-tfal jingħataw is-setgħa biex ikunu ċittadini attivi u membri ta’ soċjetajiet demokratiċi
Skont l-Istrateġija tal-UE dwar id-drittijiet tat-tfal, il-Kummissjoni impenjat ruħha li:
- tistabbilixxi, flimkien mal-Parlament Ewropew u l-organizzazzjonijiet tad-drittijiet tat-tfal, Pjattaforma ta’ Parteċipazzjoni tat-Tfal tal-UE, biex tgħaqqad il-mekkaniżmi eżistenti għall-parteċipazzjoni tat-tfal fil-livell lokali, nazzjonali u tal-UE, u tinvolvi lit-tfal fil-proċessi tat-teħid tad-deċiżjonijiet fil-livell tal-UE.
- toħloq spazju għat-tfal biex isiru parteċipanti attivi tal-Patt Klimatiku Ewropew permezz ta’ wegħdiet jew billi jsiru Ambaxxaturi tal-Patt. Permezz tal-involviment tal-iskejjel fl-edukazzjoni dwar klima, enerġija u ambjent sostenibbli, l-Edukazzjoni għall-Koalizzjoni dwar il-Klima se tgħin lit-tfal isiru aġenti tal-bidla fl-implimentazzjoni tal-Patt Klimatiku u tal-Patt Ekoloġiku Ewropew.
- tiżviluppa u tippromwovi verżjonijiet u formati aċċessibbli, diġitalment inklużivi u adatti għat-tfal tal-Karta tad-Drittijiet Fundamentali u strumenti ewlenin oħra tal-UE;
- tiżviluppa u tippromwovi linji gwida dwar l-użu ta’ lingwaġġ adatt għat-tfal f’dokumenti u f’avvenimenti u laqgħat tal-partijiet ikkonċernati ma’ parteċipanti tfal;
- tinkludi t-tfal fil-Forum dwar id-Drittijiet Fundamentali tal-Aġenzija tal-UE għad-Drittijiet Fundamentali (FRA) u l-Konferenza dwar il-futur tal-Ewropa;
- twettaq konsultazzjonijiet speċifiċi għat-tfal għal inizjattivi futuri rilevanti
- issaħħaħ l-għarfien espert u l-prattika dwar il-parteċipazzjoni tat-tfal fost l-istaff tal-Kummissjoni u l-istaff tal-aġenziji tal-UE, inkluż dwar il-politiki dwar il-protezzjoni tat-tfal u dwar politiki ta’ salvagwardja.