“Fl-aħħar xhur erġajna skoprejna l-valur ta’ dak li għandna flimkien. Urejna x’inhu possibbli meta nafdaw lil xulxin u meta nafdaw lill-istituzzjonijiet Ewropej tagħna. U b’dan kollu, mhux tallli għażilna li nsewwu u nirkupraw għall-preżent, iżda biex insawru stil ta’ ħajja aħjar għad-dinja ta’ għada.”
Ursula von der Leyen, il-President tal-Kummissjoni Ewropea
Il-Kummissjoni Ewropea ilha minn mindu faqqgħet il-pandemija tal-coronavirus taħdem fuq il-fronti kollha biex trażżan it-tixrid tal-virus. Ittieħdu miżuri bla preċedent kemm fil-livell nazzjonali kif ukoll f’dak tal-UE biex jiġu appoġġjati s-sistemi tas-saħħa u jiġi miġġieled l-impatt soċjoekonomiku tal-pandemija.
L-iżgurar ta’ vaċċini sikuri u effettivi għall-Ewropa u għad-dinja
L-iżvilupp u d-distribuzzjoni ta’ vaċċin effettiv u sikur kontra l-coronavirus jirrappreżentaw soluzzjoni dejjiema għall-pandemija u huma l-pedament tar-rispons tal-coronavirus tal-Kummissjoni.
implimentat Strateġija Ewropea dwar il-Vaċċini biex tħaffef l-iżvilupp, il-manifattura u l-iskjerament ta’ vaċċini kontra l-COVID-19
awtorizzat 6 kuntratti, għal 2.3 biljun doża ta’ vaċċini futuri, u tinsab f’taħditiet ma’ 2 żviluppaturi potenzjali għal 260 miljun doża addizzjonali
tat 3 awtorizzazzjonijiet kondizzjonali għat-tqegħid fis-suq, lill-BioNtech u Pfizer, lill-Moderna u lill-AstraZeneca
Azzjonijiet ewlenin oħra meħudin:
- Il-Kummissjoni mmobilizzat aktar minn €660 miljun minn Jannar 2020 taħt il-programm ta’ riċerka u innovazzjoni Orizzont 2020 għall-iżvilupp ta’ vaċċini, trattamenti ġodda, testijiet dijanjostiċi u sistemi mediċi għall-prevenzjoni tat-tixrid tal-coronavirus u biex jiġu salvati l-ħajjiet.
- Il-maratona tal-wegħdiet ta’ donazzjonijiet tar-Rispons Globali għall-Coronavirus ġabret fondi għall-aċċess universali għat-trattamenti, għat-testijiet u għall-vaċċini tal-coronavirus. Bdiet f’Mejju u laħqet il-quċċata tagħha f’Summit Globali b’Appell għal Wegħdiet ta’ Donazzjonijiet u kunċert f’Ġunju 2020. Inġabru €16-il biljun f’wegħdiet ta’ donazzjonijiet minn donaturi mid-dinja kollha.
- Flimkien mal-Istati Membri tal-UE, sa Frar 2021, it-Tim Ewropa alloka aktar minn €850 miljun għall-COVAX, li jagħmel lill-Unjoni Ewropea l-akbar donatur tal-COVAX. Dan se jippermetti aċċess ġust u ekwu għall-vaċċini, irrispettivament mill-introjtu, għal miljuni ta’ nies fl-Afrika, l-Asja, il-Karibew, il-Paċifiku, u fil-viċinat tal-Lvant u tan-Nofsinhar tal-Ewropa.
L-appoġġ għall-ekonomija tal-Ewropa fit-triq lejn l-irkupru
Il-Kummissjoni Ewropea pproponiet pjan ta’ rkupru kbir għall-Ewropa li se
- jgħin fit-tiswija tal-ħsara ekonomika u soċjali kkawżata mill-pandemija
- jagħti spinta lill-irkupru Ewropew
- jipproteġi u joħloq l-impjiegi
Il-pakkett ta’ rkupru ta’ €1.8 triljun jgħaqqad il-baġit tal-UE għall-2021-27 u n-NextGenerationEU.
il-mobilizzazzjoni tal-baġit tal-UE u tal-Bank Ewropew tal-Investiment biex jiġu salvati l-impjiegi u biex jingħata appoġġ lill-kumpaniji milqutin mill-kriżi
it-tnedija ta’ SURE, li jista’ jipprovdi sa €100 biljun f’self lill-Istati Membri għall-preservazzjoni tal-impjiegi
regoli temporanji dwar l-għajnuna mill-Istat biex b’hekk il-gvernijiet ikunu jistgħu jipprovdu likwidità lill-ekonomija biex jappoġġjaw liċ-ċittadini, u jsalvaw l-impjiegi fl-UE
Azzjonijiet ewlenin oħra li ħadet il-Kummissjoni fl-2020:
- attivat il-“klawżola liberatorja” li tippermetti flessibbiltà massima fir-regoli baġitarji tagħna
- wettqet screening tal-investiment dirett barrani. Il-Kummissjoni ħarġet linji gwida biex tgħin lill-Istati Membri jipproteġu l-assi u t-teknoloġija kritiċi Ewropej fil-kriżi attwali
- ressqet Inizjattiva ta’ Investiment fir-Rispons għall-Coronavirus biex tipprovdi lill-Istati Membri b’likwidità immedjata
- allokat aktar minn €10 biljun għall-intrapriżi żgħar u ta’ daqs medju, biex tgħinhom jibqgħu attivi matul il-pandemija, u €3 biljun għall-ħaddiema u l-gruppi vulnerabbli
Il-protezzjoni tas-saħħa pubblika
Fil-11 ta’ Novembru 2020, il-Kummissjoni stabbiliet il-pedamenti ta’ Unjoni Ewropea tas-Saħħa, li fiha l-pajjiżi kollha tal-UE jħejju għall-kriżijiet tas-saħħa u jirrispondu għalihom flimkien. Din għandha tiżgura li l-provvisti mediċi jkunu affordabbli u disponibbli, u l-pajjiżi jaħdmu flimkien biex itejbu l-prevenzjoni u t-trattament tal-mard.
għenu lill-Istati Membri biex jingħaqdu flimkien ħalli jimmassimizzaw il-kapaċità tal-akkwist u jiżguraw il-provvisti mediċi meħtieġa, malajr kemm jista’ jkun
investew f’riċerka ta’ kwalità għolja, li laqqgħet flimkien ix-xjenzjati ewlenin tal-Ewropa
stabbilew panel ta’ 7 epidemjologi u virologi indipendenti biex jiggwida lill-Istati Membri dwar miżuri ta’ rispons
Il-protezzjoni tal-mobbiltà taċ-ċittadini tal-UE
Matul il-pandemija kellhom jiġu introdotti mill-ġdid xi kontrolli fil-fruntieri interni. Il-Kummissjoni ħadmet mal-Istati Membri biex
- tillimita l-impatt fuq is-suq intern
- tipproteġi s-saħħa taċ-ċittadini
- tiżgura t-trattament ġust tal-persuni li l-ivvjaġġar tagħhom huwa meħtieġ
- tiżgura li l-oġġetti essenzjali jibqgħu jiċċaqalqu fl-UE
ġabet lura d-dar aktar minn 90,000 Ewropew li nqabdu mad-dinja kollha, bis-saħħa tal-mekkaniżmu tal-UE għall-protezzjoni ċivili
ħarġet linji gwida dwar “korsiji ħodor” lill-Istati Membri biex jiġi żgurat il-fluss rapidu u mingħajr interruzzjoni ta’ oġġetti fl-UE kollha
nediet “Re-open EU”, pjattaforma web b’informazzjoni essenzjali dwar il-miżuri tas-saħħa u tal-ivvjaġġar fl-UE kollha
Azzjonijiet oħra jinkludu:
- l-istabbiliment ta’ qafas komuni li jipprovdi kriterji għar-restawr sikur u gradwali tal-attivitajiet turistiċi
- il-qbil mill-Istati Membri dwar linji gwida biex jiżguraw l-interoperabbiltà transfruntiera bejn l-apps għat-traċċar sabiex liċ-ċittadini tkun tista’ tintbagħtilhom twissija dwar infezzjoni potenzjali anke meta jivvjaġġaw fl-UE
- il-proposta ta’ aktar ċarezza u prevedibbiltà ta’ kwalunkwe miżura li tirrestrinġi l-moviment liberu