Tháinig rialacha nua i bhfeidhm an 30 Bealtaine 2026 chun feabhas a chur ar fheidhmíocht fuinnimh foirgneamh ar fud an Aontais Eorpaigh. Is é is aidhm dóibh tacú leis na tíortha den Aontas a stoc foirgneamh a nuachóiriú chun fuinneamh a shábháil, billí a laghdú, agus stoc foirgneamh atá saor ó astaíochtaí agus atá dícharbónaithe go hiomlán a bhaint amach faoi 2050.
Cén fáth a bhfuil an méid sin á dhéanamh ag an Aontas?
Is iad na foirgnimh a úsáideann an méid is mó fuinnimh san Aontas, is é sin 40% d’úsáid fuinnimh an Aontais, agus is iad a astaíonn 36% d’astaíochtaí gás ceaptha teasa a bhaineann le fuinneamh. Seanfhoirgnimh atá in go leor d’fhoirgnimh an Aontais, a mbaineann drochfheidhmíocht fuinnimh le 75% acu, rud a fhágann gur príomhthosaíocht é an t-athchóiriú.
Is féidir feabhas a chur ar dhálaí maireachtála do shaoránaigh, úsáid agus costais fuinnimh a laghdú, slándáil fuinnimh a neartú, agus astaíochtaí gás ceaptha teasa a laghdú ach feabhas a chur ar fheidhmíocht fuinnimh na bhfoirgneamh.
Cad é atá an tAontas Eorpach a dhéanamh?
Leagtar amach sa Treoir athbhreithnithe maidir le Feidhmíocht Fuinnimh Foirgneamh rialacha nuashonraithe chun tithe, oifigí agus foirgnimh phoiblí a nuachóiriú de réir a chéile sna blianta amach romhainn.
Ceanglaítear ar na tíortha den Aontas pleananna náisiúnta athchóiriúcháin foirgneamh a fhorbairt a bheidh saincheaptha dá gcúinsí náisiúnta agus dá stoc foirgneamh. Leis an gcreat nua, spreagtar na tíortha den Aontas chun athchóirithe foirgneamh a mhéadú, go háirithe i gcás na bhfoirgneamh is neamhfheidhmiúla, agus béim á leagan ar an méid seo a leanas:
- Athchóiriú: cinnfidh gach tír den Aontas cé na bearta athchóiriúcháin is oiriúnaí chun na híoscheanglais feidhmíochta fuinnimh a chomhlíonadh de réir a chéile
- Dícharbónú: beidh na foirgnimh astaíochtaí nialasacha ina gcaighdeán le haghaidh foirgnimh nua; déanfar an grianfhuinneamh a chomhtháthú de réir a chéile agus cuirfear deireadh le coirí breosla iontaise de réir a chéile
- Nuachóiriú agus digiteáil ceanglais san áireamh maidir le pointí luchtúcháin chliste d’fheithiclí leictreacha agus spásanna do rothair i bhfoirgnimh nua agus athchóirithe, córais uathoibrithe agus rialaithe foirgnimh i bhfoirgnimh neamhchónaithe, agus cáilíocht na timpeallachta laistigh i bhfoirgnimh nua agus i bhfoirgnimh atá ann cheana
- Maoiniú agus cúnamh teicniúil: maoiniú níos spriocdhírithe chun aghaidh a thabhairt ar bhochtaineacht fuinnimh agus chun tacú le teaghlaigh leochaileacha agus le daoine leochaileacha atá ina gcónaí i dtithíocht shóisialta, chun a chinntiú go mbeidh an t-aistriú cothrom go sóisialta
I gcás fhormhór na saoránach, is de réir a chéile a tharlóidh na hathruithe. Is féidir go bhfeicfidh tú an méid seo a leanas:
- tacaíocht mhéadaithe do thionscadail athchóiriúcháin tí
- dreasachtaí nua le haghaidh insliú agus córais téimh éifeachtúla
- tuilleadh suiteálacha gréine
- caighdeáin níos déine maidir le tionscadail tógála nua
- aird níos mó á tabhairt ar fheidhmíocht fuinnimh agus maoin á ceannach nó á tabhairt amach ar cíos.
Tuilleadh eolais
- Dáta foilsithe
- 29 Bealtaine 2026
- Údar
- Ard-Stiúrthóireacht na Cumarsáide