App Ewropea għall-verifika tal-età biex it-tfal jinżammu sikuri online

Il-Kummissjoni Ewropea ħabbret li app ġdida għall-verifika tal-età mfassla biex tipproteġi lit-tfal online hija lesta għall-użu. F’dikjarazzjoni reċenti, il-President tal-Kummissjoni Ursula von der Leyen, ikkonfermat li t-teknoloġija hija lesta u dalwaqt se tkun tista’ tintuża miċ-ċittadini. L-app se tippermetti lill-utenti jagħtu prova tal-età tagħhom meta jaċċessaw pjattaformi online, u b’hekk tgħin biex tipproteġi lit-tfal minn kontenut dannuż jew mhux xieraq għalihom.

Minħabba li t-tfal iqattgħu aktar ħin online minn qatt qabel, is-sikurezza tagħhom saret ta’ tħassib kbir, b’bullying mifrux u disinn ta’ pjattaformi li joħolqu dipendenza. Biex jiġi evitat li t-tfal jiġu esposti għal kontenut dannuż u illegali, kif ukoll il-grooming minn predaturi online, il-Kummissjoni qed tipproponi soluzzjoni Ewropea innovattiva. L-app il-ġdida għall-verifika tal-età hija faċli għall-utent u tista’ tiġi stabbilita bl-użu ta’ passaport jew karta tal-identità, biex tippermetti lill-utenti jagħtu prova tal-età tagħhom meta jaċċessaw servizzi online. L-app hija kompletament anonima, taħdem fuq kwalunkwe apparat, u hija kompletament sors miftuħ, li jfisser li l-pajjiżi sħab madwar id-dinja jistgħu jadottawha wkoll. 

L-app hija soluzzjoni bla ħlas u ta’ użu faċli biex tissaħħaħ is-sikurezza online tat-tfal, li l-pjattaformi online jistgħu jiddependu fuqha faċilment. Xi pajjiżi tal-UE diġà qed jippjanaw li jintegraw l-app fil-kartieri nazzjonali tal-identità diġitali tagħhom, u l-President tal-Kummissjoni appella lil aktar pajjiżi tal-UE u lis-settur privat biex jagħmlu l-istess.

L-UE tibqa’ impenjata li tagħmel id-dinja diġitali aktar sikura għat-tfal. Bl-app għall-verifika tal-età, l-UE qed tieħu passi deċiżivi biex tipproteġi lit-tfal u żżomm lill-pjattaformi online responsabbli, filwaqt li ssaħħaħ il-prijorità tas-sikurezza tat-tfal fuq l-interessi kummerċjali. 

Għal iktar informazzjoni

Dikjarazzjoni tal-President

L-ekonomija u s-soċjetà diġitali