Il-Kummissjoni Ewropea qed tħeġġeġ lill-pajjiżi tal-UE jaċċelleraw l-introduzzjoni tal-app tal-UE għall-verifika tal-età, bl-għan li din issir disponibbli għaċ-ċittadini sa tmiem l-2026.
L-app Ewropea għall-verifika tal-età, imfassla biex tipproteġi aħjar lit-tfal online, issa hija lesta biex tintuża fil-pajjiżi tal-UE. Din se jippermetti lill-utenti jagħtu prova tal-età tagħhom mingħajr ma jikkondividu data personali bla bżonn u jibbrawżjaw l-internet bi privatezza sħiħa, filwaqt li tiżgura li t-tfal ma jkunux jistgħu jaċċessaw kontenut mhux xieraq.
Il-pajjiżi tal-UE jistgħu jintroduċuha bħala app awtonoma jew jintegrawha fil-Kartieri Ewropej tal-Identità Diġitali. Sabiex tiġi żgurata d-disponibbiltà rapida u l-interoperabbiltà tagħha, il-Kummissjoni tirrakkomanda li l-pajjiżi
- jużaw il-blueprint tal-app tal-UE għall-verifika tal-età, li tista’ tiġi personalizzata skont il-ħtiġijiet tagħhom
- jiżviluppaw pjanijiet ta’ implimentazzjoni biex tiġi żgurata l-adozzjoni rapida ta’ soluzzjonijiet ta’ verifika tal-età
- jaħdmu flimkien u jinvolvu ruħhom mal-Koordinaturi tas-Servizzi Diġitali, ma’ pajjiżi oħra tal-UE, mal-Kummissjoni, mar-riċerkaturi, u mas-soċjetà ċivili fl-introduzzjoni tas-soluzzjonijiet nazzjonali tagħhom
- jiżguraw il-konformità mal-istandards taċ-ċibersigurtà permezz ta’ skrutinju indipendenti minn partijiet terzi.
Barra minn hekk, il-Kummissjoni se tistabbilixxi skema ta’ verifika tal-età tal-UE. L-iskema tistabbilixxi kriterji għall-fornituri ta’ servizzi ta’ prova tal-età u għall-iżviluppaturi ta’ soluzzjonijiet ta’ verifika tal-età. Abbażi ta’ dawn il-kriterji, il-Kummissjoni se tippubblika lista ta’ fornituri li jissodisfaw l-istandards tal-privatezza u tas-sigurtà.
Il-protezzjoni u l-għoti tas-setgħa lit-tfal u lill-adolexxenti online huma prijorità ewlenija tal-Kummissjoni. Il-verifika tal-età hija element wieħed minn qafas usa’ li jinkludi l-Att dwar is-Servizzi Diġitali (DSA), il-pjan ta’ azzjoni kontra l-bullying ċibernetiku, l-istrateġija għal internet aħjar għat-tfal, u oħrajn. Il-President tal-Kummissjoni Ursula von der Leyen waqqfet ukoll bord speċjali ta’ esperti biex jgħin fl-iżvilupp ta’ approċċ Ewropew b’saħħtu u prattiku għas-sikurezza tat-tfal online.
Skont id-DSA, il-pjattaformi online jridu jiżguraw livell għoli ta’ privatezza, sigurtà u sikurezza għall-minorenni online. Reċentement, il-Kummissjoni sabet b’mod preliminari li Meta kisret dawn ir-regoli meta naqset milli tipprevjeni lill-minorenni taħt it-tlettax-il sena milli jużaw Instagram u Facebook.
Għal iktar informazzjoni
Kummenti mill-Viċi President Eżekuttiv Virkkunen
Mistoqsijiet u tweġibiet: Soluzzjoni ta’ verifika tal-età tal-UE
L-approċċ tal-UE għall-verifika tal-età
- Data tal-pubblikazzjoni
- 29 April 2026
- Awtur
- Id-Direttorat Ġenerali għall-Komunikazzjoni