Ir-rapport annwali tal-Kummissjoni Ewropea dwar l-Istat tad-Deċennju Diġitali jivvaluta l-progress li wettqet l-UE fir-rigward tal-miri tagħha għall-2030 b’rabta mat-trasformazzjoni diġitali.
Ir-rapport tal-2026 juri li l-UE għamlet progress f’oqsma ewlenin. Madankollu, il-lakuni strutturali għadhom qed ixekklu t-trasformazzjoni diġitali tal-Ewropa, u se jkun hemm bżonn ta’ azzjoni aktar malajr biex jintlaħqu l-miri għall-2030.
Il-konklużjonijiet ewlenin tar-rapport huma dawn:
- L-infrastruttura diġitali: 96.8% tal-familji llum il-ġurnata għandhom kopertura bażika tal-5G, iżda l-użu tal-fibra, is-semikondutturi, u l-kapaċità tal-kompjuting għadhom lura meta mqabblin mal-miri għall-2030.
- Id-diġitalizzazzjoni tan-negozji: aktar negozji qed jużaw il-cloud computing, l-analitika tad-data, u l-IA, iżda bosta intrapriżi żgħar u ta’ daqs medju għadhom qed isibu l-ħitan quddiemhom meta jiġu biex jadottaw soluzzjonijiet diġitali avvanzati.
- Il-ħiliet diġitali: aktar minn 60% tal-Ewropej illum il-ġurnata għandhom mill-inqas ħiliet diġitali bażiċi, iżda n-nuqqas ta’ speċjalisti tal-ICT għadu sinifikanti u d-differenza bejn il-ġeneri għadha tippersisti.
Ir-rapport jipprovdi rakkomandazzjonijiet ċari kemm għall-UE kif ukoll għall-Istati Membri dwar kif għandhom jixxejnu l-lakuni li fadal, inkluż billi jiżdiedu l-proġetti ta’ suċċess u jiġu mmobilizzati l-investimenti.
Il-Kummissjoni issa qed tappella lill-pajjiżi tal-UE biex jaġġornaw il-pjanijiet direzzjonali nazzjonali tagħhom tad-Deċennju Diġitali b’miżuri konkreti u allinjament aktar b’saħħtu mal-baġit fit-tul li jmiss tal-UE.
Fl-2027, il-Kummissjoni se tirrieżamina l-miri tad-Deċennju Diġitali biex tirrifletti l-iżviluppi teknoloġiċi u politiċi u tħejji l-qafas għal wara l-2030.
Għal iktar informazzjoni
L-Istat tad-Deċennju Diġitali 2026 — rapport
- Data tal-pubblikazzjoni
- 17 Ġunju 2026
- Awtur
- Id-Direttorat Ġenerali għall-Komunikazzjoni