Kull sena, il-Kummissjoni Ewropea tipproduċi dokumenti ta’ strateġija f’ċiklu magħruf bħala ċ-ċiklu tal-ippjanar u tal-ipprogrammar strateġiku.
Il-Kummissjoni twettaq dan iċ-ċiklu biex tiżgura li tinsab fit-triq it-tajba biex tikseb il-prijoritajiet politiċi stabbiliti mill-President tal-Kummissjoni fil-bidu tat-terminu ta’ ħames snin tagħha.
L-aħħar dokumenti ta’ strateġija tagħna
Linji gwida politiċi
L-istrateġija ġenerali tal-UE hi żviluppata b'mod konġunt mill-istituzzjonijiet tagħha: il-Parlament Ewropew, il-Kunsill Ewropew, il-Kunsill tal-Unjoni Ewropea, u l-Kummissjoni Ewropea.
Wara skambji ma’ istituzzjonijiet oħrajn, il-President tal-Kummissjoni jiddetermina l-prijoritajiet politiċi għall-mandat tiegħu. Fil-bidu ta’ mandant ġdid tal-Kummissjoni, il-President tal-Kummissjoni jistabbilixxi l-oqsma ta’ prijorità għal dak it-terminu fil-linji gwida politiċi.
Programm ta’ ħidma tal-Kummissjoni
Il-programm ta’ ħidma annwali jistabbilixxi l-pjan tal-Kummissjoni għas-sena li tkun ġejja. Dan jiġi adottat wara d-diskors dwar l-Istat tal-Unjoni tal-President u jiddeskrivi kif il-prijoritajiet politiċi tal-Kummissjoni se jissarrfu f’azzjonijiet konkreti.
Pjanijiet strateġiċi
Il-pjanijiet strateġiċi huma dokumenti ta’ ppjanar fejn id-dipartimenti tal-Kummissjoni jiddeskrivu kif se jappoġġjaw il-miri politiċi ġenerali tal-Kummissjoni, u jiddefinixxu objettivi speċifiċi tad-dipartiment għal perjodu ta’ ħames snin.
Pjanijiet ta’ ġestjoni
Il-pjanijiet ta’ ġestjoni jiddeskrivu l-attivitajiet ta’ kull dipartiment tal-Kummissjoni għas-sena u jispjegaw kif dawn se jikkontribwixxu biex jintlaħqu l-objettivi li kienu stabbiliti fil-pjan strateġiku tagħha.
Programmi ta’ ħidma annwali tal-aġenziji eżekuttivi
Il-programmi ta’ ħidma annwali tal-aġenziji eżekuttivi jiddeskrivu kif qed jippjanaw li jimplimentaw il-programm tal-infiq tagħhom, kif ukoll il-prijoritajiet tad-dipartimenti prinċipali rispettivi tagħhom.
L-aġenziji eżekuttivi jużaw ukoll il-programmi ta’ ħidma annwali tagħhom biex jirrappurtaw il-prestazzjoni tagħhom abbażi ta’ indikaturi predefiniti. Dawn l-indikaturi huma ddeterminati matul il-baġit fit-tul tal-UE.
Aqra l-programmi ta’ ħidma annwali tal-2023 tal-aġenziji eżekuttivi
Rapporti annwali tal-attività
Ir-rapporti annwali tal-attività jippreżentaw il-progress li jkunu għamlu d-dipartimenti tal-Kummissjoni fil-kisba tal-objettivi stabbiliti fil-pjanijiet strateġiċi u ta’ ġestjoni tagħhom.
Rapporti annwali dwar il-ġestjoni u l-prestazzjoni
Ir-rapport annwali dwar il-ġestjoni u l-prestazzjoni jipprovdi ħarsa ġenerali lejn il-riżultati miksuba mill-baġit tal-UE u jispjega kif il-baġit tal-UE ġie mmaniġġjat u protett.
Aqra r-rapporti annwali dwar il-ġestjoni u l-prestazzjoni attwali u preċedenti
Iċ-ċiklu tal-ippjanar u tal-ipprogrammar strateġiku
Fil-bidu ta’ mandant ġdid tal-Kummissjoni, il-President tal-Kummissjoni jistabbilixxi l-oqsma ta’ prijorità għal dak it-terminu fil-linji gwida politiċi. Iċ-ċiklu jibda bil-programm ta’ ħidma annwali li jiddeskrivi dak li l-Kummissjoni qed tippjana li tikseb fis-sena li tkun ġejja.
Kull dipartiment tal-Kummissjoni (minbarra l-aġenziji eżekuttivi) jistabbilixxi pjanijiet strateġiċi multiannwali fil-bidu tat-terminu tal-Kummissjoni l-ġdida. Il-pjanijiet strateġiċi, flimkien mal-programm ta’ ħidma tal-Kummissjoni, jiffurmaw il-bażi tal-pjanijiet ta’ ġestjoni annwali ta’ kull dipartiment. Dawn il-pjanijiet (jew programm ta’ ħidma annwali, fil-każ tal-aġenziji eżekuttivi) jiddefinixxu l-objettivi ewlenin tad-dipartiment għas-sena li tkun ġejja u jispjegaw kif se jikkontribwixxu għall-prijoritajiet ġenerali tal-Kummissjoni.
Fl-aħħar tas-sena, id-dipartimenti kollha jipproduċu rapport annwali tal-attività (jew programm ta’ ħidma annwali, fil-każ tal-aġenziji eżekuttivi) bid-dettalji tal-progress li jkunu għamlu fil-kisba tal-objettivi tagħhom għal dik is-sena. Dawn ir-rapporti annwali tal-attività huma l-bażi għar-rapport annwali dwar il-ġestjoni u l-prestazzjoni tal-Kummissjoni li jispjega kif il-baġit tal-UE kkontribwixxa għall-kisbiet tal-Kummissjoni matul dik is-sena. Permezz tar-rapport annwali dwar il-ġestjoni u l-prestazzjoni, il-Kulleġġ tal-Kummissarji jieħu responsabbiltà politika għall-ġestjoni ġenerali tal-baġit tal-UE f’sena partikolari.