Għaddew sentejn minn mindu daħal l-Att dwar is-Servizzi Diġitali, li jiżgura spazji online aktar sikuri

Sentejn ilu, daħal fis-seħħ l-Att dwar is-Servizzi Diġitali (DSA).

Id-DSA jipproteġi d-drittijiet fundamentali tiegħek online billi jirregola s-servizzi online bħall-pjattaformi tal-midja soċjali, is-swieq online, l-app stores, u s-servizzi tal-ivvjaġġar u tal-akkomodazzjoni online. L-għan tiegħu hu li jiggarantixxi spazju diġitali aktar sikur billi jindirizza kwistjonijiet bħad-disinn li joħloq dipendenza, il-kontenut illegali, it-tattiċi manipulattivi, u aktar.

Minn Frar 2024 ’l hawn, id-DSA japplika għall-biċċa l-kbira tal-pjattaformi fl-UE, ħlief għall-intrapriżi mikro u żgħar. L-infurzar jinqasam bejn l-awtoritajiet nazzjonali (il-Koordinaturi tas-Servizzi Diġitali) u l-Kummissjoni Ewropea. Il-Kummissjoni tissorvelja l-akbar pjattaformi. 

Biex tiżgura l-konformità, il-Kummissjoni fetħet diversi investigazzjonijiet. F’xi każijiet, dawn wasslu biex il-pjattaformi jagħmlu bidliet konkreti. Xi investigazzjonijiet għadhom għaddejjin. Pereżempju, il-Kummissjoni dan l-aħħar nediet investigazzjoni dwar l-X u dwar l-użu li tagħmel minn Grok, u estendiet l-investigazzjoni li qed tagħmel bħalissa biex tkopri s-sistemi ta’ rakkomandazzjoni tal-X. Nediet ukoll investigazzjoni dwar ix-Shein minħabba d-disinn li joħloq dipendenza, in-nuqqas ta’ trasparenza, u l-bejgħ ta’ prodotti illegali.

F’każ ieħor, il-Kummissjoni sabet b’mod preliminari li d-disinn tat-TikTok, li joħloq dipendenza, jikser id-DSA. Meta jiġri dan, il-pjattaforma tista’ tiddefendi lilha nnifisha. Tista’ teżamina l-fajls tal-investigazzjoni u twieġeb bil-miktub qabel ma tittieħed kwalunkwe deċiżjoni finali. Il-pjattaformi l-kbar li ma jikkonformawx mad-DSA jistgħu jiffaċċjaw multi sa 6% tal-fatturat annwali globali tagħhom. Jista’ wkoll jagħti l-każ li jkollhom jieħdu miżuri korrettivi.

Permezz ta’ miżuri bħad-DSA, l-UE qed issawwar il-futur diġitali tal-Ewropa. Qed tappoġġa, tiffinanzja, u tirregola t-teknoloġiji ġodda bl-għan li ssaħħaħ id-demokrazija u tagħmel l-Ewropa aktar kompetittiva u teknoloġikament indipendenti.

Għal aktar tagħrif

L-Att dwar is-Servizzi Diġitali