Fit-2 ta’ Awwissu 2026, jidħlu fis-seħħ regoli ġodda dwar it-trasparenza tas-sistemi tal-IA.
L-IA qed tavvanza malajr, u dan jagħmilha dejjem aktar diffiċli li l-kontenut iġġenerat u mmanipulat mill-IA jingħaraf mill-kontenut maħluq mill-bniedem u awtentiku. Dan joħloq riskji ġodda ta’ miżinformazzjoni u manipulazzjoni fuq skala kbira, frodi, personifikazzjoni, u qerq għad-dannu tal-konsumatur.
L-obbligi l-ġodda tat-trasparenza se jgħinu lin-nies jagħrfu meta jkunu qed jinteraġixxu mal-IA jew meta jkunu esposti għal kontenut iġġenerat mill-IA, sabiex ikunu jistgħu jieħdu deċiżjonijiet infurmati u jipproteġu lilhom infushom aħjar mill-miżinformazzjoni jew mill-qerq.
L-obbligi tat-trasparenza għall-fornituri u l-implimentaturi ta’ ċerti sistemi tal-IA
- L-immarkar u t-tikkettar tal-kontenut iġġenerat mill-IA: ċertu kontenut iġġenerat jew immanipulat bl-IA jrid ikun ittikkettat b’mod ċar u viżibbli u jinkludi marki li jinqraw mill-magna. L-UE ħolqot sensiela ta’ ikoni li jistgħu jintużaw għal dan l-għan. Din ir-regola tgħodd
- għall-immaġnijiet, kontenut tal-awdjo u tal-vidjo li jixbhu lil persuni, oġġetti, postijiet, entitajiet, jew avvenimenti eżistenti (deepfakes)
- għall-għodod li jagħrfu l-emozzjonijiet u għal dawk tal-kategorizzazzjoni bijometrika
- għal testi ppubblikati biex in-nies jiġu infurmati dwar kwistjonijiet ta’ interess pubbliku mingħajr ma jsirulhom reviżjoni jew superviżjoni editorjali mill-bniedem.
- It-trasparenza fl-interazzjoni ma’ sistema tal-IA: L-utenti jridu jiġu infurmati b’mod ċar meta ma jkunux qed jinteraġixxu ma’ persuna reali, iżda ma’ sistema tal-IA, pereżempju chatbot, aġent tal-IA, u avatar.
Il-Kummissjoni ppubblikat linji gwida biex tassisti lill-fornituri u l-implimentaturi tas-sistemi tal-IA jissodisfaw dawn l-obbligi tat-trasparenza. Il-linji gwida jispjegaw kif tista’ tintwera l-konformità, inkluż permezz tal-aderenza ma’ kodiċi ta’ prattika.
L-infurzar tar-regoli u s-sanzjonijiet
L-awtoritajiet nazzjonali tas-sorveljanza tas-suq, l-Uffiċċju Ewropew għall-IA (għas-sistemi taħt is-superviżjoni tiegħu), u l-Kontrollur Ewropew għall-Protezzjoni tad-Data (meta l-istituzzjonijiet tal-UE jkunu l-fornituri jew l-implimentaturi) huma responsabbli għall-infurzar tar-regoli dwar it-trasparenza u jistgħu joħorġu multi
- sa €15-il miljun, jew 3% tal-fatturat annwali globali, fil-każ tal-kumpaniji
- sa €750,000 fil-każ tal-istituzzjonijiet, il-korpi, u l-aġenziji tal-UE
- filwaqt li jingħata kas tal-proporzjonalità fil-każ tal-intrapriżi żgħar u ta’ daqs medju (SMEs) u tal-kumpaniji żgħar b’kapitalizzazzjoni medja (SMCs)
L-Att dwar l-IA daħal fis-seħħ fl-1 ta’ Awwissu 2024. Id-dispożizzjonijiet tiegħu japplikaw fi stadju wara l-ieħor, b’obbligi differenti li jidħlu fis-seħħ fi żminijiet differenti. L-Att joħloq suq uniku u regoli armonizzati għal IA affidabbli fl-UE u jippromwovi l-innovazzjoni u l-adozzjoni tal-IA. Jindirizza wkoll ir-riskji potenzjali għas-saħħa, is-sikurezza, u d-drittijiet fundamentali tan-nies, filwaqt li jissalvagwardja d-demokrazija u l-istat tad-dritt. L-iżgurar tal-implimentazzjoni effettiva tiegħu issa huwa prijorità ewlenija tal-Kummissjoni.
Għal aktar tagħrif
Stqarrija għall-istampa: Il-Kummissjoni tibda tinforza r-regoli tal-Att dwar l-IA
Stqarrija għall-istampa: Linji gwida dwar l-obbligi tat-trasparenza
Mistoqsijiet frekwenti: L-obbligi tat-trasparenza
Mad-daqqa t’għajn: Ir-regoli tat-trasparenza għas-sistemi tal-IA
- Data tal-pubblikazzjoni
- 2 Awwissu 2026
- Awtur
- Id-Direttorat Ġenerali għall-Komunikazzjoni