A bhuí le smacht reachta éifeachtach, is féidir linn leas a bhaint as córais cheartais neamhspleácha, as rialacha frith-éillithe a mbíonn tionchar acu, as meáin shaora iolraíocha, agus as srianta agus ceartúcháin láidre lena gcosnaítear ár gcearta agus lena gcothaítear ár muinín as institiúidí poiblí agus as an daonlathas. Soláthraíonn sé freisin an deimhneacht dhlíthiúil a thacaíonn le hinfheistíocht, le hiomaíochas agus le fás eacnamaíoch. Mar a tharla sna blianta roimhe seo, léirítear i dTuarascáil 2026 ón gCoimisiún Eorpach maidir leis an Smacht Reachta an chaoi a bhfuil ag éirí leis an smacht reachta ar fud an Aontais agus i gceithre thír is iarrthóirí, is iad sin: an Albáin, Montainéagró, an Mhacadóin Thuaidh agus an tSeirbia.
Ar an iomlán, deimhnítear sa tuarascáil conair dhearfach den chuid is mó, rud a léiríonn dul chun cinn leanúnach i roinnt mhaith Ballstát, agus athchóirithe suntasacha tugtha chun críche nó ar siúl acu. Cé go bhfuil roinnt dúshlán fós ann agus go bhfuil an dul chun cinn míchothrom, tá an tuarascáil agus a moltaí ag leanúint d’athchóiriú agus d’athrú a spreagadh sna tíortha uile a ndéantar faireachán orthu.
Na príomhthorthaí
Córais cheartais
Tá dul chun cinn déanta ag go leor Ballstát maidir le hathchóirithe ceartais le bliain anuas. Áirítear ar na bearta ar tugadh fúthu neamhspleáchas na gComhairlí um na Breithiúna a neartú, coimircí breise maidir le ceapacháin agus nósanna imeachta araíonachta breithiúna, agus neamhspleáchas na seirbhísí ionchúisimh a neartú.
Frithéilliú
Le tacaíocht ón gCoimisiún, tá Treoir nua an Aontais maidir leis an éilliú a chomhrac á tabhairt isteach ag na Ballstáit uile anois lena gcruthaítear creat chun éilliú san Aontas a chosc, a bhrath agus smachtbhannaí a fhorchur ina leith.
Tá straitéisí nua frithéillithe forbartha ag roinnt Ballstát freisin agus neartaigh siad a n-acmhainneacht institiúideach chun an t-éilliú a chomhrac.
Saoirse na meán agus iolrachas
Tá athchóirithe ar bun sna Ballstáit chun a ndlíthe náisiúnta a ailíniú leis an nGníomh Eorpach um Shaoirse na Meán.
Tá feidhmiú neamhspleách agus maoiniú na meán seirbhíse poiblí á neartú ag roinnt Ballstát agus tá cothroime agus trédhearcacht á gcinntiú acu i leithdháileadh na fógraíochta stáit.
Tá sábháilteacht iriseoirí fós ina tosaíocht ag an gCoimisiún agus tá a Mholadh maidir le sábháilteacht iriseoirí á thabhairt cothrom le dáta aige.
Tá bearta nithiúla á ndéanamh ag go leor Ballstát chun aghaidh a thabhairt ar fheiniméan na nImeachtaí Cúirte Mí-úsáideacha i gcoinne na Rannpháirtíochta Poiblí (SLAPPanna), agus leanann an Coimisiún de bheith ag obair leo chun tacú le trasuí agus cur chun feidhme na Treorach frith-SLAPP.
Srianta agus ceartúcháin institiúideacha
I roinnt Ballstát, tá easnaimh fós ann maidir le húsáid iomarcach nósanna imeachta reachtacha éigeandála agus easpa rannpháirtíochta ó pháirtithe leasmhara.
Leanann go leor Ballstát de chreat cumasúcháin agus tacaíochta a chinntiú don tsochaí shibhialta, agus leanann siad d’iarrachtaí a dhéanamh chun a dtimpeallacht oibriúcháin a fheabhsú a thuilleadh. Mar sin féin, leanann gníomhaithe na sochaí sibhialta i roinnt Ballstát de dhúshláin a thuairisciú i roinnt Ballstát, teorainneacha ar mhaoiniú agus ar chomhthionól síochánta ina measc.
Leagtar béim sa Tuarascáil ar thionchar an smachta reachta sna hearnálacha sin uile ar fheidhmiú an mhargaidh aonair agus ar an timpeallacht oibriúcháin do ghnólachtaí.
Iarrann an Coimisiún ar na Ballstáit aghaidh a thabhairt ar na dúshláin a sainaithníodh i dtuarascáil na bliana seo, agus tá sé réidh chun tacú le cur chun feidhme na moltaí.
Tuilleadh eolais
Tuarascáil 2026 maidir leis an Smacht Reachta
Flais-Eorabharaiméadar 584 maidir le dúshláin agus tosaíochtaí an Aontais Eorpaigh
- Dáta foilsithe
- 17 Iúil 2026
- Údar
- Ard-Stiúrthóireacht na Cumarsáide