Rialacha nua molta ag an gCoimisiún chun soláthar cobhsaí cógas leighis criticiúil a chinntiú

Ba cheart rochtain a bheith ag othair san Aontas ar na cógais leighis a theastaíonn uathu, nuair a theastaíonn siad uathu. Ar an drochuair, le blianta beaga anuas tá tíortha an Aontais ag dul i ngleic le géarghanntanas cógas leighis, rud a chuaigh in olcas i ngeall ar imeachtaí domhanda amhail paindéim COVID-19. Is é is aidhm don Ghníomh um Tháirgí Íocshláinte Criticiúla, a mhol an Coimisiún inniu, tacú le monarú agus feabhas a chur ar infhaighteacht cógas leighis criticiúil san Aontas.

Is fadhbanna monaraíochta, leochaileachtaí sa slabhra soláthair agus iomaíocht dhomhanda le haghaidh acmhainní is mó is cúis le ganntanais cógas leighis. Is é is aidhm don Ghníomh nua na dúshláin sin a shárú. Ar na príomhghnéithe tá:

• feabhas a chur ar acmhainneacht mhonaraíochta an Aontais le haghaidh cógais leighis chriticiúla trí thionscadail straitéiseacha
• úsáid an tsoláthair phoiblí chun slabhraí soláthair iontaofa cógas criticiúil a spreagadh nó chun rochtain ar chógais eile a fheabhsú 
• tacú le soláthar comhoibríoch i measc thíortha an Aontais chun rochtain chothrom ar chógais thábhachtacha a chinntiú ar fud an Aontais 
• breathnú ar chomhpháirtíochtaí idirnáisiúnta chun spleáchas ar sholáthraithe aonair nó ar líon teoranta soláthróirí a laghdú 

Tá sé ina thosaíocht ag an Aontas le blianta fada dul i ngleic le ganntanais agus rochtain ar chógais leighis a chinntiú. Comhlánaíonn an Gníomh nua um Tháirgí Íocshláinte Criticiúla tograí reachtacha a cuireadh ar aghaidh cheana féin chun aghaidh a thabhairt air sin, go háirithe trí athchóiriú a dhéanamh ar straitéis chógaisíochta an Aontais. Tá ról lárnach ag an nGníomhaireacht Leigheasra Eorpach, i gcomhar leis na húdaráis náisiúnta, maidir le monatóireacht a dhéanamh ar na ganntanais chriticiúla cógas sin agus freagairt dóibh.

Tuilleadh eolais

Preaseisiúint: An Gníomh um Tháirgí Íocshláinte Criticiúla molta ag an gCoimisiún chun borradh a chur faoi sholáthar cógas leighis criticiúil san Aontas 

Ceisteanna agus freagraí faoin nGníomh um Tháirgí Íocshláinte Criticiúla 

Bileog Eolais faoin nGníomh um Tháirgí Íocshláinte Criticiúla

Modernising the EU pharmaceutical legislation

an Ghníomhaireacht Leigheasra Eorpach

An Comhaontas um Chógais Leighis Chriticiúla