Azzjonijiet għall-ugwaljanza bejn il-ġeneri

Il-Kummissjoni Ewropea ressqet firxa ta’ inizjattivi u proposti biex tgħin twitti t-triq għal soċjetà li fiha n-nies kollha jistgħu verament jgħidu li huma kapaċi jgħixu u jirnexxu b’opportunitajiet indaqs. Dan l-aħħar, stabbiliet viżjoni fit-tul biex tavvanza d-drittijiet tan-nisa fi Pjan Direzzjonali ġdid.

Vjolenza abbażi tal-ġeneru

Aktar minn 3,000 mara jinqatlu kull sena fl-Ewropa minn sħab jew membri tal-familja, u ħafna aktar qed jiġu mweġġa’ u jiġu ffastidjati.

Il-vjolenza kontra in-nisa tieħu ħafna forom, inkluża vjolenza fiżika, sesswali jew psikoloġika, kif ukoll abbuż u sfruttament ekonomiku. Hija intensifikat f’ambjenti differenti, inklużi l-post tax-xogħol u l-ispazji online, u ġiet aggravata mill-effetti ta’ wara l-pandemija, il-kunflitti, u t-tibdil fil-klima.

^Sorsi: UN Women^{, Eurostat, L-Aġenzija tal-Unjoni Ewropea għad-Drittijiet Fundamentali (FRA)}

It-tipi ta’ vjolenza kontra n-nisa jinkludu: 

• il-vjolenza minn sieħeb intimu
• il-vjolenza sesswali
• il-femiċidju
• it-traffikar tal-bnedmin
• il-mutilazzjoni ġenitali femminili
• il-vjolenza online jew iffaċilitata mit-teknoloġija
• żwiġijiet tat-tfal, sfurzati 

Fl-2022, il-Kummissjoni pproponiet leġiżlazzjoni ġdida biex tiżgura livell minimu ta’ protezzjoni kontra dawn il-forom ta’ vjolenza fl-UE kollha, irrispettivament minn jekk seħħewx online jew offline. Il-Parlament Ewropew u l-Istati Membri laħqu qbil politiku dwar il-proposta tal-Kummissjoni fis-6 ta’ Frar 2024.

Barra minn hekk, l-UE lestiet il-proċedura tar-rattifika tal-Konvenzjoni tal-Kunsill tal-Ewropa dwar il-Prevenzjoni u l-Ġlieda Kontra l-Vjolenza fuq in-Nisa u l-Vjolenza Domestika, il-“Konvenzjoni ta’ Istanbul”.

Il-Konvenzjoni ta’ Istanbul għall-UE daħlet fis-seħħ fl-1 ta’ Ottubru 2023. Dan ifisser li l-UE issa hija marbuta bi standards ambizzjużi u komprensivi biex tipprevjeni u tiġġieled il-vjolenza kontra n-nisa u l-vjolenza domestika.

Ara x’qed tagħmel l-UE biex ittemm il-vjolenza abbażi tal-ġeneru

Inugwaljanzi fis-suq tax-xogħol

In-nisa għadhom rappreżentati żżejjed f’impjiegi b’pagi baxxi u sottorappreżentati f’pożizzjonijiet ta’ teħid ta’ deċiżjonijiet. Barra minn hekk, in-nisa fl-UE għadhom jaqilgħu inqas mill-irġiel, u hekk kif jixjieħu, din id-differenza bejn il-pagi tal-irġiel u n-nisa qed tiżdied saħansitra aktar. 

L-istatistika turi li ċerti impjiegi huma miżmuma l-aktar min-nisa. 

• Fl-UE, 95% ta’ dawk li jnaddfu u dawk li jagħtu l-għajnuna domestika huma nisa
• In-nisa jirrappreżentaw il-maġġoranza tal-forza tax-xogħol tat-tagħlim (72%) u tal-kura tas-saħħa (78%)  

^{Sorsi: EIGE, Eurostat (statistika dwar it-tagħlim, ċifri dwar il-forza tax-xogħol fil-qasam tal-kura tas-saħħa)}

L-istereotipi marbutin mal-ġeneru huma mnaqqxa sew fil-kultura tagħna u huma kawża ewlenija tal-inugwaljanzi bejn il-ġeneri.   

^{Sorsi: Eurostat (2025), L-Istitut Ewropew għall-Ugwaljanza bejn is-Sessi (2023)}

Ara x’qed tagħmel l-UE biex tnaqqas id-differenza fil-pagi 

Skopri l-azzjonijiet tal-UE biex tippromwovi l-ugwaljanza fl-impjiegi 

Kampanja tal-UE: Nindirizzaw l-istereotipi tal-ġeneri

#EndGenderStereotypes: Sensibilizzazzjoni dwar ir-rwol li għandhom l-istereotipi tal-ġeneri fis-soċjetà

X’ġeneru jiġi mill-ewwel f’moħħok meta taħseb dwar ġugarell partikolari, impjieg, sport, jew saħansitra kulur? L-istereotipi u l-preġudizzji tal-ġeneri jinbnew fl-imħuħ tan-nies sa mit-tfulija – jista’ jkun li lanqas biss inkunu konxji minnhom, iżda jaffettwawna lkoll. L-istereotipi tal-ġeneri għan-nisa u l-irġiel, il-bniet u s-subien, jistgħu jillimitaw il-kapaċitajiet u l-aspirazzjonijiet tagħna li nagħżlu qasam ta’ studju jew taħriġ, isegwu karriera professjonali, u jagħmlu għażliet tal-ħajja sempliċi, bħall-għażla ta’ passatemp. Wasal iż-żmien li naħsbu mill-ġdid dwar il-perspettivi tagħna u niddubitaw l-istereotipi tal-ġeneri!
 

Skopri aktar

Bilanċ bejn il-ħajja privata u x-xogħol

Ir-riċerka turi li fid-dar, in-nisa għadhom iġorru l-piż tar-responsabbiltajiet tal-kura u dawk domestiċi meta mqabbla mal-irġiel.

Id-diviżjoni inugwali tar-responsabbiltajiet ta’ indukrar u l-kompiti domestiċi tista’ tnaqqas l-opportunitajiet tan-nisa li jkunu fl-impjieg, jew tħeġġeġ lin-nisa jfittxu impjiegi part-time li jippermettu aktar flessibbiltà fil-ħin, għad-detriment ta’ pagi aktar baxxi. Skont l-Eurostat, fl-2024, 46.6% tan-nisa f’okkupazzjonijiet elementari kienu ħaddiema part-time meta mqabbel ma’ 15.8% tal-irġiel.

Biex tindirizza dan, l-UE adottat firxa ta’ direttivi li jintroduċu drittijiet minimi taċ-ċittadini biex jikkombinaw ix-xogħol u l-ħajja privata, filwaqt li tippromwovi sehem aħjar tar-responsabbiltajiet ta’ indukrar bejn in-nisa u l-irġiel.

Ara l-leġiżlazzjoni tal-UE dwar il-bilanċ bejn ix-xogħol u l-ħajja privata 

Tgħallem dwar l-azzjonijiet tal-UE għall-promozzjoni tal-bilanċ bejn ix-xogħol u l-ħajja privata

Lejn il-kisba ta’ ugwaljanza sħiħa bejn il-ġeneri

L-UE għadha ma kisbitx ugwaljanza sħiħa bejn il-ġeneri, iżda sar progress, kif jidher fl-Indiċi tal-Ugwaljanza bejn il-Ġeneri tal-2025. L-UE kisbet 63.4 punt (minn 100). L-għan huwa li jintlaħaq punteġġ ta’ 100, li jkun ifisser li l-UE tkun laħqet ugwaljanza sħiħa bejn in-nisa u l-irġiel.

Esplora l-Indiċi tal-Ugwaljanza bejn il-Ġeneri 2025

Strateġiji dwar l-ugwaljanza bejn il-ġeneri

Fl-2026, il-Kummissjoni adottat strateġija mġedda dwar l-ugwaljanza bejn il-ġeneri għall-perjodu 2026–2030, li se

• tissokta bil-ġlieda kontra l-vjolenza abbażi tal-ġeneru, b’enfasi fuq il-ġlieda kontra l-vjolenza online
• tindirizza d-distakk bejn il-ġeneri fil-pagi u l-pensjonijiet
• tippromwovi l-ogħla standards tas-sistemi tas-saħħa u tas-servizzi tas-saħħa li jkunu maħsubin għal kulħadd.
• tieħu aktar miżuri biex tiġi sostnuta l-parteċipazzjoni ugwali u sikura tan-nisa fil-politika
• tibqa’ tippromwovi l-ugwaljanza bejn il-ġeneri fil-livell globali

L-istrateġija l-ġdida tibni fuq il-progress li nkiseb bl-istrateġija għall-perjodu 2020–2025, li biha l-UE

• adottat miżuri vinkolanti ta’ trasparenza fil-pagi
• adottat direttiva dwar il-bilanċ bejn il-ġeneri fil-bordijiet korporattivi
• irratifikat il-Konvenzjoni tal-Kunsill tal-Ewropa dwar il-prevenzjoni u l-ġlieda kontra l-vjolenza fuq in-nisa u l-vjolenza domestika
• ipproponiet Strateġija Ewropea għall-Kura u miri ġodda dwar l-edukazzjoni u l-kura bikrija tat-tfal biex tissaħħaħ il-parteċipazzjoni tan-nisa fis-suq tax-xogħol.

It-trawwim tal-progress

L-aħħar rapport dwar l-ugwaljanza bejn il-ġeneri jenfasizza l-iżviluppi importanti li ntlaħqu matul il-mandat preċedenti tal-Kummissjoni fir-rigward tal-pagi ugwali, il-bordijiet tal-kumpaniji bbilanċjati bejn il-ġeneri, il-bilanċ bejn ix-xogħol u l-ħajja privata u l-ġlieda kontra l-vjolenza fuq in-nisa. Ir-rapport jiddikjara wkoll li l-UE miexja fid-direzzjoni t-tajba, iżda l-progress ivarja fost il-pajjiżi tal-UE.

Issa huma meħtieġa sforzi komuni kkoordinati biex jiġi żgurat li l-partijiet korrispondenti tal-leġiżlazzjoni jiġu implimentati kif suppost, sabiex id-drittijiet u d-dinjità tan-nisa u l-bniet finalment u b’mod konsistenti jiġu infurzati, protetti u promossi. L-isforz għall-ugwaljanza għal kulħadd u l-ugwaljanza fis-sensi kollha tagħha se jibqgħu jkunu ċentrali għall-ħidma tal-Kummissjoni.

Il-Kummissjoni qed tinvesti wkoll f’futur ugwali bejn il-ġeneri. Il-proġetti relatati mal-ugwaljanza bejn il-ġeneri huma appoġġjati u ffinanzjati permezz ta’ diversi programmi tal-UE, bħall-Programm dwar iċ-Ċittadini, l-Ugwaljanza, id-Drittijiet u l-Valuri (CERV) u l-programmi ta’ finanzjament tal-koeżjoni tal-UE. 

Il-pajjiżi tal-UE huma meħtieġa jikkonformaw mal-Karta tad-Drittijiet Fundamentali tal-UE meta jimplimentaw il-liġi tal-UE. Id-drittijiet fundamentali huma normalment protetti wkoll mill-kostituzzjoni ta’ pajjiżek. Jekk tħoss li d-drittijiet tiegħek għall-ugwaljanza qed jinkisru, ara kif tista’ tressaq ilment fil-livell nazzjonali.