Għal ħafna snin, kien jagħmel iktar sens għan-nies li jarmu prodott miksur jew difettuż u jissostitwuh b’wieħed ġdid, milli li jsewwuh. Dan iġġenera ammont sostanzjali ta’ skart u konsum tar-riżorsi bla bżonn.
Mill-31 ta’ Lulju 2026 dan se jinbidel, u se jkun possibbli li jiġi estiż iċ-ċiklu tal-ħajja tal-prodotti u tinħoloq sistema li tiffavorixxi t-tiswija ta’ prodott minflok ix-xiri ta’ wieħed ġdid. Dan se japplika għall-prodotti domestiċi u elettroniċi bħall-magni tal-ħasil tal-ħwejjeġ, il-vacuum cleaners, il-mowbajls, it-tablets u l-bqija.
Dawn ir-regoli l-ġodda se jirriżultaw fi ffrankar għall-konsumaturi, se jagħtu spinta lill-ekonomija ċirkolari u se jappoġġaw l-objettivi tal-konsum sostenibbli. B’mod konkret, fost affarijiet oħra, se
- jipprovdu lill-konsumaturi bid-dritt li jitolbu li l-manifatturi jsewwu prodotti li teknikament jistgħu jissewwew skont id-dritt tal-UE. Barra minn hekk, it-tiswija trid issir b’xejn jew bi prezz raġonevoli, fi żmien raġonevoli, biex jitħeġġu t-tiswijiet.
- jestendu b’mill-inqas 12-il xahar il-garanzija legali tal-prodott, meta l-konsumatur jagħżel li jsewwi prodott minflok jissostitwih fil-perjodu ta’ responsabbiltà
- jirrikjedu li l-manifatturi jipprovdu informazzjoni faċilment aċċessibbli dwar is-servizzi tat-tiswija, kif ukoll aċċess għall-ispare parts bi prezz raġonevoli
Huwa mistenni li dawn ir-regoli l-ġodda se jiġġeneraw €4.8 biljun fi tkabbir u investiment fl-UE.
Pjattaforma Ewropea online ġdida tat-tiswijiet, li għandha ssir operattiva fl-2027, se tippermetti lill-konsumaturi jsibu sewwejja xierqa b’mod iktar faċli. Il-pjattaforma se jkollha taqsimiet għal kull pajjiż tal-UE.
Għal iktar informazzjoni
- Data tal-pubblikazzjoni
- 31 Lulju 2026
- Awtur
- Id-Direttorat Ġenerali għall-Komunikazzjoni